De Vorsterman Bijbel

§ Dat .xiij. ca

1

⁺ENde siet, een man Gods quam van Iuda, door dat woort des HEREN te Bethel te wile dat Ieroboam biden outaer stont, om wieroock te worpen,

+ A

2

Ende hi riep tegen den altaer, door dat woort des HEREN, ende sprac, Outaer, Outaer, so seyt die HEERE, Siet, daer sal een sone Dauids huyse geboren worden, geheeten Iosias, die sal op v offeren die priesteren der hoochten, die op v wierooc worpen, ende sal der menschen beenen op v verbernen,

3

Ende hi gaf in dien dage een wonderlijck teeken ende sprac, Dat is dat wonder, dat dit die HEERE ghesproken heeft, siet, den outaer sal schooren, ende die asschen sullen wt ghestortet worden die daer op zijn

4

Ende doen die coninck dat woort vanden man Godts hoorde, ⁺ die teghen den outaer te Bethel riep, recte hi zijn hant wt biden outaer, ende sprac, Grijpt hem, ende zijn hant verdorde die hi teghen hem wt gherect hadde, ende en contese niet weder tot hem ghetrecken,

+ B

5

ende den outaer schoorde, ende die asschen storteden vanden outaer, na dat wonderlijcke teeken, dat dye man Godts ghegheuen hadde, door dat woort des HEEREN,

6

Ende dye Coninck antwoorde, ende sprac totten man Gods Biddet daensichte des HEREN ws Gods, ende bidt voor mi, dat mijn hant weder tot my come, doen badt die man Gods dat aensichte des HEEREN, ende den Coninck wert zijn hant weder tot hem gebracht, ende wert ghelijck si te voren was.

7

Ende die coninc sprac totten man Gods, ⁺ Coemt met mi thuys, om noenmael te eten, ende ick sal v ghiften schencken.

+ C

8

Maer die man Gods sprack totten coninc, Al waert dat ghy mi ooc v halue huys gaeft, soo en quame ick nochtans nyet met v, noch ick en sal in dese plaetse gheen broot eten, noch water drincken.

9

Want alsoo is mi gheboden door des HEEREN woort, ende gheseyt. Ghi en sult gheen broot eten, noch gheen water drincken, ende niet weder door den wech comen, die ghi gegaen [kolom] zijt,

10

Ende hi ghinck wech door eenen anderen wech, ende en quam niet weder door den wech dien hy tot Bethel ghecomen was.

11

Maer daer woonde een oude propheet tot Bethel, tot dien quamen zijn sonen, ende vertelden hem alle die wercken die die man Gods gedaen hadde in dien daghe te Bethel, ende die woorden die hi totten coninck gesproken hadde,

12

Ende haer vader sprac tot hen, Door wat wech is hi ghetrocken? Ende zijn sonen wijsden hem den wech, dien die man Godts ghereyst was, die van Iuda gecomen was,

13

Hi sprac tot sinen sonen, Sadelt mi den ezel, Ende doen si hem den ezel zadelden, reet hi daer op,

14

ende trock den man Gods na, ende vont hem onder eenen ^* therebinthijn) boom sitten, ende seyde tot hem, Sijt ghi die man Godts, die van Iuda ghecomen is? Hy sprack, Ia.

* the. eycken

15

⁺Hi sprac tot hem. Coemt met my thuys, om te eten broot,

+ D

16

Hi sprack, Ic en mach met v niet ommekeeren, ende met v comen. Ic en sal ooc geen broot eten noch water drincken in dese plaetse,

17

Want die HEERE heeft tot mi gesproken, Ghi en sult aldaer noch broot eten noch water drincken, ghi en sult ooc nyet weder door den wech ghaen, dien ghi gheghaen zijt,

18

Hy sprack tot hem, Ic ben ooc een propheet, gelijc ghi, ende een Engel heeft met mi gesproken door des HEREN woort, ende gheseyt,

19

Leydt hem weder met v thuys, dat hy broot ete ende water drincke, Hy ^* bedroech) hem, ende leyde hem wederomme, dat hi broot adt, ende water dranck in zijn huys.

* theb. looch.

20

⁺Ende doen si ouer tafel saten, so quam dat woort des HEEREN totten prophete, dye hem wederomme geleyt hadde,

+ E

21

ende riep totten man Godts die van Iuda gecomen was, ende sprac, So spreect die HERE, om dat ghi den monde des HEREN onghehoorsaem hebt geweest, ende en hebt dat gebot niet gehouden, dat v die HERE v God geboden heeft,

22

ende zijt weder gekeert, ende hebt broot gegeten, ende water ghedroncken in die plaetse, daer hi v af seyde Ghi en sout daer noch broot eten, noch water drincken, soo en sal v lichaem nyet in uwer vaderen graf ghedraghen worden.

23

Ende na dien dat hi broot gegeten ende ghedroncken hadde, sadeldemen den ezel den prophete, dien hi wederomme gheleyt hadde,

24

Ende doen hi wech troc, soo vant hem een leeuwe opten wech, ende doode hem, ende zijn lichaem lach geworpen inden wech, ende dye ezel stont neffens hem, ende dye leeuwe stont neffens dat doode lichaem,

25

Ende siet, doen die luiden voor bi gingen, sagen si tlichaem inden wech geworpen, ende den leeuwe bi dat lichaem staen, ende quamen,

[p. v7v]

ende seydent inder stadt, daer die oude propheet in woonde,

26

Doen dat die propheet hoorde, die hem wederom geleyt hadde, vanden wech, sprac hi, Het is die man Gods, die den monde des HEREN ongehoorsaem gheweest is, daer om heeft hem dye HEERE den leeu gegeuen, die heeft hem gebroken ende ghedoot, na den woorde dat hem die HEERE geseyt heeft,

27

ende sprac tot zijn sonen, Sadelt mi den ezel, Ende doen si dien gesadelt hadden,

28

trock hi derwaerts, ende vant sinen dooden lichaem inden wege geworpen ende den ezel ende den leeu neffens dat lichaem staen, Die leeuwe en hadde vanden lichaem niet geten, noch den ezel niet gequetst,

29

Doen hief die propheet dat lichaem des mans Gods op, ende leydet opten ezel, ende voerdet wederom, ende quam in die stadt des ouden propheten, dat si souden beclagen ende hem begrauen, ⁺ Ende hi leyde dat doode lichaem in zijn graf,

+ G

30

ende beclaechde hem, Wee mi, wee mi, och broeder,

31

Ende doen si hem begrauen hadden, sprack hi tot sinen sonen, Als ick sterue, soo begrauet mi in dat graf, daer die man Gods in begrauen is, ende legt mijn beenen neffens zijn beenen,

32

Want het sal sekerlijc geschieden, dat hi gheroepen heeft teghen den altaer te Bethel, door dat woort des HEEREN, ende teghen alle tempelen, die in hoge plaetsen inden steden van Samarien zijn.

33

Maer na dese geschiedenisse en keerde hem Ieroboam niet wederom van sinen boosen wege, maer hy verkeerde hem, ende dede daer tegen, ende maecte priesters der hoochten vanden snootsten des volcs, So wie wilde, die vulde zijn hant, ende die wert priester der hoochten.

34

Ende om dese saecke sondichde Ieroboams huys, ende is verkeert ende wt gedaen, ende vernielt vanden ouerdecsele der aerden.

§ Hoe die propheet Achias voorseyde tot Ieroboams wijf, dat Abias haer kint steruen soude, ende van dat sware quaet dat op Ieroboam comen soude, Ende van Ieroboams doot, ende vanden tijt zijns rijcs, ende van Roboam