De Vorsterman Bijbel

§ Dat .xxi. Capittel.

[p. p8v]

1

⁺DIe mannen van Israel hadden tot Maspha gesworen ende geseit. Niemant en sal van zijn dochteren den Ben Iamiten tot eenen wiue gheuen,

+ A

2

ende al dat volc quam totten huyse Godts, ende bleef daer tot tsauonts toe voor God, ende hieuen haer stemme op met groten gheluyt, ende weenden seer ende spraken

3

O HEERE God van Israel, waeromme is dat quaet gheschiet in uwen volcke, dat huyden eenen geslachte van ^* ons) wech genomen is?

* th. Israel.

4

Des anderen morgens stont dat volc vroech op, ende timmerde daer een outaer, ende offerden brantoffer ende vreedsame offerhande.

^* Ende seyden)

* the. die kinderen van Israel seyden

5

Wie is vanden geslachten van Israel, die niet int heyr des HEEREN op en is gecomen? ⁺ Want si hadden met eenen groten eet verbonden doen si in Maspha waren dat si dooden souden die ghene die daer niet en waren.

+ B

6

Ende die kinderen van Israel hadden rouwe ouer BenIamin haeren broeder ende seyden. Huyden is een gheslachte van Israel wech genomen,

7

van waer sullen si huysurouwen nemen? Want wi hebben al int gemeyn gezworen ^*) dat wi hen onse dochteren niet geuen en sullen te wiue,

* the. by den HEERE.

8

ende seyden, Hierom, wie isser vanden geslachten van Israel die niet op comen en is totten HEERE in Maspha? Ende siet, daer en was niemant geweest wt den borgheren van Iabes in Galaad

9

^* geuonden ende inden tijt doen si in Silo waren so en isser niemant van hen daer geuonden)

* Ten is niet int heb

10

Doen sandt die gemeynte ^* thien duysent derwaerts van strijtbaeren mannen, ⁺ ende gheboden hen ende spraken Gaet henen, ende slaet metter scharpten des zwaerts die borghers tot Iabes in Galaad, met wijf ende kinderen,

* the. twaelf.

+ C

11

ende dit is dat ghi doen sult moeten. Al wat ⁺ manlic is, ende alle wiuen die eenen man bekent hebben slaet doot. Maer die maechden suldy behouden.

+ Num. xxxi.

12

Ende si vonden by die borgers tot Iabes in Galaad vier hondert deernen die maechden waren, ende gheen mans bedde bekenden, die brachten si inden leghere tot Silo die daer leyt inden lande Canaan.

13

Ende si sonden boden tot den kinderen BenIamin die in die steenroetse Remmon waren, ende geboden hen dat sise in vrede ontfangen souden.

14

Ende die kinderen Ben Iamin quamen in dien tijt, ende hen zijn huysurouwen gegeuen vanden dochteren van Iabes Galaad, ende en vonden gheen meer also, die si inder seluer manieren geuen mochten.

15

Doen hadde dat volc seer groten rouwe ouer Beniamin, ende toonden groote droefheyt, ende bewesen berou ouer den dootslach van eenen geheelen ghe-[kolom]slachte van Israel.

16

Ende die ouders der gemeynten spraken, wat sullen wi doen den anderen die gheen wiuen ghenomen en hebben? Want die wiuen in BenIamin zijn vernielt.

17

Ende met groter sorghe ende neersticheyt staet ons te sorghen ende voorsien datter niet en vergae een heele gheslachte ende wt ghedaen en worde van Israel,

18

ende wi en moeghen hen onse dochteren niet tot wiuen gheuen. Want wi zijn met eenen eet verbonden, ende met een vermaledijnge, also wi seyden, vermaledijt si hi die den Beniamiten een wijf geeft van sinen dochteren.

19

^* Ende si namen raet) ende seyden. Siet daer is een Israelijtsce feeste des HEREN tot Silo die noortwaerts leet ^* aen die side der stede Bethel) aen die oost side des weechs die gaet tot Sichem, ⁺ ende int zuyden totter stadt Lebbona.

* ten is nyet int heb

* th. des huis gods

+ D

20

Ende si geboden den kinderen BenIamin, ende spraken. Gaet henen ende schuylt verborghen inden wijnghaerden,

21

als ghi dan siet dat die dochteren van Silo wt nader gewoonten totten danse ghaen, so vaert terstont onuersienlic wt den wijnghaerden, ende elck neme hem een wijf vanden dochteren Silo ende gaet henen int lant BenIamin.

22

Maer als haere vaders ende broeders comen om teghen ons ouer v te claghen, so sullen wij tot hen seggen. Sijt hen ontfermhertich, want si en hebbense niet genomen met strijdt, recht oft als die verwonnen hebben, maer ghi en gaeftse hen niet ^* al baden si v dat sise nemen mochten) ende tis uwe schult.

* ten is nyet int heb.

23

Die kinderen BenIamin deden also hen beuolen was, ende namen vrouwen na haeren ghetal vanden ghenen dier dansten, ende trocken wech, ende woonden in haeren erfdeele, ende timmerden steden, ende woonden daer inne.

24

Die kinderen van Israel reysden oock van daer wederom, elc in sinen stamme, ende in sinen gheslachte, ende trock van daer in zijn wooninge. In dien tijt was gheen coninck in Israel, ende elck dede dat hem recht dochte.

§ Eynde des boecs der Rechteren.