De Vorsterman Bijbel

[p. s1v]

[kolom]

§ Hier beghint dat tweede boec der Coninghen, Regum int Latijn ghenoemt, Samuels tweede boeck.

§ Hoe Dauid vanden slach teghen Amalech quam in Sicelech, ende bleef daer twee daghen, ten derden dage quam een man tot hem, ende bootschapte hem dat hi selue Saul verslaghen hadde. waeromme dat Dauid hem doot te slaghen gheboot, Ende hoe Dauid Saul ende Ionathan beweende.

§ Dat eerste Capittel.

1

⁺HEt is gheschiet, nae Sauls doot, doen Dauid vander Amalechiten slach weder ghecomen was, ende twee daghen tot Sicelech ghebleuen was,

+ A

2

doen quam opten derden dach een man wt den heyr van Saul, met gescoerden cleederen, ende aerde op zijn hooft gespreyt, ⁺ Ende doen hi tot Dauid quam, viel hi ter aerden op zijn aensicht, ende aenbadt.

+ i.regum. iiij.

3

Ende Dauid sprac tot hem, Van waer coemt ghi? Hi sprac tot hem, wt den heyr van Israel ben ic ontulucht,

4

Dauid sprac tot hem, Segt mi, wat ist dwoort datter geschiet is? Hi seyde, dat volck is geulucht vanden strijt, ⁺ ende daer is veel volcs gheuallen, daer toe is ooc Saul doot, ende sine sone Ionathas.

+ i.par. xxi.

5

Dauid sprac totten iongelinc die hem dit seyde, Waer wt weet ghi, dat Saul ende sine sone Ionathas doot zijn?

6

Die iongelinck die hem die tydinge brachte, sprac, Ic quam bi geualle opt gheberchte Gelboe, ende Saul leende op zijn spiesse, ende die wagenen ende dat volck te paerde naecte aen achter hem henen,

7

⁺ende hi keerde hem omme, en sach mi ende riep mi,

+ B

8

ende ic sprac, Hier ben ic, Ende hi seyde tot mi, Wie zijt ghi? Ic seyde tot hem, Ic ben een Amalechite,

9

ende hi sprac tot mi Coemt, staet op, ende doot mi, want benautheyt heeft mi beuaen, want mijn leuen ende mijn ziele noch geheel in mi is,

10

Doen ginc ic op tot hem, ende doode hem, want ic wiste wel dat hi niet leuen en mochte na sinen val, ende nam die croone van sinen hoofde, ende dat armgesmit van sinen arme, ende hebt hier tot v gebracht mijn Heere.

11

Doen greep Dauid zijn cleederen, ende schoordese, ende al die mannen die bi hem waren,

12

⁺ende beclaechden, ende beweenden ende vasteden totten auont ouer Saul ende Ionathan sinen sone, ende ouer dat volc des HEEREN, ende ouer dat huys van Israel, om datsi door tswaert gheuallen waren.

+ C

13

Ende Dauid seyde totten iongelinc diet hem bootschapte, Van waer zijt ghi? Hi seyde, Ic ben een vremdelinc eens Amalechiten sone,

14

Dauid sprac tot hem, Hoe coemt dat ghi v niet gheureest en hebt v hant te slaen aenden gesalfden des HEREN om hem te dooden?

15

Ende

[p. s2r]

Dauid sprack tot een van sinen iongelingen Gaet toe, ende slaet hem, Ende hi sloech hem dat hi sterf,

16

Doen sprac Dauid tot hem, V bloet si ouer v hooft, Want uwen mont heeft tegen v seluen gesproken, ende geseyt, Ic heb den gesalfden des HEEREN ghedoot.

17

⁺Ende Dauid klaechde dese klage ouer Saul ende Ionathan sinen sone,

+ D

18

ende beual datmen den kinderen Iuda, den boge soude leeren, ^* Gelijck daer gescreuen staet int boeck der rechtuaerdighen, ende hi seyde.

Merct aen, Israel, ouer die gene die doot zijn, ende op uwe hoochte ghewondt.)

* § Dit liet heet boghe the. siet het staet gescreuen in dat boec der redelijcken.

19

Die edelste in Israel, zijn op uwe berghen verslaghen, Hoe zijn die vrome gheuallen?

20

En bootschapet dat niet te ^* Geth,) En vercondighet niet opten straten tot Askalon, op dat hen niet en verbliden, die dochteren der Philistinen, op dat die dochteren der ombesnedender, niet vrolijck en zijn.

* the. Gath

21

Ghi bergen tot Gelboe, het en moet noch reghenen, noch dauwen op v, noch ackeren zijn, daer offeren der eerster vruchten af comen, Want den vromen, is haeren schildt daer af gheslaghen, den schilt Sauls, als oft hi met olie niet ghesalft en ware.

22

Den boghe Ionathan en heeft noyt ghemist, Ende Sauls swaert en is niet ledich wederom gecomen, Vanden bloede der verslaghender, ende vanden vette der vromen

23

Saul ende Ionathas vrienthout ende minlijc, ende zeer schoon in haeren leuen, ende zijn ooc niet inder doot gescheyden, Snelder dan de Aarenen, ende starcker dan die leuwen.

24

Ghi dochteren van Israel, weent ouer Saul, die v kleede met rozijn varwe, in wellusten, ende vercierde v met gulden kleynodien aen uwen kleederen.

25

Hoe zijn die starke mannen, soo geuallen inden stride? Ionatas is op uwe hoochten verslaghen.

26

Ick ben bedroeft, om v mine broeder Ionathas, ghi zijt mi zeer minlijck gheweest.

V liefde is mi sonderlingher gheweest, dan der vrouwen liefde.

27

Hoe zijn die starcke gheuallen, ende hoe is dat harnas verghaen.

§ Hoe Dauid in Hebron ghesalft wert, van die boden die hi sandt, tot die mannen van Iabes Galaad, Ende den strijt tusschen Dauids ende Isboseths knechten.