De Vorsterman Bijbel

§ Dat .xi. Capittel.

1

⁺IEphte een Galaaditer was, in dyen tijden een strijtbaer camper, maer eender lichter vrouwen sone, die geboren was van Galaad,

+ A

2

Maer Galaad had een huysurou van die welcke hi kinderen ghecreghen heeft, die welcke na dat si gewassen waren werpen Iephthe wt, seggende tot hem, Ghi en moecht in ons vaders huys niet erfghenaem zijn, want ghi zijt ^* van een moeder in ouerspel geboren.)

* th. eens anders wijfs sone

3

Doen so vluchte hi voor zijn broeders, ende woonde int lant Thob, ende vergaderde tot hem arme luyden ende roouers, ende si trocken met hem wt, hem nauolgende als haeren prince,

4

In dien dagen streden die kinderen van Amon tegen Israel.

5

Doen si nv soo sterckelic streden, so ghingen die ouders van Galaad henen, om dat si Iephte wten lande Thob souden halen,

6

ende spraken tot hem, Coemt, ende zijt onse ^* prince) ende bestrijdt die kinderen Amon,

* th. hertoge

7

Ende Iephte antwoorde ^* hen) En zijt ghi niet die mi haet ende hebt mi wt mijns vaders huys gestooten, ende nv coemt ghi tot mi als ghi inden noot gedwongen zijt?

* the. den ouders van gilead

8

Dye ouders van Galaad spraken tot Iephte, Daer om comen wy nv om dese sake tot v, dat ghi met ons sout ghaen ende strijden teghen die kinderen Amon, ende dat ghi onse ^* hertoge) sout zijn ouer al die in Galaad woonen,

* the. hooft

9

Ende Iephte sprac tot hen, Ist dat ghi waerlijc tot mi zijt gecomen om dat ic voor v soude striden tegen de kinderen van Amon, ende geeftse die HERE in mijn handen, sal ic dan v ouerste zijn?

[p. p3r]

10

die antwoorden hem, Dye HEERE die dit hoort, die is een middelaer ende een getuyghe tusschen ons, dat wi onse ghelofte volbrenghen sullen,

11

Aldus ghinck Iephthe metten ouders van ^* Galaad) ende dat volck sette hem tot eenen ^* prince) ouer hen, Ende Iephte sprac alle zijn woorden voor den HEERE in Masphe.

* th. Gilead

* th. hertoge ende hooft

12

Doen sant Iephte bootschappe totten Coninck der kinderen van Amon, die van sinen persoon weghen soude seggen. Wat hebdi met mi te doen, dat ghi teghen mi coemt, om mijn lant te verderuen?

13

Die Coninc der kinderen Amon antwoorde den boden Iephte, Daerom dat Israel mijn lant genomen heeft, doen si wt Egypten reysden, van Arnon aen tot Iabock toe, ende tot aen dye Iordane, nv gheuet mi met vreden weder.

14

Iephte sant noch ^* die selue) boden totten Coninc der kinderen Amon, ⁺ ende gheboot hen, dat si seggen souden,

* the. meer

+ C

15

Aldus seyt Iephte, Israel en heeft gheen lant in ghenomen van den Moabiten, noch vanden kinderen Amon,

16

want doen si wt Egypten reysden, wandelde Israhel door die woestijne tot aen die roode zee, ende quam tot Kades,

17

ende sant boden totten Coninck der Edomiten, ende sprack, Laet mi door v lant reysen, Maer der Edomiten Coninc en woude haer ghebeden niet verhooren, Ooc sonden si totten Coninc der Moabiten, dye en wilde oock nyet passagie gheuen, Alsoo bleef Israhel in Kades,

18

ende wandelde inder woestinen, ende om trocken dat lant der Edomiten, ende Moabiten, ende quam in die oost side vander Moabiten lant ende legeerden hen ouer gene side van Arnon, ende en woude niet comen in die palen der Moabiten, Want Arnon is der Moabiten pale.

19

Ende Israhel sant boden tot ^* Seon) der Amoriten Coninc, ⁺ tot Hesebon, ende dede hem segghen, Laet ons door v lant trecken tot aen ^* die riuiere)

* the. Sihon

+ D

* the. mijn plaetse.

20

Mer Seon versmade die woorden van Israel, ende en lietse niet door sine palen trecken, maer hi verghaderde alle zijn ^* ontellijck) volck, ende is tegen hen wtgegaen in ^* Gasa, ende wederstont hen sterckelic)

* ten is nyet int heb

* the. Iahza, ende street met Israel

21

Maer die HERE die Godt van Israel gaf ^* dien) met alle sinen volcke in die hant Israel, also dat sise sloegen, Aldus nam Israel alletlant der Amoriten in, die inden seluen lande woonden,

* th. Sihon.

22

Ende namen alle die palen der Amoriten in, van Arnon aen, tot aen Iabock, ende vander woestinen aen, tot aen die Iordane.

23

⁺Dus heeft dan die HEERE die God van Israel die Amoriten verdreuen. ^* Doen zijn volc van Israel daer teghen street) ende nv wilt ghi [kolom] besitten zijn lant

+ E

* thebr. voor zijn volck van Israel

24

^* En hooret v niet met recht toe, dat Chamos v god beseten heeft) Maer dat onse Godt als een verwinder ^* beseten heuet) sal wijcken tot onser besittinghe,

* th. ghi sult die besitten, die Camos uwe Godt verdreuen heeft.

* the. verdreuen heeft

25

Ten si dat ghi ^* misschien beter zijt) dan Balach Zephor sone, die coninc van Moab? oft ghi moet bewisen dat hi tegen ^* hem) gepleyt heeft ende tegens hem gheuochten,

* the. beter recht hebt.

* the. Israel.

26

te wile dat hi woonde in Ezebon, ende in zijn plaetsen, ende in Aroer, ende in sine wooningen, ende in alle die steden die aen Arnon liggen, tot ouer drie hondert iaeren? Waeromme en hebdi niet begonst in soo langhen tijden teghen Israel op dese versoeckinge om wederom te eysschen?

27

Hier om so en heb ic teghens v niet ghesondicht, maer ghi doet qualijck aen mi, dat ghi tegen my strijdet, Dye HERE gheue huyden een oordeel tusschen Israel, ende den kinderen Amon,

28

Maer die Coninc der kinderen Amon en wilde niet verhooren die reden Iephte, die hi tot hem sant met sinen boden.

29

⁺Doen quam die gheest des HEREN op Iephte, ende trock door ^* Galaad) ende Manasse, ende door Maspha, dat in ^* Galaad) leydt, ende van daer op die kinderen Amon,

+ F

* th. Gilead

* th. Gilead

30

Ende Iephte geloefde den HEERE een ghelofte, ende sprac, Geeft ghi die kinderen Amon in mijn hant,

31

wat tot mijnder huys dueren eerst wtgaet mi te gemoete, als ick met vrede weder come vanden kinderen Amon, dat sal des HEEREN zijn, ende ic salt tot eenen brantoffer offeren.

32

Aldus trock Iephte wt op die kinderen Amon, om tegen hen te strijden, ende die HEERE gafse in sinen handen,

33

ende versloechse van Aroer aen, tot datmen coemt tot Mennith .xx. steden, ende tot aen ^* Abel) die rontsom met wijngaerden beset is, eenen seer groten slach, ende die kinderen Amon werden alsoo verootmoedicht, voor den kinderen van Israel.

* th. pleyn.

34

Doen Iephte quam tot Maspha tot sinen huyse, ⁺ Doen ginc zijn eenige dochter wt, hem te ghemoete, met tamboeren ende reyen, ende si was een eenich kint, ende hi en hadde anders gheen sonen noch dochteren,

+ G

35

Ende doen hise sach, schoorde hi zijn cleederen, ende sprac, Ach wee mi mine dochter, ghi hebt mi ^* bedrogen, ende zijt bedrogen) Want ic hebbe minen mont op gedaen tot den HERE, ende en machs niet weder roepen,

* the. vernedert ende bedroeft

36

Si antwoorde, ende sprac tot hem, Mijn vader hebdi uwen mont open gedaen totten HEERE, soo doet mi also ghi gheloeft hebt, nae dien v die HEERE gewroken heeft, gegheuen van uwen vianden den kindern Amon.

37

Ende si sprac tot haeren vader, verleent mi doch alleene dat ic begere, dat ghi my twee

[p. p3v]

maenden laet, dat ic van hier af ghae op die bergen, ende mijnen magedom beweene, met minen gespelinnen,

38

Hi antwoorde haer, gaet henen, Ende lietse twee maenden gaen, Doen ginc hi henen met haeren gespelinnen, ende beweende haeren maechdom op die berghen,

39

Ende na twee maenden quam si weder tot haeren vader, ende hi dede haer, so hi gelooft hadde, ende si en was noyt eenichs mans schuldich geworden, Ende het wert een ghewoonte in Israel,

40

dat die dochteren van Israel iaerlics gaen, ende beclagen die dochter Iephte, des Galeaditen, des iaers vier daghen.

§ Hoe Iephte teghen Ephraim strijdt, Ende vanden genen die Cheboleth voor Seboleth seyde, Ende van die doot der drie rechteren, die na Iephte waren.