De Vorsterman Bijbel

§ Dat .xix. Capittel.

1

⁺HEt was een man vanden geslachte Leui, woonende aen die side des geberchs Ephraim, ende hadde een ^* wijf) ghenomen van Bethlehem Iuda

+ A

* th. bislaperse

2

^*, Ende si verliet hem ende keerde wederom) tot haers vaders huyse tot Bethlehem Iuda, ende was daer vier maenden lanc.

* th. ende doen si hadde neuen hem gehoreert liepsi van hem.

3

Ende haer man volchde haer na, dat hi vriendeliken met haer soude spreken, ende haer weder tot hem halen, ende hadde eenen knape, ende ooc een paer ezelen ouer wech die met hem ghingen. Ende si ontfinc hem, ende si leyde hem ooc in haers vaders huys. Maer doen zijns huysurouwen vader ^* dat hoorde ende) hem sach, so wert hi vrolic hem teghen ghaende, ende ontfinc hem vriendelijcken,

* ten is nyet int hebre.

4

ende der dochter man bleef in zijn zweers huys drie daghen etende ende drinckende ^* gemeynsameliken)

* th. ende bleuen des nachts daer.

5

Des vierden daechs stont hi des ^* nachtes vroech op, ende wilde reysen. Doen hielt hem zijn zweer ende seyde tot hem. ⁺ Laeft dijn herte eerst met een beete broots, daer na suldy reysen,

* th. morgens

+ B

6

ende si saten ende aten beyde met malcanderen ende droncken.

Doen sprack der deernen vader tot ^* sinen zwagher). Ic bidde v, blijft huyden hier, dat wi tsamen vrolic moghen zijn.

* th. den. man

7

Maer die man stont op ende woude reysen. Maer die zweer zijns wijfs vader, benoodichde hem seer, ende dede dat hy ouer nacht daer bij hem bleef.

8

Des morghens ^* so bereyde hem die Leuite) om te reysen.

Doen sprac wederomme der deernen vader. Ick bidde v dat ghi een weynich spijsen neemt, ende laet ons vertoeuen tot dat den dach claerder licht, ende reyst dan. Ende also aten si beyde met malcanderen.

* th. ten vijfsten dage stont hi op. i.regum. xi.

9

Ende die ^* ionghelinc) stont op, ende wilde reysen met zijnder ^* huysurouwen), ende met sinen knape. ⁺ Maer zijn sweer der deernen vader sprac wederomme tot hem. Siet, den dach laet af, ende het naeckt den auont, blijft noch huyden by my, ende maeckt inden blijden dach ghoede chiere. Morghen

* the. Man.

* th. bislaperse.

+ C

[p. p7r]

sult ghi reysen om tot huys te gaen

10

^* zijn swagher) en wilde zijn woorden niet volbrengen, maer hi is terstont gereyst ende gecomen tegen Iebus ^* die metten anderen name ghenoemt wert) Ierusalem, ende leyde een paer ezels geladen, ende zijn bislapersse met hem.

* th. die man

* th. dat is.

11

⁺Doen si voor Iebus quamen, so viel den dach seer heenen, ende die knape sprack tot sinen heere. Ick bidde v coemt doch ende laet ons in dese stadt der Iebusiten wijcken, ende ouer nacht daer inne bliuen.

+ D

12

Maer zijn heere sprack tot hem. Ick en sal in die stadt des vremden volcs niet wijken, die vanden kinderen van Israel niet en zijn.

Maer ick sal voor by gaen tot Gabaa

13

^* ende als ic daer come, so sullen wi daer in bliuen) oft in dye stede Rama.

* th. ende hy sprac tot sinen knecht, ghaet dat wij daer mogen comen ende te nacht tot Gibea bliuen.

14

Ende si reysden voor by Iebus, ende ghinghen den wech dyen si beghonst hadden, ende die sonne ghinc onder, recht by Gabaa, dat daer leyt onder BenIamin,

15

ende si weken derwaerts, dat si daer inne souden bliuen. Doen si daer inne quamen, so saten si inder stadt straten, want daer en was niemant diese dien nacht herberghen wilde.

16

⁺Ende siet, doen quam een out man van sinen arbeyt vanden velde tsauonts, ende hy was ooc vanden geberchte Ephraim, ende woonde als een vremdelinc in Gabaa. Maer die luyden van dier plaetsen waren kinderen Iemini,

+ E

17

ende doen hi zijn oogen op hief ende sach den ^* man sitten met sinen paxkens) opter straten, sprac hi tot hem. Waer wilt ghi henen, ende van waer coemt ghi?

* the. den gast

18

Hi antwoorde hem. Wij reysen van Bethlehem Iuda, tot dat wi comen aen die side des geberchs Ephraim, van daer aen ben ic tot Bethlehem Iuda gereyst ende reyse nv totten huyse des HEEREN, ende niemant en wil mi onder zijn dack ontfanghen.

19

Wi hebben stroo ende voeder voor onsen ezelen, ende broot ende wijn voor mi ende mine dienstdeerne, ende voor den knape die met mi is, also dat ons niet en gebreect ^* dan een herberghe.

* ten is nyet int heb

20

⁺Die oude man antwoorde hem, vrede si met v, wat v ghebreect dat sal ic v gheuen, alleene begheere ick, en blijft slechts ouernacht niet opter straten.

+ F

21

Ende hi leyde hem in zijn huys, ende ghaf den ezelen voedere, ende als si haer voeten ghewasschen hadden ^* ontfinc hise te ghaste in sine maeltijt,

* the. aten ende si droncken Ende doense haer herte stercten

22

Ende te wijle dat si aten, ende nader reysen arbeyt, haeren lichamen met spise ende dranc vermaecten, doen quamen die luyden der stadt, die kinderen Belial ^* dat is sonder ioc) ende omsetten dat huys des ouden mans, [kolom] ende clopten aen die duere, ende riepen totten huyswaert. Brenghet den man buyten die in uwen huyse is ghecomen, dat wi hem ^* misbruycken)

* ten is nyet int hebr

* th. bekennen.

23

Maer die oude man ghinck tot hen wt ende sprac tot hen. Mijne broeders, en wilt dit quaet niet doen, want die mensche is ghecomen in mijn huys logeren, ende hout op van sulcke sotheit,

24

ic hebbe een dochter, noch een maeghet, ende dese een bislapersse, dye sal ick v daer buyten brenghen, dat ghise vernedert, ende volbrengt met hen ^* uwe wellusticheyt.

Ick bidde v alleen dit, dat ghi die groote sonde teghen natuere met een mans persone niet en bedrijft).

* th. wat v belieft, maer met desen man en doet sulke dwaesheit niet

25

Si en wilden niet te vreden wesen met sinen redenen. Als die man dit sach, so leyde hi zijn bislapersse wt tot hen, ^* ende leuerdese om te bespotten) Als sise den gehelen nacht mishandelt hadden, lieten sise tsmorghens vroech gaen.

* ten is nyet int heb.

26

⁺Doen quam dat wijf recht als die duysternisse wech ginc, ende viel voor dye duere, aen die duere ^* des huys) daer haer here in was

+ G

* th. des huis des mans.

27

^* Ende alst nv licht wert) doen stont haer here tsmorgens op, ende dede die duere open aen dat huys, dat hi zijns weechs soude reysen. Siet, doen lach zijn bislaperse voor die duere des huys, ende haer handen opten dorpel.

* the. ende lach daer tot dat licht wert.

28

Hi sprac tot haer ^* meynende dat si ruste) Staet op, laet ons reysen. Maer si en antwoorde niet, ^* doen mercte hi dat si doot was) Doen nam hise op sinen ezel ende is wederom in zijn huys ghereyst.

* ten is nyet int heb.

* ten is nyet int hebr.

29

Als hi thuys quam, so nam hi een zwaert ende greep dat doode lichaem ^* van zijnder huysurouwen) met beenen ende al, ende hieuwen dat in twaelf stucken, ende seyndese in alle die palen van Israel.

* th. zijn bislapersen.

30

Wie dat aldusdanighen leelicheit saghen, riepen altesamen. Sulc dinc en is niet gheschiet ^*) in Israel, sint der tijt, dat ^* onse vaders) wt den lande van Egipten ghereyst zijn, tot op desen dach. Gheeft een vonnisse ende ondersceyt int ghemeyne wat v te doene staet.

* th. noch gesien

* th. die kinderen van israel

§ Hoe al dat volck van Israel teghen BenIamin street, om der bislaperssen wille des leuijts, die welcke doorder Gabioniten ouerdadige oncuysheit vermoort wert, Ende hoe die kinderen van Israel eenmael ende ten anderen mael verwonnen werden, nochtans ten derden male verwint tvolc van Israel dat geslachte BenIamin, Ende daer en bleuen maer ses hondert mannen ouer, want daer werdender twee duysent, ende vijfhondert verslaghen.