De Vorsterman Bijbel

§ Dat .ij. Capittel.

1

⁺DAer quam een Engel des HEREN opwaerts ^* van Galgale) tot ^* de plaetse der tranen) ende sprac. Ick heb v wt Egipten hier geleyt, ende in dat lant gebracht dat ic uwen vaderen gesworen heb, ende sprac. Ic en wilde mijn verbont niet achter laten inder eewicheit,

+ A

* th. Gilgal

* th. bochim § bochim heet wenen.

2

op dat ghi gheen verbont metten inwoonders des lants en soudt maken, ende haer altaren soudt breken. Maer ghi en hebt mijnder stemmen geen gehoor gegeuen, waerom hebt ghi dat gedaen?

3

daerom en wilde icse niet verderuen voor v, op dat si v tot ^* vianden souden zijn) ende haer goden tot ^* eenen valle).

* th. verweckinghe.

* th. een net.

4

Ende doen die Engel dens HEREN sulcke woorden gesproken hadde tot alle den kinderen van Israel so hief tvolck zijn stemme op ende weente,

5

ende hieten die plaetse ^* die plaetse der tranen) ende offerden aldaer den HEERE.

* th. bochim

6

⁺Want als Iosue dat volc van hem gelaten hadde, ende die kinderen van Israel wech getrocken waren, elc in zijn erfdeel, om dat lant inne te nemen,

+ B

7

so diende dat volck den HERE also lange als Iosue leefde, ende de ouders die langhe na Iosue leefden, ende alle die groote wercken des HEEREN ghesien hadden, dien hi Israel ghedaen hadde,

8

Doen Iosue die sone Nun ghestoruen was, die knecht des HEREN, doen hy hondert ende thien iaren oudt was,

9

begroeuen si hem [kolom] in die palen zijns erfdeels tot ^* ThamnathCeres) op dat geberchte Ephraim, van noortwaerts aenden berghe Gaas,

* th. timnath heres.

10

daer oock alle dye tot dyer tijt gheleeft hadden, tot haeren vaderen verghadert werden, stont na hem een ander geslachte op, dat den HERE niet en kende, noch die wercken die hy aen Israel ghedaen hadde.

11

Doen deden die kinderen van Israel quaet voor des HEEREN aensicht, ⁺ ende haer dienden Baalim,

+ C

12

ende verlieten den HEERE der vaderen God, diese wten lande van Egipten geleyt hadde, ende volchden anderen goden na, ooc den goden der volcken die rontsomme hen woonden, ende aenbadense, ende vertoorenden den HEERE,

13

Want si verlieten den HEERE al meer ende meer, ende dienden Baal ende Ascharoth

14

Aldus verbolch die gramschap des HEEREN ouer Israel, ende gafse inden handen der genen diese beroofden dat sise souden beroouen, ende si namense geuangen ende vercochtense inden handen haerder vianden rontomme, ende si en consten haeren vianden niet wederstaen,

15

Maer werwaerts dat si henen wilden daer was dye hant des HEEREN tegen hen, tot ongeluc so hen die HEERE geseit ende gesworen hadde ende werden seer verdruct.

16

Ende als die HEERE verwecte rechters, diese wter roouers handen halpen,

17

so en gauen si den rechteren ooc geen gehoore, maer si boleerden na andere goden ende aenbadense ende weken haestelijc vanden wege daer haere vaderen in ghegaen waren, ende des HEREN gheboden hoorende, deden si al daer teghen.

18

⁺Ende als die HERE hen rechters verwecte ^* In haeren dagen wert hi gebuyget met bermherticheit) ende hij hoordet suchten der allendiger die gequelt waren, ende verlostese vanden slagen der verderueren.

+ D

* the. so was de here metten rechter, ende hi halpse wter vianden handen, soo langhe als die rechter leefde.

19

Maer als die rechter sterf, so keerden si hen, ende verdoruent meer dan haer vaders, dat si anderen goden volchden, hen te dienen ende te aenbeden si en vielen van haeren voornemen niet, noch van haeren hartneckighen wesene.

20

Daerom vergramde die verbolghentheit des HEREN ouer Israel, also dat hi sprac Want dit volck mijn verbont ouer ghegaen is, dat ic haeren vaderen gheboden hebbe, ende en hoorden mijn stemme niet,

21

so en wil ick voort aen ooc niemanden verdriuen vanden heidenen, die Iosue heeft gelaten, doen hi sterf,

22

op dat ic Israel soude proeuen aen hen, oft si op den wech des HEEREN bliuen, dat si daer inne wandelen, soo haer vaders daer

[p. o6r]

inne gebleuen zijn ofte niet.

23

Aldus so liet de HERE dese volcken, dat hise niet haestelic en wilde verdriuen, noch in die handen Iosue niet en hadde willen leueren.

§ Van die heidenen die welcke ghelaten waren dat volck van Israel daer door te leeren oorlogen, ende namael te wetene, den vianden te wederstaen, Israel wort door othonielAhud ende Samgar verlost.