De Vorsterman Bijbel

§ Dat .xvi. Capittel.

1

⁺ENde ^* hi) ginck ooc tot Gasa ende sach aldaer een vrouwe die gemeyn was, ende is tot haer ingegaen.

+ A

* the. simson

2

Als die Philistinen dat gehoort hadden, ende dat rumoer ouerluyt ginc, dat Samson inder stadt gecomen was, so omringdensi hem, ende leiden bewaerders inder stadt poorten. ende waren den heelen nacht wakende, op dat als den morgenstont gecomen ware, dat si hem dooden souden.

3

Samson sliep totter midder nacht, ende greep beide die dueren aen der stadt poorte met beyden posten, ende hiefse wt met een grendele, ende settese op zijn scouderen, ende droechse op dye hoochte des berchs, dye voor Hebron leet

4

⁺Daer na creech hi een wijf lief die woonde aen die ^* valleye) Sorec, wiens naem was [kolom] Dalila,

+ B

* thebr. beke

5

tot dier quamen der Philistinen ouersten op, ende seyden. Bedriecht hem, ende onderuraghende leert ende besiet waer inne dat hi sulcke groote cracht heeft, ende hoe wi zijns machtich moghen worden, ende hem verwinnen, ende als hi gebonden is quellen, ende wi sullen v geuen elc duysent ende honeert silueren penninghen.

6

⁺Ende Dalila sprack tot Samson, Ic bidde v, segghet my, waer inne dat v groote machte si, ende waer mede men v binden mach? ^* dat ghi dan niet wt en kont ghecomen)

+ C

* th. datmen v dwinge

7

Samson antwoorde haer. Waert datmen mi bonde met seuen versche zelen ^* van zeenuen ghemaect) die noch niet verdorret en zijn, so soude ic onsterc worden, ende als een ander mensche zijn.

* ten is nyet int heb.

8

Doen brachten der Philistinen ouersten tot haer op, seuen versche zeelen, die noch niet verdorret en waren ende si bant hem daer mede,

9

maer men leyde hem laghen bi haer inder cameren, ende si sprac tot hem. Die Philistinen ouer v Samson. Hi brac die zeelen ghelijck als eenen met speecsele gesponnen draet breect, als hi die hitte des viers riect, ⁺ ende ten is niet bekent gheweest, waer inne dat zijn groote cracht ware.

+ D

10

Doen sprac Dalila tot Samson. Siet ghi hebt mi bedroghen ende mi gheloghen Nv so segt mi doch, waer mede mach men v binden?

11

Hi antwoorde haer. Waert dat si mi bonden met nieuwen stricken, daer noyt genen arbeyt mede gheschiet en is, so worde ick onsterc ende anderen menschen ghelijc.

12

Doen nam Dalila nieuwe stricken ende bant hem daer mede ende seyde, die Philistinen ouer v Samson. Maer men leyde lagen op hem inder cameren, ende hi tracse van sinen armen ^* als eenen draet van eenen weefwebbe)

* th. gelijc een snoere

13

Dalila sprac wederom tot hem Hoe lange bedriechdi mi, ende spreect logentale, thoont mi doch waer mede ghy moet ghebonden zijn? Hi antwoorde haer. Waert dat ghy seuen locken mijns hoofts vlochtet in eenen vlechtbant die hierrontsomme gebonden is, ende vestichdese met eenen naghel, so sal ic onsterc zijn.

14

Si dede so, ende sprac tot hem, die philistinen ouer v samson Hi ontwaecte van sinen slaep ende troc die gheulochten locken met naghel ende vlechtbanden wt.

15

Doen sprac Dalila tot hem. Hoe cont ghi geseggen dat, dat ghi mi lief hebt, so uwe herte doch niet met mi en is? driemael hebdi mi gelogen, ende mi niet geseit, waer in v grote cracht si.

16

Als si hem lastich viel, ende alle dage met haeren woorden quelde, ende en liet hem geen tijt om te rusten, so wert zijn siele mat totter doot toe

[p. p5v]

vermoeyt,

17

^* Doen ontdede hi die waerheit vander sake) ende sprac tot haer. Daer en is noyt gheen scheermesse op mijn hooft gecomen, want ic ben een Nazareus ^* dat is ghewijt) Gode van mijns moeders lijf aen. Waert dat mijn hooft gescoren waer, so soude mijn cracht van mi wijcken, dat ic onsterc werde ende gelijc als alle andere menschen.

* th. ende seyde haer alle zijn herte

* th. Nazir ten is nyet int heb.

18

Doen Dalila sach dat hi haer alle zijn herte gheopenbaert hadde, so seynde si ende dede der Philistinen ouerste roepen ende segghen. Coemt noch eens hier op, want hi heeft mi alle zijn herte gheopenbaert.

[afbeelding]

Doen quamen der Philistinen vorsten op ^*) ende brachten dat gelt met hen in haerder hant

* th. tot haer

19

⁺Ende si liet hem slapen op haeren schoot ^* ende dede zijn hooft rusten op haer knien) ende riep eenen barbier ende schoer hem af die seuen vlechten zijn hoofts, ende si begonst hem ^* wech te stooten ende te veriagen). Doen was terstont zijn cracht van hem geweken,

+ E

* ten is nyet int heb

* th. te dwinghen.

20

ende si sprac tot hem. Die Philistinen ouer v Samson. Doen hi van sinen slape ontwaecte, so dacht hi in sinen moet. Ick sal gaen wt, so ic dicwils te voren gedaen hebbe, ende salder mi door vechten. Ende en wiste niet dat die HEERE van hem gheweken was.

21

Als die Philistinen hem gegrepen ende aen getast hadden, staken si zijn oogen wt, ende leyden hem af tot Gasa, ghebonden met boeyen, ende deden hem in die gheuangenisse, daer hi in gesloten was malen.

22

Als nv dat haer zijns hoofts begonst weder te wassen daert af gheschoren was,

23

So quamen der Philistinen vorsten ende vergaderden hen om haer luyden God Dagon eenen grooten offer te doen, ende te verbliden in maeltijden, so seyden si. ⁺ Onse God heeft ons onsen viandt Samson in onsen handen ghegheuen,

+ F

24

Des ghelijcs als hem dat volc sach, loefden si haeren God, ende si seyden, Onse God heeft onsen viandt in onse handen ghegheuen, die ons onse landt bedorf, ende onser vele versloech,

25

Doen ^* si inder maeltijden verblijdt waren ende brasten), [kolom] so geboden si Samson te halen, dat hi voor hen luyden soude spelen. Doen haelden si Samson wt die gheuangenisse, ende hi speelde voor hen, Ende si stelden hem tusschen twee calomnen.

* th. haer luyden herte vrolic was.

26

Samson sprac totten knechte die hem by der hant leyde. Laet mi dat ic die calomnen aen taste, op die welcke dat huys staet, dat icker aen lene, ende een weynich ruste.

27

Dat huys was vol van mannen ende vrouwen. Ende der Philistinen vorsten waren oock alle daer, ende op dat dack ende solder by drie duysent mannen ende vrouwen, dye aensagen hoe Samson speelde,

28

Maer hi riep den HEERE aen, ende seyde, HEERE God gedenct mijns, ende gheeft mi mijn stercheit wederomme, mijn God, op desen tijt, op dat ic mi voor mijn beide oogen eens wrake mach ontfanghen. ^*)

* th. aen dye philistinen

29

⁺Ende hi greep die twee middelste calomnen, op die welcke dat huys gheset was, ende daer op dat hem hielt, deene in zijn rechte hant, die ander in zijn slincker hant,

+ G

30

ende sprac. Mijn siele sterue metten Philistinen ^* Ende als hi die calumnen sterckelijcken tegen malcanderen ontstucken smeet) so viel dat huys op die vorsten, ende die menichte des volcs, ende hi doodender meer steruende, dan hi binnen sinen leuen ghedoot hadde.

* th. ende neichde hem traechlijc

31

Doen quamen zijn broeders neder, ende alle zijns vaders huys, ende namen zijn lichaem, ende droeghen hem opwaerts, ende begroeuen hem in zijns vaders Manue graf tusschen Saraa ende Esthaol. Hi oordeelde Israel twintich iaer.

§ Van Micha ende sinen afgod, ende datter in dien tiden geen coninc en was in Israel, ende een yegelijck dat hem recht dochte wesen dede hi, ende vanden iongelinc van Bethlehem Iuda, ende van sinen priester.