De Vorsterman Bijbel

[p. q1r]

§ Hier beghint dat boeck van Ruth.

§ Hoe Elimelech van Bethlehem met zijnder huysurouwe Noemi, ende met sinen kinderen int Moabijtsche lant woonde, ende Noemi wederomme tot Bethlehem coemt met Ruth.

§ Dat eerste Capittel.

1

⁺INder ^* tijt eens rechters) doen die rechters regeerden so wert eenen dieren tijt inden lande, Ende een man van Bethlehem Iuda, troc ^* wandelen) inder Moabiten lant, met sinen wiue ende twe sonen,

+ A

* th. tis gheschiet inden daghe

* the. om een vremdelinc te zijn.

2

hi hiet EliMelech, ende zijn wijf Noemi, ende sine twee sonen, die eene Mahalon, ende die ander, Chilion, die waren Ephratiten van Bethlehem Iuda, ende doen si quamen int lant der Moabiten, woonden si aldaer,

3

Ende EliMelech die man Noemi sterf, ende si bleef ouer met haeren twee sonen,

4

die namen Moabijtsche wiuen, deene heet Orpha die andere Ruth, ende doen si daer thien iaren ghewoont hadden,

5

so storuen si alle beide, Mahalon ende Chilion, also dat dat wijf berooft was beyde der sonen ende haeren man.

6

Doen stont si op met beide haer sonen huysurouwen, ⁺ om wederom te gaen int lant haerder geboorten, wt der Moabiten lant, want si hadde ghehoort dat die HEERE hadde zijn volc aen gesien, ende hen spijse gegeuen,

+ B

7

ende ginc wt vander plaetsen daer si geweest was in pelgrimagie, ende beyde haerder sonen huysurouwen met haer. Ende doen si was opten wech dat si weder soude comen int lant Iuda,

8

sprac si tot ^* haer) Gaet henen ende keert wederomme, elcke tot haerder moeder huys. Die HERE doe v ontfermherticheit so ghi aen die dooden, ende aen mi ghedaen hebt.

* the. beyde haerder sonen wiuen.

9

Die HERE gheue v dat ghy ruste vindet, elck in haers mans huyse ^* dat ghi crighen sult), ende si custese.

⁺ Doen hieuen si haer stemmen op,

* ten is nyet int hebr.

+ C

10

ende weenden ende seyden tot haer. Wi willen met v tot uwen volcke gaen.

11

Maer Noemi sprac. Keert wederom mine dochteren, ende gaet wech, waerom coemt ghi met mi? Sal ic voort aen kinderen in minen lichaem hebben, die uwe mannen zijn mochten?

12

Keert wederom mine dochteren, ende gaet henen, want ic ben nv te oudt, ende niet bequaem totten bant des houwelics. Ende al waert dat ic desen nacht sonen mocht ontfangen ende baren,

13

wilde ghi verwachten tot dat si wiessen, ende volbrochten die iaren, tot dat si tijtbaer waren, ghi soudt verouden, ende onuruchtbaer zijn, eer ghi houwen sout mogen En wilt so niet doen, bid ic v mine dochteren want uwe benautheyt doet mi te wee, want des HEREN hant is tegen mi wtghegaen. [kolom]

14

Doen hieuen si haer stemmen op, ende weenden noch meer, ende Orpha custe haers mans moeder, ende keerde wederomme, Maer Ruth bleef bi haers mans moeder.

15

Ende Noemi seide tot haer. Siet, v ^* nichte) is weder gekeert tot haeren volcke, ende tot haeren ^* goeden) keert ghi ooc wederomme met haer.

* th. zwagherinne

* th. God ij.Re. xx

16

Ruth antwoorde, en wilt mi niet tegen zijn, dat ic v verlaten soude ende van v gaen, waer ghi henen gaet, daer sal ic ooc henen gaen, waer ghy blijft, daer sal ick ooc met v tsamen bliuen. V volc is mijn volc, ende v God is mijn God,

17

wat lant v ontfangen sal als ghi sterft, daer sal ic ooc steruen, ende daer sal ic een plaetse nemen tot mijn begrauenisse, Dit moet mi die HEERE doen, ende noch daer toe, ist dat die doot alleen v ende my niet en sal scheyden.

18

⁺Als nv Noemi sach, dat Ruth vaste inden sinne was met haer te gaen, so lietsi af met haer daer af te spreken ^* ende en wilde niet meer teghen haer vallen, noch raden om tot haeren volcke wederom te trecken)

+ D

* ten is nyet int hebr.

19

Also ghingen die beyde tsamen met malcanderen, tot dat si tot Bethlehem quamen. Ende doen si in die stadt quamen, so roerde haer die fame in die geheele stadt ouer ende seyden. Is dat die Noemi?

20

Maer si seyde tot hem. En heet mi niet Noemi, maer Mara, want die almachtige heeft mi seer bedroeft.

21

Vol trock ic wt, maer ydel heeft mi die HERE weder thuys gebracht Waerom heet ghi mi dan Noemi? die de HERE doch verootmoedicht heeft, ende die almachtighe bedroeft?

22

Het was omtrent den tijt dat den gherstenoost begonst, doen Noemi ende haers soons wijf Ruth die Moabitinne weder qamen vander Moabiten lant tot Bethlehem.

§ Hoe Ruth Mahalons weduwe in Boos ackere achter die mayers oostede, ende gespijst wert.