De Vorsterman Bijbel

§ Dat .iiij. Capittel.

1

ALso was Coninc Salomon Coninc ouer gheheel Israhel

2

Ende dit waren zijn princen die hy hadde. Azarias Sadochs des priesters sone,

3

⁺Elioreph ende Ahia Sisa sone waren die scriuers. Iosaphat Ahiluds sone was Cancellier.

+ A

4

Banaias Ioiadas sone was velthooftman. Zadoch ende Abiathar waren priesters.

5

Asaria Nathans sone was ouer die officiers die biden Coninck stonden. Sabud Nathans des priesters sone was des conincs vrient.

6

Ahisar was hooftmeester. Ado-[kolom]niram Abdas sone was rentmeester.

7

⁺Ende Salomon hadde alleen .xij. officiers ouer gheheele Israel, die den Coninc ende zijn huys besorchden van spijse ende drancke. Deene hadde des iaers een maent lanc te besorghen, datter van noode was.

+ B

8

Ende hieten also. Hurs sone opt gheberchte Ephraim.

9

Decars sone tot Maces, ende te Saalebim, ende te Bethsemes, ende te Elon, ende Beth Hanan.

10

Heseds sone te Aruboth, ende hadde daertoe Socho, ende dat geheele lant Hepher.

11

Abinadabs sone die gheheele heerscappie Dor, ende hadde Thaphat Salomons dochter tot eenen wiue

12

Baana Ahiluds sone tot Thaanach ende tot Mageddo ende ouer geheele Bethseam, twelcke neffens Zarthana leghet, onder Iesrael van Bethsean totten pleyn Mehola toe, tot ouer ghene side Iakmeam.

13

Gebers sone tot Ramoth in Galaad, ende hadde die dorpen Iair Manasses sone in Galaad, ende hadde dat lantscap Argob die in Basan leghet, tsestich grote steden bemuert, ende met metalen grendelen ende sloten.

14

Ahinadab Iddo sone was prouoest tot Manaim.

15

⁺Abimaas in Nepthalim, ende hy nam Salomons dochter Batsemath ooc tot eenen wiue.

+ C

16

Baana Husai sone in Aser ende tot Baleth.

17

Iosaphat Peruhe sone in Isachar.

18

Semei Elas sone in Beniamin.

19

Geber Vri sone inden lande Galaad int landt Sihon des Conincks der Amoriten, ende Og des Conincs tot Basan. Een amptman bouen al was inden seluen lande.

20

Maer Iudas ende Israel, dier was vele, gelijc dat sandt aen die zee, ende aten ende droncken ende waren vrolic.

21

Aldus was Salomon een heere ouer alle dat conincrijcke vanden water aen inder Philistinen lant, tot aen die palen van Egipten, die hem giften brachten, ende dienden hem zijn leefdage lanck.

22

⁺ Ende Salomon moeste daghelicx tot spijsinge hebben dertich Choren bloemen vanden meel, sestich Choren ander meels,

+ Van Salomons spise.

23

thien ghemeste runders, ende twintich weyde runders, ende hondert ^* rammen) wtghenomen Herten ende rheen, ende steenbocken ^* ende huysbeesten, vette geuogelte)

* th. schapen

* th. ende watmen aen der cribben hout

24

Want hi heerscapte int gheheele lant aen dese side des waters, van Taphsach tot Gasa toe, ouer al die Coningen ouer dese side des waters, ende hadde vrede van alle zijn onderdanigen rontsomme.

25

Also dat iuda ende Israel vry woonden, elc onder sinen wijnstock ende onder sinen vigheboom, van Dan tot Bersabee, so lange als Salomon leefde.

26

⁺Ende Salomon hadde veertich duysent cribben van wagen peerden, ende twaelf duysent reysigher paerden. ⁺

+ D

+ Van Salomons staet

27

Ende dye officiers be-

[p. v1r]

sorchdense den coninc Salomon, ende alle dat tot des conincs tafelen behoorde, met grooter sorchfuldicheyt, elck ^* tot zijnder tijt,) ende en lieten niet gebreken,

* theb. in zijnder maent.

28

Oock gherste ende stroo voor die paerden ende loopers brachten si totter plaetsen daer ^* die coninc) was elck na sinen beuele.

* the. hi.

29

Ende God ghaf Salomon seer grote wijsheyt ende verstant, ende vry gemoet, gelijc zant aenden oeuer der zee leget,

30

also dat Salomons wijsheit meerder was, dan alder kinderen vant oosten, ende dan alder Egiptinaers wijsheit,

31

Ende was wijser dan alle menschen, ooc wijser dan die dichters Ethan die Esrahite, Heman, Chalchal ende darda, ende was vermaert onder al die heydenen rontsomme,

32

Ende hi sprac drie duysent bispraken, ende zijnder liedekens waren vijf ^* duysent)

* the. ende duysent

33

Ende hi ^* disputeerde) van boomen, vanden Cederboom aen tot Libanon, tot aen die Isope, die wter wandt wast Ooc sprac hi vant vee, van vogelen, vant gewormte, van visschen,

* the. sprack.

34

Ende wt alle den volcke quamender om te hooren Salomons wijsheit van allen coningen der aerden, die van zijnder wijsheyt ghehoort hadden.

§ Hoe Hyram zijn knechten tot Salomon sant, ende hoe Salomon weder sant tot Hyram den Coninck van Tyren, begherende hout om des HEEREN huys te timmeren daer om belouet hi den knechten haeren loon.