De Vorsterman Bijbel

§ Dat .v. ca.

1

⁺ENde Hyram die coninc te Tyro sant zijn knechten tot Salomon, want hi hadde gehoort dat si hem tot eenen coninc gesalft hadden ^* ouer Israel) in zijns vaders stede, Want Hyram was Dauids vrient alle den tijt van zijn leuen lanck,

+ A

* ten is nyet int heb.

2

Ende Salomon sandt tot Hiram, ende dede hem seggen, ⁺

+ i.para. ij.a.

3

Ghi weet ^* den wille van minen vader Dauid, Ende want hi) gheen huys en mochte timmeren den name des HEREN zijns gods, om des oorlooch wille die rontsomme hem was, tot datse die HEERE onder zijn voetsolen ghaf,

* thebre. dat mijn vader Dauid

4

Maer nv heeft my dye HERE mijn God rontsomme ruste ghegheuen, alsoo, datter gheen viant, noch quade hindernisse meer en is,

5

Om deser saken wille, heb ic gedacht een huys te timmeren den name des HEEREN mijns Gods, so die HERE tot minen vader gesproken heeft, ende geseyt, V sone dien ic in v stede setten sal op uwen conincliken stoel, die sal minen name een huys timmeren,

6

Aldus beuelet nv ^* dat uwe knechten) my Cederboomen wt Libanon ^* houwen) ende dat uwe knechten met minen knechten zijn, ende dat loon uwer knechten sal ic v geuen, also ghijt ^* begeren sult) want ghi weet dat bi ons niemant en is, die hout weet te houwen, gelijc die Sidoniers

* th. datmen

* the. houwe

* the. segget.

7

⁺Doen Hiram Salomons woorden hoorde, verblide hi hem hoochlijc ende sprack Gheloeft si die HEERE huyden, die Daui-[kolom]den eenen wijsen sone ghegeuen heeft ouer dit volck,

+ B

8

Ende Hiram sant tot Salomon, ende dede hem seggen, Ic hebbe gehoort al wat ghi mi ontboden hebt, Ick sal doen na alle uwer begheerten, met cederboomen ende met abeelen houte,

9

Mijn knechten sullense af brengen van Libano tot aen die zee, ende salse in vloten laten legghen op die zee, totter plaetsen toe, die ghi mi te kennen sult geuen, ende salse v daer aenbrengen ende wt rechten, ende ghi sultse doen halen Maer ghi sult mi mijn ^* nootdruft geuen) op dat minen huysghesinne spijse ghegeuen worde,

* th. begheerte doen.

10

Aldus gaf Hiram Salomon cederen ende abeelen hout na alle zijn begeerte,

11

Salomon gaf Hiram weder twintich duysent choren tarwen te etene voor zijn gesin, Ende twintich choren des aldersuyuerste olijs, Dit gaf Salomon Hiram iaerlijcs.

12

⁺Ende die HERE gaf Salomon wijsheyt, so hi hem gesproken hadde, ende twas vrede tusschen Hiram ende Salomon, Ende si maecten beyde een verbont met malcanderen,

+ C

13

Ende Salomon maecte een wtschot van werckluyden ouer alle Israhel, Ende dat wtschot was dertich duysent mannen,

14

ende santse tot Libanon, ouer ^* elcke) maent thien duysent, Also dat si een maent op Libanon waren, ende twee maenden thuys. Ende Adoniram was ouer dusdanige wtschot.

* theb. twee.

15

⁺Ende Salomon hadde tseuentich duysent die lasten droegen, ende tachtentich duysent die daer metsten opten berch,

+ D

16

sonder Salomons ouerste officiers, die ouer dat werc geset waren, te wetene, drie duysent ende drie hondert, die welcke ouer dat volck regheerden, die daer aent werck arbeyden,

17

Ende dye coninc geboot, dat si groote ende costelijcke steenen wt souden breken, te weten, ghehouwen steenen totten fundamente des huis, ende dat sise viercant souden maken,

18

Ende Salomons metsers, ende Hirams metsers, ende dye aen die palen waren hieuwen wt, ende bereyden houten ende steenen om dat huys te timmeren.

§ Hier wort bescreuen die ghesteltenisse des tempels Ende die timmeringhe des portaels des buecks des gancs ofte voorkercke des tempels, Ende hoe dat noch hamer, noch bile, noch sage int huys niet gehoort en wert