De Vorsterman Bijbel

§ Dat .xxvi. Capittel.

1

MAer dit zijn die ^* delinghen) der duerwachteren. Vanden Choriten was Meselemia, ⁺ die sone Chore, wt Asaph kinderen.

* the. oordininghen.

+ A

2

Meselemia kinderen waren dese, die eerste geborene Sacharias, die tweede Iadiel, dye derde Sebadia, die vierde Iathaniel,

3

die vijfste Elan. die seste Iohanan, die seuenste Elioenai.

4

Maer Obed Edom kinderen waren dese, die eerste gheborene Semaia, die tweede Iosabad, die derde Ioah, dye vierde Sachar, die vijfste Nathaneel,

5

die seste Ammiel, die seuenste Isachar, die achtste Pollathai, Want God hadde hem gebenedijt.

6

Ende sinen sone Semaia werden ooc sonen geboren die inden huyse haerder vaderen ouerste waren, Want het waren seer stercke mannen

7

So waren dan Semaie kinderen Othni, Raphael, Obed ende Elsabad, ende dies broederen, seer stercke mannen, Elihu ene Samathia.

8

Dese waren alle wt Obed Edom kinderen. Si met haeren kinderen ende broederen waren seer vroome luyden, bequaem tot diensten te doen, tweensestich van Obed Edom.

9

⁺Maer Meselemie kinderen ende haer broederen die alder starcste mannen waren achthien,

+ B

10

Maer van Hosa, dat is, wt Merari kinderen was die vorste Semri, want ^* hy en hadde ghenen eerste geborene) Daerom sette hem zijn vader tot eenen vorste.

* the. deerste geboren en was niet daer

11

Den anderen Helchias, den derden Thabelias, den vierden Sacharia Alle dese kinderen ende Osa broederen waren tsamen derthien.

12

Dese zijn ghedeylt tot duerwachters, op dat altoos die princen der bewaringhen dienen souden int huys des HEREN, ghelijck haer broederen.

13

Ende dat lot wert gheworpen den cleinen ghelijc den grooten onder haerder vaders huysghesinnen, tot eender yegelijcker poorten.

14

Dat lot teghent oosten viel op Selemiam, Maer sinen sone Sacharia die een voorsinnich cloeck raetsman was wierpmen dat lot, ende het viel op hem noortwaerts.

15

Maer Obed Edom zuytwaerts, ende sinen sonen aen welcke side was der ouderen raet.

16

Ende Suphim ende Osa westwaerts, bi die poorte, die leydt totten wech der opclimminghe daer dye eene bewaringhe teghens dye andere staet.

[p. aa6v]

17

⁺Oostwaerts waren ses Leuiten, noortwaerts des daechs vier, zuytwaerts des daechs .iiij Ende daer den raet was twee ende twee.

+ C

18

Ooc in die camerkens der duerwachteren totten westen vier aenden wech, ende twee ende twee door dye camerkens.

19

Dit zijn die ^* deylingen) der duerwachteren onder den kinderen Kore ende Merari.

* the. oordininghen.

20

Maer Achias was ouer die scatten des huys Gods, ende ouer die ^* vaten) der heyliger dinghen.

* the. scatten die gheheilicht werden

21

Laadans kinderen des soons Gerson. ⁺ Van Laadan waren princen der huys ghesinnen, vanden vaders Laadan Gersoniten, Iehielten

+ D

22

Iehieli kinderen waren, Zathan ende Ioel, sine broeders waren ouer die scatten des huys des HEREN.

23

Onder den Amramiten, Izahariten, Hebroniten, ende Osieliten,

24

was Sabuel Gersons sone, des soons Moysi, ende was ouerste gestelt ouer die die schatten.

25

Maer Eliezer sine broeder wiens sone was Rahabia, dies sone was Esaias, dies sone was Ioram, dies sone was Sechri, dies sone was Selomith.

26

Die selue Selomith ende sine broeders, waren ouer al die scatten der geheylichden, dwelc die Coninc Dauid heylichde, ende die princen der huysghesinnen ouer duysent, ende ouer hondert, ende die ouerste int heyr.

27

Van striden ende roouen der oorlogen die si hadden gheheylicht, om te vermaken dat van noode was aenden huyse des HEEREN

28

^* Alle dese dinghen tsamen heeft gheheylicht Samuel die siender, ende Saul Cis sone, ende Abner Ners sone, Ende Ioab Saruie sone alle gader heylichden si dese dingen door) Selomith ende zijnder broederen handen.

* th. Ooc al wat samuel die siender ende saul Cis sone ende Abner Ners sone ende Ioas Seruia soon geheylicht hadden. Allet gheheylichde was onder

29

Maer der Isariten ouerste was Chonias met sinen sonen tot den wercke van buyten ouer Israel, om te leeren ende te oordeelen.

30

Van den Hebroniten was Hasabias ende sine broeders, seer vroome luyden, duysent ende seuenhondert ouer tvolc ghestelt van Israel, ouer dese side des Iordaens westwaerts, tot alderhande wercken des HEREN, ende den Coninc te dienen.

31

Item onder de Hebroniten was Ieria die prince na haer huysghesinnen der vaderen.

Inden veertichsten iaer des Conincrijcs Dauids zijn si ghetelt, ende haerder zijn gheuonden princen der huysghesinnen der vaderen seer vroome mannen in Iaasar ende Galaad,

32

ende haer broeders van stercken ouderdom, twee duysent ende seuenhondert.

Ende Dauid settese ouer dye Rubeniten. Gadditen, ende den haluen gheslachte Manasse, tot allen diensten Gods ende des Conincks.

[kolom]

§ Vanden Ouersten, officiers, hooftluyden, ende dienaers die den Coninc ende den kinderen van Israel dienden, ende dat bi maenden ende tiden, ende ouer wat sake dat een yegelijc stont.