De Vorsterman Bijbel

[p. o5r]

§ Hier beghint dat boeck der Rechteren, Iudicum int Latijn ghenaemt.

§ Hoe dat Iudas, na dat Iosue doot was, een leytsman des crijchs gestelt wert, Ende Simeon trect met hem tegen die Cananeetsche, van Adonibezeth, van dat lant dat Caleb ontfinc, Ende vanden heidenen, die onder Israel onder tribuyt gebracht werden.

§ Dat eerste Capittel.

1

⁺NA die doot Iosue: vraechden die kinderen van Israel den HEERE ende spraken, Wie sal onder ons die oorloghe voeren teghen dye Cananiten, ende wie sal dye leytsman des strijts zijn?

+ A

2

Dye HEERE sprack. Iudas salse voeren, ende op climmen. Ic heb dat lant in zijn hant ghegeuen.

3

Doen sprack Iudas tot sinen broeder Symeon. Trect met my opwaerts in mijn lot, ende laet ons teghen die Cananiten strijden, so sal ic weder met v trecken in v lot. Aldus trock Simeon met hem.

4

⁺Doen Iudas op trock, so gaf hem die HERE die Cananiten ende Pheresiten in haeren handen, ende sloghen tot Besek, thien duysent mannen,

+ B

5

ende vonden AdoniBesek tot Besek ende streden teghen hem, ende slogen die Cananiten ende Pheresiten,

6

Maer Adoni Besek vluchtede, ende si iaechden hem na, ende doen si hem grepen, hiewen si hem die duymen aen zijn handen ende voeten af.

7

Doen sprack AdoniBesek Tseuentich coningen met afgehouwen duymen haerder handen ende voeten lasen dat ouerblijfsel der spisen onder mijnder tafelen op So ict ghedaen hebbe, so heeft mi God weder vergouden, Ende men bracht hem te Ierusalem, aldaer sterf hi.

8

⁺Maer die kinderen Iuda streden tegen Ierusalem ende wonnense, ende sloeghense metter scarpten des sweerts, ende stoecten die stadt aen.

+ C

9

Daer na trocken die kinderen Iuda neder, om teghen die Cananiten te striden, die opt geberchte ende tegen tzuyden ende inden gronde woonen.

10

Ende Iuda trock henen tegen die Cananiten, die tot Hebron woonden. Hebron hiet voortijts KariathArba, ende ^* sloech) Sesai ende Ahiman ende Thalmai,

* th. sloghen

11

ende ^* trock) van daer tegen die inwoonders tot Dabir. Dabir hiet voortijts KariathSepher.

* th. trocken

12

Ende Caleb sprack, Wie Kariath Sepher verslaet ende wint, dien wil ick mijn dochter Achsa tot eenen wiue gheuen,

13

⁺Doen wantse Othoniel, die sone Kynas, Calebs ioncste broeder. Ende hi ghaf hem zijn dochter Achsa tot eenen wiue,

+ D

14

Ende het gheuiel, doen si in trock, wert si vermaent, dat si eenen acker van haeren vader eysschen soude, ende als si suchte sittende op den ezel. Doen sprac [kolom] Caleb tot haer, Wat is v?

15

Si sprac. Gheeft mi een gebenedijnge, want ghi hebt mi een ^* dorre) lant gegeuen, dat dorre is, geeft mi ooc een waterachtich. Doen gaf Caleb haer een waterachtich bouen ende beneden.

* th. zuyden

16

Ende die kinderen des Keniters Moses zwager trocken opwaerts wt der palmen stadt, metten kinderen Iuda, die teghen tzuyden leger der stadt Arad, ende ginc henen ende ^* woonden) onder dat volc,

* th. woonde

17

ende Iudas troc henen met Symeon sinen broeder, ende si slogen die Cananiten Sephat, ende si ^* dooden hem) ende hieten die stadt Harma.

* th. verbandense Iosue. xv.d

18

Daer toe wan Iuda Gasa met haeren toebehoorten, ende Askalon met haeren toebehoorten, ende Akaron met haerder toebehoorten,

19

Ende die HEERE was met Iuda, also dat hi dat gheberchte in nam. Want hi en conste die inwoonders inden gronde niet inghenemen, om dat si yseren wagens hadden,

20

Ende si gauen Caleb Hebron, so Moyses geboden hadde. Ende hi verdreef daer wt dye drie sonen Enakim.

21

⁺Maer die kinderen Beniamin en verdreuen die Iebusiten niet, die tot Ierusalem woonden, Maer die Iebusiten woonden by dye kinderen Beniamin tot Ierusalem, tot desen daghe toe.

+ E

22

Des ghelijcs trocken dye kinderen Ioseph oock op tot Bethel, ende die HEERE was met hen.

23

Ende dat huys Ioseph beleyde Bethel, die te voren Iusa hiet.

24

Ende dye wachters saghen, eenen man wt der stadt gaen, ende spraken tot hem. Wijst ons waer wi in die stadt comen, so sullen wi ontfermherticheit aen v doen.

25

Ende doen hijt hen wijsde waer si in die stadt souden comen, sloegen si die stadt metter scarpten des sweerts ⁺ Maer dien man met alle sinen vrienden lieten si ghaen.

+ F

26

Doen trock die selue man opt landt der Hethiten, ende timmerde een stadt, ende hietse Lusa, die heet noch op desen daghe alsoo.

27

Ende Manasses en verdreef BethSam niet met haeren ^* dorpkens) noch Thanach, met haeren ^* dorpkens) noch die inwoonders tot Dor met haeren ^* wijken) noch die inwoonders tot Iebleam met haeren ^* wiken) Noch die inwoonders tot Mageddo met haeren ^* straten) Ende die Cananiten begonsten te woonen inden seluen lande,

* the. dochteren.

* the. dochteren.

* the. dochteren.

* the. dochteren.

* the. dochteren

28

Maer doen Israel sterck wert, so maecte hi die Cananiten tzijnsbaer ende en wildese niet te niet doen.

29

⁺Des gelijc so en verdreef ooc Ephraim die Cananiten niet die te Gaser woonden. Maer die Cananiten woonden onder hen te Gaser.

+ G

[p. o5v]

30

Sabulon en verdreef die inwoonders ooc niet tot Ketron ende Nahalol, maer die Cananiten woonden onder hen, ende waren tzijnsbaer.

31

Aser en verdreef die inwoonders tot Aco niet, noch die inwoonders tot Zidon, tot Ahelab, tot Achsib, Helba, tot Apheck, ende tot Rehob,

32

Die Aseriten woonden onder die Cananiten die inden lande woonden, want si en verdreuense niet.

33

Nephthalim en verdreef die inwoonders tot BethSemes niet, noch tot BetAnach, maer woonde onder die Cananiten die inden lande woonden. Maer die tot BethSemes ende tot BethAnath werden hem tzijnsbaer.

34

Ende die Amoriten benauden die kinderen Dan opt geberchte, ende en lieten niet toe dat si onder inden gront souden comen.

35

Ende die Amoriten begonsten te woonen opt geberchte Heres tot Aaialon tot Saialbim, nochtans so wert hen die hant des huys Iosephs te zwaer, ende werden tzijnsbaer.

36

Ende de pale der Amoriten was van ^* den opganc des Scorpioens) ende vanden steen ende vander hoochten.

* th. daermen tot Acrabi opwaerts gaet

§ Hoe die Engel ghesonden wert tot die plaetse der weeningen, ende Israel sondichde, ende haeren vianden geleeuert wert, ende berouwe creech, ende verlost wert.