De Vorsterman Bijbel

§ Dat .xi. Capittel

1

⁺MAer die coninc Salomon beminde veel buyten lantsche vrouwen, ⁺ Pharaos dochter, ende die Moabitersen, Amonitersen, Edomitersen, ende van Sydonien, ende ^* Cytheen)

+ A

+ eccl. xlvij.c. Exod. iij.b Cant. vi.c.

* the. Hethitersen.

2

van sulcken volcke, daer die HERE den kinderen van Israel af geseyt hadde, Ghy en sult niet inghaen tot hen, noch van hen en sal nyemant totten uwen incomen, Si sullen uwe herten sekerlijc of keeren, dat ghi na haeren goden volghen sult, Aen dese ^* is verselscapt) Salomon metter barnender liefde,

* th. hinck

3

Ende hi hadde seuen .c. huysurouwen als coninghinnen, ende drie .c. bislaperssen, ende die vrouwen keerden hem zijn herte af,

4

Ende als hi nv out was, so is zijn herte geualst door die vrouwen, also dat hi volchde na vremde goden, Also dat zijn herte niet geheel volmaect en was metten HERE sinen God, ⁺ ghelijc dat herte zijns [kolom] vaders Dauid.

+ Canti. vi.c.

5

⁺Maer Salomon eerde Asterthen die goddinne der Sidomeen, ende ^* Chamos der Moabiten God,) ende Moloch den God der Ammoniten,

+ B

* ten is nyet int heb.

6

Ende Salomon dede dat den HERE qualic behaechde, ende en volbracht niet dat hi den HERE geheelijc volchde, als zijn vadere Dauid,

7

Doen timmerde Salomon eenen tempel Chamos den afgod der Moabiten opten berch die tegen Ierusalem leyt, Ende Moloch den afgod der kinderen van Ammon,

8

Also dede Salomon allen sinen buyten lantschen wiuen die haeren goden wieroock wierpen, ende offerden.

9

⁺Die HERE wert hierom gram ouer Salomon, dat zijn ^* ghedachte) vanden HERE den God van Israel af ghekeert was, die hem tweemael geopenbaert hadde,

+ C

* the. herte.

10

ende geboden van dese redenen, dat hi andere goden niet nae en soude wandelen, ende nochtans en hadde hijt niet gehouden, dat hem die HEERE geboden had,

11

Daerom sprac die HEERE tot Salomon, Want dat bi v gesciet is, ende en hebt mijn verbont ende mijn zeden niet gehouden die ic v geboden heb, so sal ic ooc v conincrijc scuerende in twee sniden, ende uwen knecht geuen,

12

Nochtans binnen uwer tijt en sal ict niet doen om ws vaders Dauids wille, Maer van ws soons handt sal ict schoeren,

13

Nochtans en sal ic dat geheele rijcke niet af schoeren, Een geslachte sal ick dinen sone geuen, om Dauids mijns knechts wille, ende om Ierusalems wille, die welcke ic vercoren hebbe.

14

⁺Ende die HEERE verwecte Salomon eenen weder partijder, Hadad den Edomijt, vanden conincliken zade, die in Edom was,

+ D

15

Want doen Dauid in Edom was, ende Ioab die velthooftman op trock, om die verslaghene te begrauen, soo sloech hy wat mans persoon was in Edom,

16

Want Ioab bleef ses maenden aldaer, ende gheheel Israel, tot dat hijt al wt roeyde wat mans persoon was in Edom.

17

Doen vluchte Hadad ende met hem sommige mannen der Edomiten van zijns vaders knechten, dat si in Egypten souden comen, Maer Hadad was een ionc knechtken,

18

Ende als si op stonden van Madian, quamen si tot Pharan, ende namen luyden met hen wt Pharan, ende quamen in Egypten, tot Pharao den coninck van Egypten, die ghaf hem een huys, ende ghesette spijse, ende ghaf hem een lant in.

19

Ende Hadad vandt groote ghenade voor Pharao, alsoo dat hy hem oock zijns wijfs Thaphenes der coninghinnen suster tot eenen wiue gaf,

20

Ende die suster Taphenes baerde hem Genebath sinen sone, ende Thaphenes

[p. v6r]

voede hem op in Pharaos huyse, alsoo dat Genubath was in Pharaos huyse, onder pharaos kinderen.

21

Doen nv Hadad hoorde in Egipten, dat Dauid ontslapen was met sinen vaderen, ende dat Ioab dye velthooftman doot was, so sprac hi tot Pharao. Laet mi dat ick in mijn lant trecke.

22

Pharao sprac. Wat ghebrect v bi my dat ghi in v lant wilt trecken? Hi sprac, niet, maer ic bidde v, laet mi gaen,

23

Ooc verwecte hem God eenen viant Rason, den sone ElIada, die van sinen heere Hadad Eser den Coninc te Zoba gheuluchtet was

24

ende vergaderde mannen tegen hem, ende hy wert een hooftman der ^* straetroouers) doense dauid versloech, ende si trocken tot Damasco, ende woonden aldaer, ende si maecten hem coninc te Damasco,

* the. crijschknechten

25

ende hi was Israels weder partider, also lange als Salomon leefde. Dat is die scade die Hadad lydede, daeromme hadde hi eenen hate teghen Israel, ende wert coninck ouer Syrien.

26

⁺Daertoe Ieroboam die sone Nabath een Ephrateeusch man van Zareda Salomons knecht. Ende sine moeder hiet Zarua een weduwe, die hief ooc die hant op tegen den Coninc.

+ E

27

Ende dat is die sake, daerom hi den coninc wederspannich wert, Doen Salomon Mello timmerde, besloot hi een scaert aender zijns vaders Dauids stadt.

28

Ende Ieroboam was een strijtbaer man ende machtich. Ende doen Salomon sach dat die iongelinc van goeden aert was, so sette hi hem ouer alle ^* tributen) des huys Iosephs.

* the. den last

29

⁺Maer het gheuiel in die tijt dat Ieroboam wt ginc van Ierusalem, ende die prophete Ahias van Silo quam hem aen opten wech, ende hadde eenen nieuwen mantel aen, ende dye twee waren alleen inden velde.

+ F

30

Ende Ahias vaete den nieuwen mantel, die hi aen hadde, ende schoorde die in .xij. stucken,

31

ende sprac tot Ieroboam. Neemt thien stucken tot v, Want also spreect die HEERE die God van Israel, Siet, ic sal dat conincrijcke van Salomons hant schooren, ende v thien geslachten geuen

32

Een gheslachte sal hem blijuen, om mijns knechts Dauids wille, ende om Ierusalems wil die ic vercoren heb wt allen geslachten van Israel,

33

om dat ^* hi my verlaten heeft, ende aengebedet) Astherten dye goddinne der Sidoniers, Chamos den god der Moabiten, ende Moloch den god der kinderen Ammon, Ende niet gewandelt en ^* heeft) in mine wegen dat ^* hi doen soude) rechtuaerdicheit voor mi ende mijn geboden, ende oordelen, ende rechten, ghelijck Dauid zijn vader. [kolom]

* th. si mi verlaten hebben ende aengebeden.

* th. hebben

* the. si doen souden

34

Ic en sal ooc dat gheheele rijck wt zijnder hant niet nemen, maer ic sal hem tot eenen vorst maken, zijn leefdagen lanc, om Dauids mijns knechts wille, dien ic vercoren hebbe, die mijn gheboden ende zeden gehouden heeft.

35

Wt zijns soons hant sal ic dat conincrijc nemen, ende ic sal v thien gheslachten,

36

ende sinen sone eene geuen, op dat Dauid mijn knecht altoos een keerse hebbe inder stat van Ierusalem, die ic mi vercoren heb, dat ic minen name daer in stellen soude.

37

⁺Aldus sal ic v tot my nemen, dat ghy regeert ouer al dat v herte begheert, ende sult coninc zijn ouer Israel.

+ G

38

Ist dat hi hoort al dat ic v gebieden sal, ende in mijn wegen wandelt ende doet dat mi behaecht ende recht voor mi is dat ghi mijn zeden ende geboden hout, so mijn knecht Dauid ghedaen heeft, so sal ic met v zijn, ende v een ^* getrouwe) huys timmeren, so ic Dauid heb getimmert, ende ic sal v Israhel geuen,

* the. stantachtich.

39

ende sal Dauids zaet daer mede verootmoedigen, nochtans niet altoos.

40

Salomon leyde hieromme toe, ende woude Ieroboam dooden, doen stont Ieroboam op, ende vloot in Egipten, tot Sisak den Coninc van Egipten, ende bleef in Egipten, tot dat Salomon sterf.

41

Wat meer van Salomon te seggen is ende al wat hi gedaen heeft, ⁺ ende van zijn wijsheit, siet, dat is ghescreuen inden boecke der woorden der dagen van Salomon.

+ ij.para. ix g

42

Maer den tijt dat Salomon Coninc was ouer Ierusalem, ende ouer geheel Israel, is veertich iaer.

43

Ende Salomon ontsliep met sinen vaderen, ende wert begrauen in Dauids zijns vaders stadt ende zijn sone Roboam regeerde, ende wert Coninc in zijn stede.

§ Van Roboam die der iongeren raet dede.