De Vorsterman Bijbel

§ Dat .ix. Capittel.

1

⁺DAer was een man van Beniamin gheheeten Cis, ⁺ een sone Abiel, des soons Zeor, des soons ^* Bethor) des soons Apia, des soons eens mans Gemini, sterc van crachten.

+ A

+ i.para. i.d.

* the. Bechorath

2

Die hadde eenen sone gheheeten Saul, die was een wtuercoren ende goet iongelinc, ende onder die kinderen van Israel en was niet een man die beter was. Van die schouder ende daer bouen stac hi wt bouen alle dat gemeyn volck

3

Ende die ezelinnen van Cis Sauls vader waren verloren, ⁺ ende hi sprack tot sinen sone Saul Neemt der knapen een met v, ende staet op ende gaet henen ende soect die ezelinnen. Ende als hi ginc door dat geberchte Ephraim

+ i.para. viij.

4

ende door dat lant Salisa, en vont hise niet. Si gingen ooc door dat lant Saalim, ende si en waren daer niet. Si gingen door dat lant Iemini, ende en vondense daer ooc niet.

5

Maer doen si int landt Zuph quamen, sprac Saul totten knape, dye met hem was, Coemt laet ons weder thuys ghaen. ⁺ Mijn vader mocht die ezelinnen laten ende voor ons sorghen.

+ B

6

Hi sprack. Siet daer is een eerlijck man Gods in deser stadt, alle wat hi seyt dat gheschiet ^* sonder eenighe twijfelinge). Nv laet ons derwaerts ghaen, messchien hy sal ons onsen wech wijsen, dien wi gaen.

* Ten is nyet int he.

7

Saul sprac tot sinen knape. Siet wi sullen ghaen. Wat sullen wi brenghen totten man Gods? want dat broot is al wt onser malen, ende wi en hebben ^* geen korfken, oft yet anders geen ghaue) die wi den man Gods mochten gheuen. Wat hebben wy?

* th. ooc niet eenige ander gaue

8

Die knape antwoorde

[p. q6r]

weder ende sprack, Siet, ick hebbe een vierendeel eens silueren ^* pennincx in mijn hant) gheuonden, dien laet ons den manne Gods gheuen, dat hi onsen wech segghe.

* th. sikels bi

9

Voortijts in Israhel alsmen ghinck, om den HEERE te vraghen, so seydemen, Coemt laet ons ghaen totten Siender, want diemen nv propheten heet, die hietmen voortijts sienders

10

Saul sprack tot sinen knape, ⁺ Ghy hebt wel ghesproken, Coemt, laet ons ghaen, Ende doen si totter stadt ginghen daer dye man Godts was,

+ iij.Reg. ij.f ende .xviij.

11

ende totter stadt op quamen, so vonden si deernen die wt gheghaen waren, om water te putten, Totten seluen spraken si, Is die siender hier?

12

Si antwoorden hem, ende spraken, Ia, Siet, daer is hy, Haest v, want hy is huyden in dye stadt ghecomen, want dat volck huyden te offeren heeft opter hoochten,

13

Als ghi in die stadt coemt, soo sult ghi hem vinden, eer hi opghaet, op die hoochte, om te eten, want dat volc en sal niet eten, tot dat hi en come, want hi sal ghebenedien den offer, daer na sullen si eten, die genoot zijn, Daeromme soo ghaet op, want nv suldy hem iuyst vinden.

14

⁺Ende doen si op totter stadt quamen, ende midden inder stadt waren, Siet, doen ginc Samuel wt, hen te gemoete, om op de hoochte te ghaen,

+ C

15

Maer dye HEERE hadde Samuel zijn oore gheopenbaert, eenen dach te voren eer Saul quam, ende geseyt,

16

Morgen op desen tijt sal ick eenen man tot v seynden wt den lande Ben Iamin, dien suldy tot eenen vorste saluen, ouer mijn volck van Israel, dat hi mijn volck verlosse vander Philistinen hant, want ick heb mijn volck aen gesien, want haer ghecrijsch is voor mi ghecomen,

17

Doen nv Samuel Saul aensach, so antwoorde hem dye HEERE, Siet, dat is die man, daer ic v af gheseit hebbe, dese sal heerschappie ouer mijn volc hebben.

18

Doen trat Saul op tot Samuel onder die poorte, ende sprack, Segt mi, bid ic v, Waer is hier des sienders huys?

19

Samuel antwoorde Saul, ende seyde, Ick ben dye siender, Ghaet voor mi op die hoochte, want ghi sult huyden met mi eten, ende morgen vroech sal ic v laten ghaen, ende al wat in uwer herten is, sal ic v seggen,

20

ende om die ezelinnen die ghi voor drie daghen verloren hebt, en becommert v nv niet, si zijn gheuonden, ende wiens salt zijn al dat tbeste is in Israel? en salt niet uwe, ende den gheheelen huyse ws vaders zijn?

21

Saul antwoorde, En ben ic niet een sone van Iemini vanden alderminsten stamme ende mijn geslach-[kolom]te dat cleynste onder alle geslachten der stammen Ben Iamin? Waeromme segdi tot my dan van sulcken redenen?

22

⁺Samuel nam Saul ende sinen knape, ende leydese in die eedtcamer, ende settese bouen onder die ghenoot waren, dier was by dertich mannen,

+ D

23

Ende Samuel sprack totten cock, Gheeft herwaerts dat stuck dat ick v ghaf, ende beual v dat ghijt bi v sout houden,

24

Doen hief die cock een schouder op, ende droechse op ende settese voor Saul, ende ^* Samuel) sprack, Siet, dat is ouer bleuen, legghet voor v ende etet, want het is met versinne tot deser tijde voor v gehouden, doen ic dat volck noodede, Alsoo adt Saul met Samuele op dien dach

* ten is nyet int hebre

25

Ende doen si af ginghen vander hoochten, totter stadt, soo sprac hi met Saul opten soldere,

26

Ende stonden vroech op, Ende doen dye morgen stond op ghinc, so riep Samuel Saul op den solder, ende si gingen beyde met malcanderen wt, hi ende Samuel,

27

Ende doen si afquamen tot aen dat eynde der stadt, so sprac Samuel tot Saul, Segt den knape, dat hy voor ons wech gae altoos voort aen, Maer staet ghy nv een weynich stille, dat ick v te kennen gheue, wat God geseyt heeft.

[afbeelding]

§ Hoe Saul tot eenen Coninc ghesalft wert, Ende van die teekenen die hem gegheuen werden, Ende hoe Saul onder die propheten propheteerde, ende hoe zijn rijck beuesticht wert in Masphat.