De Vorsterman Bijbel

§ Dat .xi. Capittel.

1

⁺ENde ^* het is gebuert omtrent een maent daer na) Nahas die Ammonite troc opwaerts, ende belegherde Iabes in Galaad, ende alle die mannen tot Iabes spraken tot Nahas, Maect een verbont met ons, so willen wi v dienen,

+ A

* ten is nyet int heb.

2

Maer Nahas die Ammonite antwoorde hen, Daer inne sal ick met v een verbont maken, dat ick v allen die rechter ooghe wt steke, ende maken v tot schanden ende verwite onder alle Israhel,

3

Doen spraken tot hem alle die ouders van Iabes, Gheeft ons seuen daghen, dat wi boden seynden in alle palen van Israhel, en isser dan gheen beschermer, so sullen wi tot v wtgaen.

4

Doen quamen die boden tot Gabaa Sauls ende spraken dat voor die ooren des volcs Doen hief alle dat volc zijn stemme op, ende

[p. q7r]

weende,

5

Ende siet doen quam Saul vanden velden achter die runderen ende sprac, wat is den volcke dattet weent? Doen vertelden si hem die sake der mannen van Iabes.

6

Doen wert den geest Gods spoedich op hem, als hy sulcke woorden hoorde, ende zijn toornicheyt vergramde zeer,

7

ende nam een paer ossen ende hieuse in stucken, ende seyndese in alle die palen van Israel, door die boden, ende dede seggen, Wie niet wt en trect Saul ende Samuel na, diens runderen salmen also doen.

⁺ Doen viel die vreese des HEEREN op dat volc, dat si wt trocken gelijc een man

+ C

8

ende men teldese te Besek, ende die kinderen van Israel waren drie hondert mael duysent mannen, ende der kinderen Iuda dertich duysent,

9

ende si seyden den boden die gecomen waren. Aldus segt den mannen van Iabes Galaad. Morgen sal v behoudenisse gescieden als die sonne opt heetste is. Doen die boden quamen ende vercondichden dat den mannen van Iabes so werden si blide,

10

ende die mannen van Iabes seyden. Morgen sullen wi tot v wt gaen, ⁺ dat ghi ons doet alle dat v belieft.

+ D

11

Ende des anderen daechs smorgens stelde Saul dat volc in drie deelen, ende quam inden leger aen die morgen wake, ende sloech die Ammoniten tot dat den dach opt heetste wert, Maer die ouerbleuen, die werden also verstroeyt, dat haerder niet twee by malcanderen en bleuen.

12

Doen sprac dat volck tot Samuel. Wie zijn si dye daer seyden. Saul en sal ouer ons niet regneren? Gheeft die mannen herwaerts dat wise dooden.

13

Maer saul seyde. Niemant en sal op desen dach steruen Want die HERE heeft huyden salicheyt gegeuen in Israel.

14

Samuel sprac totten volcke. Coemt laet ons tot ^* Galgala) gaen, ende dat conincrijcke aldaer vernieuwen.

* th. Gilgal.

15

Doen ginc alle tvolck tot Galgala, ende maecten Saul daer tot eenen coninck voor den HERE tot Galgala ende offerden vreedsame offer voor den HERE, Ende Saul met alle den mannen van Israel, verbliden hen daer te mael zeer.

§ Van Samuels sachtmoedicheit ende onnooselheit, hoe dat volc gestraft wert van haerder ondancbaerheit, Van dat quaet dat si gedaen hadden begeerende eenen Coninck.