De Vorsterman Bijbel

§ Dat .x. Capittel.

1

⁺DOen nam Samuel een olieglas, ende goodt op zijn hooft, ende custe hem, ende seyde, Siet, dye HEERE heeft v tot eenen prince ouer zijn erfdeel gesalft?

+ A

2

Als ghi van mi ghaet, soo suldi twee mannen vinden, by den graue Rachel, inden pale Beniamin tot ^* den zuyden,) die sullen tot v segghen, die Ezellinnen zijn geuonden, die ghi zijt ghaen soecken, ende siet, v vader heeft dye ezels, wt der achtinghe ghelaten, ende sorget om v, ende seyt, Wat sal ick om mijnen sone doen?

* the. zelzah.

3

Ende als ghi van daer voorder ghegaen sult zijn, soo suldy comen totter eycken Tabor, daer sullen v drie mannen aen comen, die opwaerts gaen tot God te Bethel, dee-

[p. q6v]

ne draecht drie ionge geyten bocxkens, dye ander drie coecken broots, die derde een flessche met wijn

4

ende si sullen v als si v gegruet hebben twee brooden gheuen, ende die suldi van haeren handen nemen,

5

Daer na suldi comen op den hoeuel Gods, daer der Philistinen schilt wachte is Ende als ghi aldaer in die stadt coemt, so sal v eenen hoop propheten ontmoeten vander hoochten, ende voor hen een psalter spel ende tamboere, pijpen ende herpen gaen, propheterende,

6

ende die gheest des HEREn sal spoedich worden ouer v, dat ghi met hen sult propheteren, ende dan suldi in een ander man worden verandert.

7

⁺Als v nv dese tekenen comen, so doet wat v voor handen coemt, want God is met v,

+ B

8

Ende ghy sult voor mi af gaen tot Galgala, ende daer sal ic tot v certeyn af comen, dat ghi brantoffer ende vreedsamen offer offert, Seuen daghen suldi verbeyden tot dat ic tot v come, ende v te kennen geue wat ghi doen sult,

9

Ende doen hi zijn schouderen keerde, dat hi van Samuel soude gaen veranderde hem God in een ander herte, ende alle dese teekenen quamen op den seluen dach.

10

Ende als si aen den hoeuel quamen, Siet doen ontmoete hem eenen hoop propheten, ende den gheest Gods wert spoedich ouer hem, also dat hi onder dat middel van hen propheteerde,

11

Maer doen si hem saghen die hem gisteren ende eerghisteren ghekent hadden, dat hi metten propheten propheteerde, seyden si alle onder malcanderen, Wat is den sone Cis gheschiet? Is Saul ooc onder die propheten?

12

Ende die een antwoorde totten anderen, seggende Ende ^* Cis zijn) vader? Daer wt is dat segwoort gecomen, ⁺ Is Saul ooc onder die Propheten?

* thebr. Wie is huer.

+ Ioan. iij.d.

13

⁺Ende hi hiel op van propheteren, ende quam op die hoochte,

+ C

14

Sauls vaders broeder sprac tot hem ende tot sinen knape, Waer sidi henen gegaen? Si antwoorden, die ezels soecken, ende doen wi die niet en vonden, soo quamen wi tot Samuel

15

Doen sprac Sauls vaders broeder, segt my wat seyde Samuel tot v?

16

Saul antwoorde sinen oome, Hi seide ons, dat die ezelinnen vonden waren, Maer vanden woorden des conincrijcs en seyde hi hem niet wat Samuel gheseyt had

17

Ende Samuel riep dat volc te samen totten HEERE tot Maspha,

18

ende sprac totten kinderen van Israhel, Aldus seyt die HERE die God van Israel, Ic heb Israel wt Eypten geleyt, ende v vander Egyptinaren hant verlost, ende vander hant alder conincriken die v dwongen

19

Ende ghi hebt nv huiden uwen god verworpen, die alleen v wt allen uwen quaden ende druck gheholpen heeft, Ende ghi hebt gheseyt, Ten sal in gheender manieren soo [kolom] zijn, Maer settet eenen coninc ouer ons, Welsoo staet nv voor den HERE, na uwe stammen ende gheslachten.

20

Doen nv Samuel alle dye gheslachten van Israel daer toe bracht, so wert dat lodt gheworpen, ende viel op dat geslachte van Ben Iamin,

21

⁺Ende doen hi dat geslachte Ben Iamin daer toe bracht met sinen gheslachten, so viel dat lodt op dat geslachte Metri, ende quam voort op Saul die sone Cis, Ende si sochten hem daeromme, maer hy en was daer niet gheuonden,

+ D

22

Daer omme vraechden si voorder den HEERE, ofte hy noch derwaerts comen soude? Die HERE antwoorde, Siet, hy heeft hem ^* tot huys) geborgen,

* the. onder die vaten

23

Doen liepen si henen, ende haelden hem, ende doen hi onder dat volc stont, was hi vanden schouderen ende daer bouen langer dan alle dat volc,

24

Ende Samuel sprac tot alle den volcke, Daer siet ghy, welcken die HERE vercoren heeft, want zijns en is gheen ghelijcke in alle den volcke, Doen riep alle dat volck, ende sprack, Dye Coninck moet langhe leuen.

25

Samuel seyde den volcke alle dat recht des conincrijcs, ende screeft in een boec, ende leyde dat voor den HEERE, Ende Samuel liet alle dat volc ghaen elc in zijn huys,

26

Ende Saul ghinck oock thuys tot Gabaa, ende des heyrs ghinck een deel met hem, der welcker herten God raecte,

27

Maer die kinderen Belial spraken, Sal ons dese yet mogen helpen? ende verachten hem, ende en brachten hem gheen ghiften, Maer hi dede al veynsende, als oft hijs niet en hoorde.

§ Hoe Nahas die Amonitere Iabes Galaad belegherde, ende Saul zijn rijck vernieuwede, Ende hoe Saul in Galgala Coninck ghemaect wert.