De Vorsterman Bijbel

§ Dat .iiij. Capit.

1

⁺HI maecte ooc eenen metalen outaer .xx. cubitus lanc ende breet, ende thien ellenbogen hooch.

+ A

2

Ende hy maecte een gegoten zee, thien cubitus wijt vanden eenen rant totten anderen, rontsom, ende vijf cubitus hooch Ende een mate van .xxx. cubitus ginc om zijn rontheyt,

3

Een gelijckenisse van runderen was daer onder. Ende daer waren twee reyen knoppen van gehouwen wercke om die zee, die thien ellen wijt was, Maer dye runderen waren gegoten werc,

4

Ende die zee stont also op die .xij. runderen, datter drie gekeert waren ten noorden waert, drie westwaert, drie zuytwaert, ende drie oostwaert, ende dese hadden die zee op hen staen, maer alle haer achterste was binnen onder die zee

5

Ende zijn dicheit was een palme vander hant breet, ende sinen rant als eens bekers rant, ende een ontloken lelie, ⁺ Ende sy hielt drie duysent ^* metreten)

+ B

* the. bathen

6

Ende hi maecte thien ^* backen als mosselen) dier sette hi vijf ter rechter siden, ende vijf ter slincker siden, om daer inne te wasschen al wat si totten brantoffer offeren souden, dat zijt daer in mochten stooten, Maer in die zee wiesschen hen die priesters.

* the. ketels.

7

Hi maecte ooc thien gouden candelaers ^* na die gedaente so hise gheboden hadde te maken,) Ende hi steldese inden tempel vijf ter rechter ende vijf ter slincker hant,

* the. soot behoorde.

8

Ende hi maecte ooc thien tafelen, ende dedese setten inden tempel, vijf ter rechter ende vijf ter slincker siden, Ende maecte .c. gulden ^* flesschen.)

* the. beckens

9

Hi maecte eenen voorhof voor die priesters, ende een groote kercke als een coninclike zale, ende dueren inden palleyse, ende ouertroc die dueren met latoen,

10

Ende hi sette die zee opten rechten hoeck, tegent oosten ten zuyden waerts,

11

Ende ^* Hyram) maecte potten ende crauwelen ende flesschen

Ende hy voleynde alle dat werck des conincs, ⁺ aen dat huys Gods,

* the. huram

+ C

12

te weten, die twee calomnen metten buycken ende knopen, bouen op beyde die calomnen, ende als nettekens beyde gewrongen verheuen werck, om te bedecken beide die buycken der knoopen bouen op die calomnen,

13

ende die .cccc. granaet appelen, en-[kolom]de twee nettekens aen beyde gewrongen verheuen werck, twee ryen granaet appelen, aen elc verheuen werc, om te bedecken beyde die buycken der knoopen die bouen op die calomnen waren.

14

Ooc maecte hi die ghestuenten, ende die ^* backen) op die ghestuenten,

* the. ketels.

15

ende een zee, ende .xij. runderen daer onder.

16

Daer toe potten ^* crauwelen) ende al die vaten maecte Hyram ^* zijn vader) den coninc Salomon totten huyse des HEEREN wten aldersuyuersten metael.

* the. scuppen

* the. Abia

17

In dat lantschap der Iordanen lietse die coninc ghieten, in cleyachtige aerde tusschen Sochot ende Zaredatha

18

Ende al deser vaten menichte was sonder eynde, alsoo dat des metaels ghewichte niet te onderuinden en was

19

⁺Ende Salomon maecte alle die vaten totten huyse Godts, te weten, den gulden outaer, tafelen, ende thoonbrooden daer op geleyt,

+ D

20

die candelaers met haeren lampen, om dat si voor die plaetse des gebets souden bernen, soot behoort vanden alder suyuersten goude,

21

ende ^* sommighe bloeyende bloemen ende luchterkens) ende gulden snutterkens, Dese zijn al van sinen goude gemaect.

* th. die bloemen aen die lampen.

22

Ende hi maecte oock wieroocs vaten, ende fleskens ende mortierkens vanden aldersuyuersten goude, Ende den inghanc ende zijn dueren binnenwaerts tot die alderheylichste plaetse, ende die dueren aenden huyse des tempels waren van buyten gulden, Also wert alle dat werc volbracht, dat Salomon dede aen dat huys des HEEREN.

§ Vanden ghauen die gheoffert werden, ende hoe die Arcke inden tempel ghebracht wert, Ende van die heerlicheyt Gods, die dat huys Gods veruulde.