De Vorsterman Bijbel

§ Dat .xix. Capittel.

1

⁺ENde Achab bootscaptet Iesabel al wat helias ghedaen hadde, ende hoe hi alle Baals propheten metten swaerde hadde gedoot.

+ A

2

Doen sandt Iesabel eenen bode tot heliam, ende dede hem seggen. Die goden doen mi dit ende dat daer toe, waer dat ic niet morgen in deser tijt uwe siele en stelle, ghelijc deser sielen een.

3

Doen vreesde hi ende stont op, ende ginc werwaerts hi wilde, ende quam tot Bersabee in Iuda, ende liet sinen knape aldaer,

4

Maer hi ginc henen in die woestine, een dachreyse, ende quam in, ende als hi gecomen was ende geseten onder eenen geneuerboom, badt hi dat zijn siele soude steruen, ende seyde. Tis mi genoech. So neemt nv HERE mijn siele ic en ben niet beter dan mijn vaders,

5

ende leyde hem neder ende sliep onder dye scaduwe vanden geneuerboom.

⁺ Ende siet dye Engel des HEREN raecte hem ende sprac tot hem. Staet op ende etet,

+ B

6

Ende hi sach omme, ende siet tot sinen hoofde lach een ^* broot onder die asschen gebacken) ende een kanne met water. Ende doen hi gegeten ende gedroncken hadde, lach hi weder neder ende sliep.

* th. geroost broot.

7

Ende die Engel des HEREN quam ten anderen male weder ende raecte hem, ende sprac. Staet op ende etet, want ghy hebt eenen grooten wech voor v noch te gaen.

8

Ende hy [kolom] stont op, ⁺ ende adt ende dranck. Ende hy ginc door dye cracht der spijsen .xl. dagen ende .xl. nachten, tot aen den berch Gods Oreb.

+ Io. iiij.b.

9

Ende als hi in een hol quam, so bleef hi daer ouer nacht.

⁺ Ende siet des HEREN woort quam tot hem ende sprac tot hem. Wat maect ghi hier Helia?

+ C

10

Hi sprac. Ic heb met vieriger liefde beroert geweest om den HERE den God der heyrscharen, Want die kinderen van Israhel hebben des HEREN verbont verlaten, ende hebben uwe outaren gebroken, ende uwe propheten metten swaerde gedoot, ende ic ben alleen ouerbleuen, ende si staen daer na dat si mi mijn leuen souden nemen.

11

Ende hi sprac. Gaet wt ende terdet opten berch voor den HERE. Ende siet, die HERE ginc voor bi, ende eenen groten stercken wint, die de berghen scoerde, ende die stenen brack voor den HERE. Maer die HERE en was niet inden windt. Na die wint quam een aertbeuinge, Maer die HERE en was in die aertbeuinge niet.

12

Ende na die aertbeuinghe quam een vier, Maer die HERE en was int vier niet. Ende na den viere quam een stille saecht gesuys der locht.

13

Doen helias dat hoorde, doen bedecte hi zijn aensichte met sinen mantel, ende ginc wt ende terde in die duere des hols. Ende siet, daer quam een stemme tot hem ende sprac. Wat hebt ghy hier te doen Helia?

14

Hi sprac, ic heb om den HERE den God der heyrscharen met vierigher liefden beroert geweest, ^{+ +} want die kinderen van Israel hebben v verbont verlaten, uwe outaren gebroken, uwe propheten metten swaerde gedoot, ende ic ben alleen ouerbleuen, ende si staen daer na, dat si mi dat leuen souden nemen.

+ ecc. xxxviij

+ D

15

Ende die HERE sprac tot hem. Gaet wederomme ws weechs, door die woestine, tot Damascum ende als ghi daer gecomen zijt, so gaet in ende salft Hasael tot eenen Coninck ouer Sirien.

16

Ende Iehu Namsi sone, tot eenen Coninc ouer Israel. Ende Helizeum Saphats sone van Abel Mehola suldi saluen tot eenen prophete in v stede.

17

Ende het sal ghescieden, dat so wie den swaerde Hasael ontloopt, dien sal Iehu dooden. Ende so wie dat den swaerde Iehu ontuliet, dien seluen sal Helizeus dooden,

18

Ende ic sal mi laten ouer bliuen seuen duysent mannen in Israel, wiens knyen die hen niet ghebuyghet en hebben voor Baal, ende alle mont die hem niet ^* aengebeden en heeft, noch de hant ghecust) ⁺

* th. ghecust en heeft

+ Roma. xi.a

19

Ende hy ghinck van daer, ende vant Helizeum Saphats sone, daer hi ploechde met twaelue iocken runderen, voor hem, ende

[p. x3r]

hi was selue onder den twaeluen, Ende als Helias ghinck tot hem, wierp hy sinen mantel op hem,

20

Hi liet ter stont die runderen, ende liep Heliam na, ende sprack, Laet mi bidde ick v minen vader ende mine moeder cussen, ende dan sal ic v na volghen, Hi sprack tot hem, ghaet henen, ende coemt weder, want ^* dat in mi was, hebbe ic v gedaen)

* the. ick heb wat met v te doen

21

Ende hi liep weder van hem, ende nam een iock runderen, ende doodet, ende coocte dat vleesch metten hout werck der ploeghen aen die runderen, ende gaft den volcke, ende si aten, ende stont op, ende volchde Heliam na, ende diende hem.

§ Hoe Samarien eerstwerf beleet wert, Ende hoe Benadad vluchtede, Ende vanden prophete dye tot sinen gesellen sprack, slaet mi die welcke tot Achis propheteerde