De Vorsterman Bijbel

§ Dat .xxi. Capittel.

1

⁺DAuid quam tot Nobe, totten priestere Achimelech, ende Achimelech verscricte hem, om dat dauid ghecomen was, ende hy sprack tot hem, Waerom coemt ghi alleen? ende en is gheen man met v?

+ A

2

Ende Dauid sprac tot Achimelech den priester, Die coninc heeft mi een sake beuolen, ende sprac tot mi En laet niemant weten waer omme ghi van mi ghesonden zijt, ende wat ic v beuolen hebbe, want ick hebbe oock mine knapen in dese ende in die plaetse verscheyden,

3

Hebdi nv wat onder uwe hant, oft vijf brooden, die geuet mi in mijnder hant, ⁺ oft wat ghi vint,

+ B

4

Die priester antwoorde tot dauid, ende sprac, Ic en hebbe gheen ghemeyn broot onder mijn handen, maer heylich broot, waert dat die knapen suyuer waren van vrouwen,

5

Dauid antwoorde den priester, ende sprac tot hem, Is die reden vanden vrouwen, wi hebben ons benaut van ghisteren ende eerghisteren, ⁺ ende die vaten der kinderen waren heylich, Maer desen wech is onheylich, maer hy sal huyden gheheylicht worden aen die vaten,

+ Titum. i.

6

Doen gaf hem die priester vanden gheheylichden, om datter gheen an-

[p. r5r]

der broot en was, dan die thoonbrooden diemen voor den HERE op geheuen hadde, op datmen ander wermme brooden opleggen soude ^* doen) hi die wech nam.

* tde. des dages doen

7

In dien dage was daer een man ^* inden tabernakel des HEEREN wt den knechten Saul geheeten ^* Doech) een Edomijt, die machtichste onder Sauls herderen ^* dese huede sauls muylen)

* th. ghehouden voor den HEERE

* th. Doeg

* Ten is niet int he.

8

Ende dauid sprac tot Achimelech Hebdi hier onder v hant een spies oft zweert? ^{+ *} geeft mi die) Want ic en hebbe mijn zweert noch mijn wapen niet met mi genomen, want die sake des conincs was haestich,

+ C

* Ten is niet int he.

9

Die priester sprack. Siet, dat zweert des Philistijns Goliath, dien ghi sloecht in ^* die valleye des therebintijns) dat is hier geuonden in eenen mantel achter den heilighen lijfroc, wildi dat, so nemet wech, want hier en is anders geen dan dat. Dauid sprac. Sijns gelijc en is nyet gheuet mi.

* th. den Eycgront

10

Ende dauid stont in dien dach op, ende vloot voor Saul, ende quam tot Achis den coninck tot Geth.

11

Maer Achis knechten spraken tot hem als si Dauid gesien hadden, ⁺ En is dit niet dauid des lants coninc? daer si aen den reye af zongen ende spraken. Saul sloech duisent, maer dauid thien duysent.

+ D

12

Ende dauid nam die reden ter herten, ende vreesde zeer voor dat aensicht van Achis, den coninc tot Geth,

13

ende hy verstelde zijn gelaet voor hem, ende viel onder haer handen, ende stiet hem aen die duere der poorten, ende zijn zeuer vloeyde hem inden baert.

14

Doen sprack Achis tot sinen knechten. Ghi saecht dat dye man onsinnich is, waer om hebdi hem tot my gebracht?

15

heb ic der onsinnigen te luttel, dat ghi desen hier bracht, dat hy voor my soude rasen? Laetten gaen, dat hi in mijn huys niet en come.

§ Hoe Dauid vluchtede totter speluncken Odullam, ende zijn ouders quamen rot hem ende meer andere, Ende dauid beuaelt sinen vader den coninc Moab.