De Vorsterman Bijbel

§ Dat .xviij. Capittel.

1

⁺IN die tijt en was gheen coninc in Israel Ende dat gheslachte der Daniten sochte hem een erfdeel, daer si mochten woonen, Want dat gheslachte en hadde op dien dach noch gheen ^* lot) ontfaen onder die geslachten van Israel.

+ A

* theb. erue.

2

Ende die kinderen Dan sonden wt haeren gheslachte vijf hooftluyden strijtbaer mannen, van Saraa ende Esthaol om dat lant te bespieden, ende naerstelijcken te bemercken. Ende seyden tot hen. Reyst henen ende bespiet dat landt. Ende als si quamen op dat gheberchte Ephraim, ende gheghaen waren in dat huys Miche, ende bleuen ouer nacht aldaer

3

^* Ende si kenden) die stemme des knechts des Leuiten, ende si weeken in zijn herberge, ende spraken tot [kolom] hem. Wie heeft v hier gebracht? Wat maect ghi hier? ende om wat sake hebdi hier willen comen?

* th. ende de wile dat si by dat gesin micha waren kenden sy.

4

Hi antwoorde hen. Dit ende dat heeft mi Michas ghegeuen, ende heuet mi ghehuert om loon, dat ick zijn priester soude zijn,

5

Ende si baden hem, dat hi den HEERE raedt vraghen soude, op dat si souden moghen weten, ofte si een voorspoedighe reyse deden.

6

Die priester antwoorde hen, Reyst henen met vreden, God aenmercket uwen wech met ghelucke, ende die reyse die ghi doet.

7

⁺Doen ghinghen die vijf mannen wech, ende quamen tot Lais, ende saghen volck, dat daer in was, woonen sonder eenighe sorghe, op die maniere also die van Sidonien stille ende vry, ende daer en was gheen ^* die hen teghen stoot dede, ende van grooten rijcdommen) ende waren verre vanden Zidonien, ende van allen luyden af gescheiden

+ B

* h. heerscap inden lande diese wederstont.

8

Ende si quamen wederomme tot haeren broederen tot Saraa ende Esthaol, ende als si hen vraechden, wat si ghedaen hadden? soo antwoorden si.

9

⁺Staet op, laet ons tot hen op reysen, want wi hebben dat lant besien, dat is seer goet, ende vruchtbaer. Daeromme haest v ende en zijt niet luyde, laet ons reysen om dat landt in te nemen. Daer en sal ghenen arbeyt zijn

+ C

10

Wi sullen incomen tot een volc dat sonder sorghe is, in een breede lantdouwe, ende die HEERE sal ons gheuen die plaetse, daer niet en ghebreect van alle dat opter aerden wtspruyt.

11

⁺Doen trocken van daer wt dat geslachte Dan van Saraa ende Esthaol ses hondert mannen gewapent, reede gemaect met haeren wapenen totten strijdt,

+ D

12

ende trocken op, ende opclimmende bleuen si liggende met haeren heyrleger tot Kariath Iearim in Iuda. Daer af heeft die plaetse den naem. Den legher Dan tot op desen dach, ende is achter den rugge Kariath Iarim.

13

Ende van daer gingen si opt geberchte Ephraim, ende als si quamen totten huyse Miche.

14

Doen seyden die vijf mannen die te voren gesonden waren dat lant Lais te bespieden tot haer broeders. Weet ghi ooc dat in desen huyse eenen lijfrock, goden ghesneden ende gegoten beelden zijn? Besiet wat v behaecht.

15

⁺Si weken derwaerts ende quamen aen dat huys des knechts des Leuiten dye in Michas huys was, ende groeteden hem vriendelijc met vredeliken woorden,

+ E

16

Maer die ses hondert mannen so si gewapent waren stonden voor

[p. p6v]

die duere

17

^* Maer die ghene die int ionghelincs huys ghecomen waren, arbeiden om wech te nemen dat gesneden afgodken) ende den priesterlijcken lijfrock, ende den ghegoten afgod. Die wijle stont die priester voor die poorte ende die ses hondert ghewapende met haeren harnas ^* ende stonden niet verre van daer, verwachtende)

* th. ende de .v. mannen die om tlant te bespieden wt getrocken waren gingen ende quamen, ende namen dat beelt.

* ten is nyet int hebr.

18

Die ghene die int huys Micha gecomen waren, namen doen dat beelt, den lijfroc, ende die ghegoten goden. Doen sprac die priester tot hen. Wat maect ghi?

19

Si antwoorden hem. Swijcht, ende houdt den vingher op den mont, ende trect met ons dat ghi onse vader ende priester zijt. Wat is v beter dat ghi in eens mans huys priester zijt? oft onder een geheel stamme ende gheslachte in Israel?

20

^* Als hy dat hoorde, so heeft hi gehoorsaem ende te vreden geweest met haeren redenen, ende nam wech) beide den lijfroc, die goden ende dbeelt, ende reysde met dat volc,

* th. des priesters herte was vro ende hi nam

21

ende doen si henen reysden, sonden si die kinderkens ende dat vee, ende al wat si costelijcs hadden voor hen wech.

22

⁺Doen si nv verre van Michas huys quamen, so riepen die mannen die inden huysen waren by Michas huys, ende volchden den kinderen Dan na ende begonsten te roepen achter haeren rugge.

+ F

23

Maer si keerden haer aensicht om ende spraken tot Micha. Wat is v dat ghi alsulcken gecrijsch maect?

24

Hi antwoorde. Ghi hebt mijn goden genomen, die ic gemaect hadde, ende den priester, ende al wat ic hebbe? ende ghi segt noch tot mi, wat is v?

25

Maer die kinderen Dan spraken tot hem. Wacht v dat ghi voort aen niet en spreect tot ons, op dat tot v niet en comen mannen van toornigen moede, ende dat ghi ende alle uwe huysghesinne niet en vergaet.

26

Also gingen die kinderen Dan haers weechs Ende doen Micha sach dat si hem te sterck waren, keerde hi hem ende quam weder tot sinen huyse.

27

Maer ^* die ses hondert mannen namen met hen den priester ende die dingen dye wi bouen ghenoemt hebben) ende quamen tot Lais aen een volc dat stille ende sonder sorghe was, ende sloegense metter scarpten des swerts ende verbernden die stadt metten viere,

* th. si namen dat Micha ghemaeckt hadde

28

ende daer en was niemant diese verloste, want si lach verre van ^* Sidon) ende en hadden metten ⁺ vremden menscen gheen geselscap ^* ofte comenscappe, die stadt lach int lantscap Roab) Toen timmerden si die stat wederom, ende woonden daer in,

* the. Zidon

+ G

* the. ende si laghen int dal aen Beth Rehob ghelegen

29

ende noemdense Dan, na den name haers vaders Dan, die Israel voortgebracht hadde, ende die stat hiet voortijts Lais,

30

Ende die kinderen Dan rechten dat beelt voor hen op, ende Ionathan die sone Gerso-[kolom]ni des soons ^* Moysi) ende zijn sonen waren priesters, onder den geslachte der Daniten, totter tijt toe dat si wten lande geuangen gheleyt werden.

* th. Manasse.

31

Ende die afgod Miche ^*) bleef by hen alle den tijt, dat dat huys gods in Silo bleef. In die tijt en was gheen Coninck in Israel.

* th. die hi gemaect had.

§ Vanden Leuite, wiens vrouwe in Gabaad door welluste misbruyct wert, den gheheelen nacht, die welcke des morghens opten dorpel des huys doot lach.