De Vorsterman Bijbel

§ Dat .xij. Ca.

1

⁺ENde Roboam troc tot Sichem, want geheele Israel was tot Sichem gecomen ende verghadert om hem Coninc te maken.

+ A

2

Ende doen Ieroboam die sone Nabath dat hoorde als hi noch in Egipten was, daer hi voor den Coninc Salomon geuloden was ^* hoorende zijn doot) so quam hi weder tot Egipten.

* Ten is nyet int he.

3

Ende si sonden henen ende lieten hem roepen. Ende ieroboam met der gheheelder ghemeynten van israel quamen, ende spraken met Roboam, ende seyden.

4

V vader heeft ons een hart iock opten hals geleyt. Daerom mindert mi een luttelken vanden alderhartsten ioc ws vaders, ende van dat alder swaerste ioc, dat hy ons op geleyt heeft, so sullen wi v onderdanich zijn ende v dienen.

5

Maer hi sprac tot hen. Gaet wech tot aen den derden dach, dan coemt weder tot my. Ende dat volc ginck wech.

[p. v6v]

6

Die Coninc Roboam hielt eenen raet metten ouders dye voor sinen vader Salomon stonden, doen hi leefde ende sprac. Wat raet geeft ghi dat ic desen volcke antwoorde?

7

Si spraken tot hem. Ist sake dat ghi huyden onderdanich zijt, ende doet desen volc huyden eenen dienst, ende weest hen te wille, ende verhoortse, ende geeft hen goede woorden, So sullen si v onderdanich zijn v leuen lanc.

8

Maer hy verliet der ouders raet, dien si hem ghegeuen hadden, ende hielt eenen raet metten iongelingen, die met hem opghewassen waren, ende voor hem stonden.

9

⁺Ende hi sprac tot hen, wat raet geeft ghi dat ic desen volcke antwoorde, die tot mi geseyt hebben, maect dat iock lichter, dat v vader op ons geleyt heeft?

+ C

10

Ende die ionghen die met hem opgewassen waren, seyden tot hem. Ghi sult tot desen volcke dat tot v seyt, v vader heeft onse ioc te zwaer gemaect, maect ghijt ons lichter, also seggen. Minen cleynsten vingher is dicker dan mijns vaders lendenen.

11

Nv mijn vader heeft op v een swaer iock geladen, maer nv sal ic noch meer toe doen op v iock, mijn vader de heeft v met gheesselen ghecastijt, ick wille v met schorpioenen castijen.

12

Hierom quam Ieroboam met den geheelen volcke tot Roboam opten derden dach, ⁺ so die Coninc gheseyt hadde, ende ghesproken Coemt weder tot mi opten derden dage.

+ D

13

Ende die Coninc ghaf den volcke een hart antwoorde, ende verliet den raet, die hem die ouders gegeuen hadden,

14

Ende sprac tot hen na den raet der iongelingen, seggende, mijn vader heeft uwe iock swaer ghemaect, maer ic sal noch toe doen tot uwe iock. Mijn vader heeft v met gheesselen gecastijt, maer ic sal v met scorpioenen castien.

15

Aldus en was die coninc den volcke niet te wille, want ^* die HERE was hem tegen) op dat hi zijn woort crachtich maken soude, dat hi door Ahia van Silo ghesproken hadde tot Ieroboam den sone Nabath.

* th. het was alsoo ghekeert vanden HEERE

16

Maer doen tgeheele volc sach datse dye Coninc niet verhooren en wilde, so ghaf dat volc den Coninc een antwoorde, ende sprack Wat hebben wi dan deels aen Dauid, ofte erffenisse aen den sone Isai? Israel gaet tot uwen wooninghen, So siet ghi nv tot uwen huyse Dauid. Also ghinc Israel in zijn wooningen,

17

also dat Roboam maer ouer die kinderen van Israel en regneerde die in die steden Iuda woonden.

18

Ende die Coninc Roboam sandt Aduram den rentmeester, ende alle [kolom] Israel wierp hem met steenen, ende hi sterf den doot. ^{+ +} Maer die Coninc Roboam clam haestelijc op eenen waghen, ende vloot te Ierusalem.

+ ij.para. x.d

+ E

19

Also ginc Israel van Dauids huyse, tot op desen dach toe.

20

Als nv geheel Israel hoorde dat Ieroboam weder was gecomen, seynden si, ende deden hem roepen totter gheheelder ghemeynten ende maecten hem tot eenen Coninc ouer geheel Israhel, ende niemant en volchde Dauids huyse, dan dat gheslachte Iuda alleen ⁺

+ ij.para. xi.f eccl. xlvij.d

21

Ende doen Roboam te Ierusalem quam, vergaderde hi dat geheele huys Iuda, ende dat gheslachte Beniamin, hondert ende .lxxx. duysent ionge strijtbare ende wt gelesen mannen, om tegen dat huys van Israel te striden, ende om dat Conincrijcke weder aen Roboam Salomons sone te brengen.

22

⁺Het woort Gods quam tot Semeiam den man Gods, ende sprac,

+ F

23

segt Roboam den sone Salomon, den Coninck van Iuda, ende tot den geheelen huyse Iuda ende Ben Iamin, ende den anderen volcke, ende spreect,

24

also seyt dye HERE. Ghi en sult niet optrecken, noch strijden teghen uwe broeders dye kinderen van Israhel. Elck gae weder thuys, want dat is van mi gheschiet. Ende si verhoorden twoort des HEREN, ende keerden wederom, dat si wech souden gaen, also die HERE geseyt hadde.

25

Maer Ieroboam timmerde Sichem opt geberchte Ephraim, ende woonde daer inne, ende troc van daer wt, ende timmerde Phanuel.

26

⁺Ende Ieroboam dacht segghende in zijn herte, dat Conincrijcke sal nv weder tot Dauids huyse comen,

+ G

27

ist dat dit volc op gaet om offerhande te doen inden huyse des HEREN te Ierusalem, ende dat herte des volcks sal hem keeren tot haeren Heere Roboam den Coninc van Iuda, ende si sullen mi dooden, ende weder tot ^* hem) keeren.

* th Ieroboam

28

Ende die Coninc hielt eenen raet ende maecte twee gulden calueren, ende sprac tot hen. En wilt niet meer op gaen te Ierusalem, ⁺ Siet daer zijn v goden van Israel, die v wt Egipten lant geleyt hebben.

+ Exo. xxxij

29

Ende hi sette dat een te Bethel, ende dat ander dede hi te Dan.

30

Ende dat woort wert tot sonde, Want dat volc ginck om dat calf aen te bidden tot Dan toe.

31

Hi maecte ooc tempelen in hooghe plaetsen, ende maecte priesters vanden aldersnootsten des volcs, die vanden kinderen Leui niet en waren.

32

Ende hi maecte een feeste opten vijfthiensten dach der achster maent, ghelijck op die feesten diemen vierden in Iuda

[p. v7r]

ende offerde opten outaer, So dede hi tot Betel datmen den calueren offerde, die hi gemaect hadde, Ende stelde te Bethel die priesters der hoochten, die hy gemaect hadde,

33

ende offerde opten outaer die hi gemaect hadde te Bethel, ⁺ opten vijfthiensten dach der achtster maent welcke hi wt zijn herte versiert hadde, Ende maecte den kinderen van Israel een feeste, ende clam opten altaer, om wieroock te ontsteken, ende bernen.

+ exo. xxxij.d ij.para. xi.a

§ Die propheet voorseit Ieroboam, dat die afgoden ende haer priesters te niet sullen gedaen worden, dat bi een teeken, Ende hoe Ieroboams hant verdorrede doen hi den propheet greep die welcke door des propheets gebet genas