De Vorsterman Bijbel

§ Dat .xv. Capittel.

1

⁺HEt gheuiel na sommighe daghen, omtrent dat der tarwen oost nakende was ende Samson quam, ende wilde zijn wijf besoecken, ende brocht met hem een ionge geyten bocxken, ende als hi nader gewoonten in haer slaepcamer wilde ghaen, verboot hem haer vader, segghende,

+ A

2

ic meyndet dat ghise gehaet haddet, ende hebse uwen vrient gegeuen, Maer si heeft een ionge sustere, die is fijnder ende schoonder dan si, die laet dijn zijn voor dese,

3

Doen antwoorde Samson tot hem, Van desen dage voort aen en sal gheen schult zijn in my, teghens die Philistinen, want ick sal v quaet ende leet doen.

4

⁺Ende Samson ghinc henen, ende vinc drie hondert vossen, ende nam branden, ende bant den eenen steert aenden anderen, ende dede eenen brant tusschen twee steerten,

+ B

5

ende stacse aen met vier, ende lietse dat si hier ende daer loopen souden, ende si liepen terstont onder dat coren der Philistinen, ende stack alsoo aen dat byeen gedragen was, metten staenden coren, ende wijnberghen ende olijfboomen, al brandende ende die vlamme verteerdet al,

6

Doen seyden die Philistinen, Wie heeft dat ghedaen? Men seyde, Samson der dochter man des Thamniters, om dat hy hem zijn wijf ghenomen heuet, ende sinen vrient gegeuen, Doen trocken die Philistinen op, ende verbranden die vrouwe met haeren vader met vier.

7

Samson sprac tot hen, Ic laet v dat doen, maer ic sal my aen v seluen wreken, ende dan op houden,

8

Ende sloechse hardelijc ^* met een groote plage, dat si soo verbaest waren, dat si huer braeyen op haer dgien leyden) ende troc af, ende woonde in dat steenhol tot Etam.

* th. aen scouderen ende lendenen.

9

Doen trocken die Philistinen op tegen Iuda, ende sloegen haer tenten neder, ende maecten haeren leger ter plaetse Lechi ^* namaels so genoemt dat is, een kinnebacken, ende daer is haere heyr verspreyt)

* ten is nyet int heb.

10

Maer die van Iuda spraken, Waerom zijt ghi teghen ons op ghetrocken? Si antwoorden, Wi zijn op gecomen om Samson te bijnden, dat wi hem souden betalen, so hy ons gedaen heeft,

11

Doen trocken drie duysent mannen van Iuda af, in dat steen hol tot Etam, ende spraken tot Samson, En weet ghi niet, dat dye Philistinen ouer ons heerschappie hebben? Waerom hebdi dat dan willen doen? Hi sprac tot hen, So si mi gedaen hebben, so heb ic hen weder gedaen.

12

Si spraken tot hem, Wi zijn af gecomen om v te binden, ende inder Philistinen handen te leueren. ⁺ Samson sprac tot hen,

+ C

[p. p5r]

So zweret mi dan ende ghelouet, dat ghi my niet ^* dooden) en sult.

* the. weren

13

Si antwoorden hem. Wij en sullen v niet ^* dooden) maer wi sullen v gebonden leueren ^*) Ende si bonden hem met .ij. nieuwe stricken ende leyden hem op vanden steen.

* the. weren

* th. ende nyet dooden

14

Ende doen quam hi tot Lechi ^* die plaetse der kinnebacken) ende die Philistinen crijschende riepen, so viel die geest des HEEEEN ouer hem, ende die stricken aen sinen armen werden als draden die dat vier versenget heeft, also dat die banden aen zijn handen, bedoruen ende ontbonden.

* ten is nyet int hebr

15

Ende hi vant een ezels kinnebacken, doen stack hi zijn hant wt, ende nam dat, ende sloech daer duysent mannen mede.

16

Ende ^* hi) sprac. Door een ezels kinnebacken, ⁺ ende met ^* die bactanden van een vuelen des ezelinnen heb icse wtgeueecht, ende ic hebbe duysent mannen geslaghen)

* the. simson

+ D

* the. eens ezels kinnebacken heb ic duysent mannen geslaghen

17

Ende doen hi dat gesproken hadde, so werp hi dat kinnebacken wt zijnder hant, ende hi hiet die stat Ramathlechi, ^* dat beduyt wort die verheffinge der kinnebacken.

* ten is nyet int hebreu. § Ramatlechi, heet een op heffen des kinnebackens.

18

Als hem seer dorstede, so riep hi den HEERE aen ende sprack. Ghi hebt dese groote salicheit ghegheuen door die hant dijns knechts, maer siet, nv moet ic van dorste steruen, ende ic sal inder onbesnedenen handen vallen.

19

Doen dede God open eenen kinnebacs tandt inden kinnebacken, also datter water wtginc, ende als hi dat gedroncken hadde ^* vercoelde sinen gheest) ende hi ontfinck crachte. Daer om heet si noch huyden te daghe, die fonteyne vander kinnebacken des aenroepers.

* th. quam sinen gheest weder

20

Ende hi oordeelde Israel inder tijt der Philistinen twintich iaer.

§ Hoe Samson beide die dueren vander poorten vander stadt Gaza opten berch droech, ende wert bedroghen van Dalila, ende wert geblint, ende wert van sinen vianden bespot, ende hoe hi sterf.