De Vorsterman Bijbel

§ Dat .xxij. Capittl.

1

DAuid ginc van daer, ende ontuluchte in de speluncke Odollam. Doen dat zijn broeders hoorden ende dat geheel huys zijns vaders so quamen si tot hem af derwaerts.

2

⁺Ende alder hande mannen die in bangicheit ende schult, ende van bedroefder herten waren, vergaderden hen tot hem, ende hi is geworden haer ouerste, also dat bi vier hondert mannen bi hem waren.

+ A

3

Ende Dauid ginck van daer tot Masphat, die inder Moabiten lant leit, ende sprac totter Moabiten coninck. Ic bidde v, laet mijn vader ende moeder by v bliuen tot dat ic verneme, wat God met mi doen sal.

4

Ende hi lietse voor dat aensicht vanden coninc der Moabiten, dat si bi hem bleuen, so lange als da-[kolom]uid in die borcht was.

5

Maer die prophete Gad seyde tot dauid. En wilt inden borcht niet bliuen, maer reyst heenen ende coemt int landt Iuda. Doen ginc dauid wech, ende quam in die bosschagie Hareth.

6

Ende het quam voor Saul, dat dauid ende die mannen die bi hem waren te voorschijn waren ghecomen.

Als nv Saul tot Gaboa woonde onder eenen bosch in Rama, so hadde hi een spies in zijn hant, ⁺ ende alle zijn knechten stonden rontsomme hem.

+ B

7

Doen sprac Saul tot sinen knechten die neffens hem stonden. Hoort nv mi ghy kinderen Iemini. Sal v oock die sone Isai alle ackers ende wijnbergen geuen, ende v alle ouer duisent ende ouer hondert tot ouerste maken?

8

dat ghi v alle in muterie verbonden hebt tegen mi, ende daer en is niemant diet minen ooren openbare. Aengesien, dat aldermeest is, dat ooc mijn sone een verbont gemaect heeft metten sone Isai. Daer en is niemant die mijn ongeluc beclaget van minent wegen, ende minen ooren openbare. Want mijn sone heeft minen knecht tegen mi verwect, die mijn laghen leget, so dat aenden dach van huyden is.

9

Doen antwoorde Doech die Edomijt, die neffens sauls knechten stont ende sprac. ⁺ Ic sach den sone Isai dat hy tot Nobe quam, tot Achimelech den sone Achitob,

+ C

10

die raet vraechde voor hem den HEERE, ende gaf hem spijse, ende dat swaert Goliath des Philistijns.

11

Doen sandt die coninc henen, ende dede roepen Achimelech den priestere den sone Achitob, ende alle zijns vaders huys, dye priesters dye tot Nobe waren, ende si quamen alle totten coninc. ⁺

+ ten is nyet int heb.

12

Ende Saul sprac tot Achimelech). Hoort ghy sone Achitob. Hi sprac. Hier ben ic bereyt mijn here.

13

Ende Saul sprac tot hem. Waerom hebdi een verbont tegen mi gesworen, ghi ende de sone Isai, dat ghi hem broot ende tsweert gegeuen hebt, ⁺ ende Gode voor hem raets geuraecht, dat hi tegen mi opstaen soude ende mi lagen leggen, so dat is aenden dach van huyden.

+ D

14

Achimelech antwoorde den coninc ende sprac Ende wie is onder alle uwe knechten, als Dauid, die getrouwe is, ende des Conincs swagher ende gaet wt in die ghehoorsaemheyt, naden gheboden des Conincs, ende coemt weder inne, ende is heerlijc gehouden in uwen huyse.

15

Heb ic van huyden eerst begonst Godt voor hem raet te vragen? dat si verre van mi. De Coninc en legge sinen knechte sulcs niet op in alle mijns vaders huys, want v knechte en heeft van allen desen niet geweten, noch cleyn noch groot.

16

⁺Maer die Coninc sprack tot Achimelech. Ghi moet die doot steruen ghi ende alle ws va-

+ E

[p. r5v]

ders huys.

17

Ende die coninc sprac tot sinen artsiers die rontsom hem stonden. Keert v ende doodet des HEREN priesters, want huer handt is ooc met Dauid, ende doen si wisten dat hi vluchte, en hebben zijt mi niet te kennen gegeuen. Maer die knechten des conincs en wilden haer handen niet aen des priesters des HEREN slaen ^*)

* th. om de te verslaen

18

Doen sprac die coninc tot ^* Doech) Keert v ghi ende verslaet de priesters, Doech die Edomijt keerde hem ende versloech die priesters, alsoo dat op dien dach storuen lxxxv. mannen die heilighe lijnen rocken droeghen

* the. Doieg

19

Ende die stat der priesteren Nobe, sloech hi metter scarpten des zwaerts, beide mannen ende vrouwen, kinderen ende suygelingen, ossen ende ezelen, ende scapen.

20

Maer een sone Achimelech des soons Achitob die Abiathar hiet, ontliep ende vluchte tot Dauid,

21

ende vercondichde hem, dat Saul die priesters des HEREN gedoot hadde

22

⁺Dauid sprac tot Abiathar. Ic wiste wel inden dage doen die Edomijt Doech daer was, dat hijt sonder twifel soude bootscappen. Ic ben schuldich aen alle die sielen van ws vaders huyse.

+ F

23

Blijft bi mi ende en vreest niet. Wie na mijn leuen staet, die sal ooc na v leuen staen, ende sult met mi behouden worden.

§ Hoe Dauid Ceylam vander Philistinen handt verloste, naden raet Gods, Ende hoe Dauid na Gods raet van Ceyla vliet om Sauls wille, ende coemt in die woestine ziph, ende wort vanden inwoonders van ziph besculdicht.