De Vorsterman Bijbel

§ Dat .xx. Capittel.

1

⁺ENde ^* Benadab) die coninck tot Syrien verghaderde alle zijn macht, ende daer waren twee ende dertich coninghen met hem, ende paerden, ende wagens, ende troc op, ende belegerde Samarien, ende street daer tegen,

+ A

* th. Benhadad

2

ende sant boden tot Achab den coninc van Israel in die stadt,

3

ende dede hem seggen, Dit seyt Benadab, v siluer ende v gout is mine ende uwe wiuen, ende uwe alderbeste kinderen zijn oock mine,

4

Dye coninck van Israel antwoorde, ende sprack, Mijn heere coninck alsoo ghi ghesproken hebt, ic ben uwe, ende al wat ick hebbe.

5

⁺Ende die boden quamen weder, ende seyden Dus spreect Benadab, die ons tot v ghesonden heeft, V siluer, ende v gout, v wiuen, ende v kinderen sult ghi mi geuen,

+ B

6

So sal ic morghen tot deser tijdt mijn knechten tot v seynden, dat si v huys, ende uwer ondersaten huysen ondersoecken, ende al wat ^* hen) lieflijck is, dat sullen si in haere handen nemen, ende wech draghen,

* thebre. v.

7

Doen riep die coninc van Israel alle die ouders des lants, ende sprack, Merct, ende siet, hoe hi ons lagen leyt, Want hi heeft tot mi ghesonden om myne wiuen, ende kinderen, siluer, ende gout, ende ick en hebbe hem dat niet geweyghert,

8

Doen spraken tot hem alle die ouders, ende alle dat volc Ghi en sult gheen ghehoor geuen, noch consenteren.

9

Ende hi sprac tot Benadabs boden, Segt minen Heere den coninc, Al dat ghi int beginsel tot mi gesonden, ende uwen knecht geboden hebt, dat sal ick doen, maer dit stuck en mach ic niet doen,

10

Ende dye boden ginghen wech, ende seydent hem weder, Doen sandt Benadab tot hem, ende liet hem segghen, Die goden doen mi dit ende dat daer toe, waer dat stof van Samarie genoech zijn sal, dat elck [kolom] van minen volc dat mi na volcht, een hant volle daer af brenghe,

11

Die coninc van Israel antwoorde, ende sprac, Segget hem, Die dat harnasch aendoet, die en sal hem niet beroemen, ghelijc die ghene, diet af heeft gheleydt,

12

Ende het is gheschiet, doen Benadab dat hoorde, dat hy dranc metten coninghen in die tenten, ende sprack tot sinen knechten, belegt die stadt rontsomme, Ende si hebbense rontsomme beleghen.

13

⁺Ende siet, een propheet ghinc van Achab den coninck van Israhel, ende sprack, Aldus spreect die HEERE, Ghy hebt ymmer desen grooten hoop ghesien? Siet, ic sal dyen huyden in uwe hant gheuen, dat ghy weten sout dat ick dye HEERE ben,

+ C

14

Ende Achab sprac, Door wien? Hi sprac, Aldus spreect die HEERE, Door die knapen der lant voochden, Hy sprac, Wie sal den strijt beghinnen? Hy seyde, Ghy,

15

Doen telde hy dye knapen der lant voochten, end hi vant dat tghetal haerder was tweehondert, ende tweendertich, ende telde daer na voort, dat gheheele volc alle der kinderen van Israel, seuen duysent mannen,

16

ende trocken wt in den middaghe, maer Benadab dranc, ende was droncken in zijnder tenten, met den tweendertich coninghen, die hem te hulpe ghecomen waren,

17

Ende die knapen der lant voochten trocken eerst wt.

Benadab sant wt, die hem bootschapten segghende, Daer zijn ghecomen mannen wt Samarien,

18

Hy seyde, Grijptse leuende, si zijn om vrede ghecomen, oft zijn si wt ghecomen om te strijden, vanctse leuende,

19

Ende die nauolgende knechten des lantsheeren zijn wtgetrocken, ende dat ander heyr is hen na geuolcht,

20

ende elc sloech den man wie hem teghen quam, Ende die Syriers vloden, ende Israel volchde hen na, Ende Benadab dye coninc van Syrien ontuloot met paerden ende rosuolc,

21

Ende die coninc van Israel trock wt, ende sloech paerden ende waghens, ende sloech Syrien met eenen grooten slach.

22

⁺Doen ghinc een propheet totten coninc van Israel, ende sprac tot hem, Ghaet henen ende sterct v, ende merct, ende siet, wat ghy doen sult, Want dye coninc van Syrien sal teghen v op trecken, als dat iaer omme is,

+ D

23

Want die knechten des conincs van Syrien spraken tot hem, Haere goden dat zijn berch goden, daer omme zijn si ons te bouen gheghaen, Maer het is beter dat wi teghen hen strijden mochten op dat effene inden velden, ende wi sullen verwinnen,

24

hierom doet dit

[p. x3v]

woort, doet die Coninghen wech, elc van zijnder plaetsen, ende stelt grauen in haer steden

25

ende vernieut dat ghetal des rosuolcs, dye vanden uwen gheuallen, ende verslaghen zijn, ende paerden naden voorleden paerden, ende waghens naden waghens die ghi te voren hadt, Ende wi sullen teghen hen vechten in effen plaetsen der velden, ende ghy sult sien, dat wise verwinnen sullen, Hy hoorde haer stemme, ende dede alsoo.

26

⁺Hierom als nv dat iaer oudt was, oordineerde ende telde Benadab dye van Syrien, ende troc opwaerts tot Apeck, om teghen Israel te strijden,

+ E

27

Ende die kinderen van Israel zijn ooc ouermerct ende getelt, ende besorchden hen oock van spijse, ende trocken hen teghen, ende legherden hen teghen dye, ghelijck twee cleyne cudden geyten, Maer dye Syriers veruulden dat lant,

28

ende daer quam een man Godts toe, ende sprac totten coninc van Israel, Aldus spreect die HEERE, Om dat die van Syrien geseyt hebben, Die HERE is een Godt der berghen, ende nyet een Godt der dalen, hier omme sal ic alle desen grooten hoop in uwen handen gheuen, ende ghi sult weten, dat ic die HEERE ben,

29

Ende si legerden hen stracs, ende schicten haer scaren ter oorlooghen teghen die ghene seuen daghen, Inden seuenden dach is den slach geslagen, ende die kinderen van Israel sloeghen van dien van Syrien hondert duysent voet volcs op eenen dach,

30

ende die ouer gebleuen waren van Syrien vloden tot Apeck in die stadt, ende die muer viel op die ouerbleuen, seuen ende twintich duysent mannen Ende Benadab vluchtede ooc in dye stadt, in een cleyn camerken, dat noch binnen een ander slaepcamer was.

31

Doen spraken zijn knechten tot hem, Siet, ⁺ wi hebben ghehoort dat die coninghen des huys van Israel goedertieren coningen zijn, Aldus so laet ons sacken om onse lendenen doen, ende stricken om onse hoofden, ende wtghaen totten coninck van Israel, messchien hi sal onse sielen laten leuen,

+ F

32

Ende si gorden sacken om haere lendenen, ende stricken om haere hoofden, ende quamen totten coninck van Israel, ende spraken, Benadab v knecht doet v segghen, Ic bidde v, laet mijne siele leuen, hi sprac, Leeft hi noch, soo is hi mijne broeder,

33

Ende die mannen namen dat woort haestelijc van hem, ende bedieden dat woort hem, tot eender geluckighe antwoort, ende spraken, Ia dijn broedere Benadab leeft noch, Hy sprac, Ghaet, ende brenct hem tot mi, doen ghinc [kolom] Benadab tot hem, ende liet hem op sinen wagen setten,

34

ende sprac tot hem, Die steden die mijn vader uwen vader ghenomen heeft, sal ic v wederom geuen, ende maect v straten tot Damasco soo mijn vader te Samarien ghedaen heeft, Ende als ic aldus een verbont met v gemaect heb, sal ic v wech laten reysen, ende hi maecte met hem een verbont, ende liet hem trecken.

35

⁺Doen sprac een man onder den kinderen der propheten, tot sinen naesten door dwoort des HEEREN, Slaet mi, maer hi weygerde hem te slaen,

+ G

36

Doen sprac hi tot hem, Om dat ghi die stemme des HEEREN niet gehoort en hebt, Siet, so sal v een leeuwe slaen, als ghi van mi ghaet, Ende doen hy van hem wech ghinc, vant hem een leeu, ende sloech hem,

37

Ende hi vant eenen anderen man, ende sprack, Slaet mi, ende dye man sloech hem wonden,

38

Doen ghinck dye propheet henen, ende trac totten coninc aenden wech, ende verstelde zijn aensicht met asschen,

39

Ende doen die coninc voorbi troc, riep hi den coninck aen, ende sprac, V knecht was wt ghetrocken midden inden strijt, ende siet, een man was gheweken ende bracht eenen man tot mi, ende sprack, Bewaert my desen man, ist datmen zijns ghemist ende hi v ontginc, so sal v siele in die stede zijnder sielen zijn, ofte ghy sult een pondt siluers daer ouer gheuen,

40

Ende doen ick verbaest hier ende daer keerde, en was die niet meer daer, Ende die coninc van Israel sprac tot hem, dat is voordeel dat ghy selue ghegheuen hebt.

41

Doen vaechde hi haestelijc dat stof van sinen aensichte, ende die coninc van Israel kende hem, dat hi vanden propheten een was,

42

ende hi sprac tot hem, Aldus seyt dye HEERE, Om dat ghy den verbranden man die die doot verdient hadde, van v ghelaten hebt, sal v siele voor sine siele zijn, ende v volc voor zijn volc,

43

Maer die coninc van Israel troc wech, versmadende hier na te hooren in zijn huys, ende quam tot Samarien, met grooter verbolghentheyt.

[afbeelding]

§ Hoe Nabat om sinen wijngaert sterf