De Vorsterman Bijbel

§ Dat .x. Capittel

1

⁺NA Abimelech stont een ander ^* leytsman) op in Israel, Thola een man van Isachar, ende een sone Phua, Die een broeder was van AbiMelechs vader, ende woonde tot Samir op tgeberchte Ephraim,

+ A

* the. verlosser.

2

ende oordeelde Israel, drientwintich iaer, ende is gestoruen, ende begrauen in Samir,

3

Desen is na geuolcht Iair een Galadite, die in Israhel oordeelde tweentwintich iaer,

4

ende hadde dertich sonen, op dertich ezels vuelens rijdende, ende princen van dertich steden, die hieten, Hauot Iar, tot desen dage toe, ende ligghen in Galaad,

5

Ende Iair sterf, ende wert begrauen te Kamon.

6

Maer die kinderen van Israel, tot haeren ouden sonden nieuwe toedoende hebben quaet gedaen, ⁺ voor dat aengesichte des HEREN, ende dienden Baalim, ende Astharoth, ende den goden van Sirien, ende den goden van Zidon, ende den goden Moab, ende den goden der kinderen Amon, ende den goden der Philistinen, ende verlieten den HERE, ende en dienden hem niet,

+ B

7

Doen verbolch die gramscap des HEREN ouer Israel, ende gafse ouer onder die hant der Philistinen, ende der kinderen Amon,

8

Ende si quelden ende verdructen die kinderen van Israel, achthien iaer lanc, op ghene side der Iordanen, inden lande der Amoriten, dat in Galaad leyt, so seere dat ooc

9

daer toe trocken die kinderen Amon ouer die Iordane, ende streden tegen Iuda, BenIamin, ende teghen dat huys Ephraim, Ende die kinderen van Israhel zijn zeer verlast gheweest.

10

Ende riepen totten HERE, ende seyden, Wi hebben teghen v gesondicht, want wi hebben onsen God gelaten, ende Baalim gedient,

11

Ende die HERE sprac tot hen luyden, En hebben v [kolom] die Egyptinaers ooc niet verdruct, ende die Amoriten, ende die kinderen Amon, die Philistinen

12

ende die Sidoniten, ende Amalechiten, ende ^* Cananiten) ende ic halp v wt haeren handen, doen ghi tot mi riept,

* th. die maoniten

13

nochtans hebt ghi mi verlaten, ende anderen goden ghedient, Daerom en sal ic niet meer toe doen dat ick v verlosse,

14

Ghaet henen, ende roept die goden aen, die ghi vercoren hebt, laet v die helpen inder tijt ws drucs.

15

Ende die kinderen van Israel spraken totten HEERE, Wi hebben gesondicht, doet met ons wat v belieft, alleen verlost ons wt deser tijt,

16

ende dit segghende deden si die afgoden van hen wech, ende dienden den HEERE, ende hi heeft medelijden gehadt ouer haer luyden catiuicheden,

17

Ende die kinderen Amon beriepen hen, ende legheerden hen in Galaad, Maer die kinderen van Israel legherden hen tot Maspha.

18

Ende die ouersten van Galaad, spraken onder malcanderen, Wie begint te strijden teghen die kinderen Amon, dye sal dat hooft zijn ouer alle die in Galaad woonen.

§ Hoe Iaphte die verstooten hadde gheweest, wtuercoren wert, Ende Iephte verlost Israel van die Ammoniten Ende hi offert zijn dochter Gode.