De Vorsterman Bijbel

§ Dat .xxxi. Capittel.

1

⁺ENde Moyses ginc henen, ende hi sprack dese woorden tot alle Israel,

+ A

2

segghende tot hen, Ic ben huyden hondert iaer ende .xx. oudt, Ic en can niet meer wt ende in gegaen, Bysonder, ooc soo heeft die HEERE tot mi geseyt, Ghi en sult niet ouer dese Iordaen gaen

3

Daer om die HEERE uwe God sal seluer voor v henen ghaen, Hi sal selue dit volc te niette doen voor v aensichte, ende ghi sultse besitten, Ende Iosue die sal voor v henen ouer gaen, so die HEERE geseyt heeft,

4

Ende die HEERE sal hem doen, so hy ^* Seon) ende Og den coninghen der Amoriten, ende haeren lande ghedaen heeft, ende hi salse te niet doen.

* the. Sihon

5

Als dan die HEERE v dese sal geleuert hebben, so suldi hen doen des gelijc als ic v gheboden hebbe,

6

Doet vromelijc als mannen, ende wort versterct, ende en wilt niet vreesen, noch en veruaert v nyet (als ghyse aensiet) Want die HEERE uwe God sal selue v leytsman wesen, ende hi en sal die hant niet af doen, noch v verlaten.

7

⁺Ende Moyses riep Iosue, ende sprack tot hem, ⁺ voor alle Israel, Weest gesterct, ende zijt vroom, want ghi sult dit volck int landt brenghen, dat die HEERE haeren vaderen ghesworen heeft hen te gheuen, ende ghi sullet onder hen wt deylen,

+ B

+ Iosue. i.b

8

Ende die HEERE die v leytsman is, die sal met v zijn, die en sal die hant niet af doen, noch v verlaten, ende en wilt niet vreesen, ende en verscrict v niet.

9

Ende Moyses screef dese wet, ende ghaft den priesteren den kinderen Leui, die die arcke des verbonts des HEEREN droegen, ende al den ouderen van Israel,

10

⁺ende hi gheboot hen ende sprac, Ouer seuen iaer, ter tijt des vry iaers, in die feeste der loouer tenten,

+ C

11

als alle die kin-[kolom]deren van Israel comen, om te vertoonen voor daensichte des HEEREN haers Gods, in die plaetse dye hi verkiesen sal, suldy laten wt roepen dese wet, voor alle Israel, als zijt hooren,

12

ende als alle dat volck bi een vergadert is, beyde die mannen ende vrouwen, kinderen ende uwe vremdelingen die in uwer poorten zijn, op dat si hoorende leeren, dat si den HERE uwen God vreesen, ende bewaren dat si alle die woorden deser wet doen,

13

Ende dat haer kinderen dien v niet en weten, ooc hooren ende leeren, daer mede si den HERE haeren god vreesen, alle haer leefdagen lanc, die si inden lande, daer ghi toe gaet ouer die Iordaen om te besitten, verkeeren sullen.

14

⁺Ende die HEERE sprack tot Moysen, siet den dach uwer doot is bi nakende, roept Iosue, ende staet te samen inden tabernakel des getuygenis, dat ic hem gebiede, Moyses ghinckker henen met Iosue, ende stonden inden tabernakel des ghetuyghenis,

+ D

15

Ende die HERE openbaerde in ^* die plaetse) in die calomne eenre wolcken, die welcke stont inden inganck des tabernakels,

* the. tabernakel

16

Ende die HEERE sprac tot Moysen, Siet ghy sult slapen gaen met uwen vaderen, Ende dit volc sal op comen, ende het sal gheestelic ouerspel bedriuen met vremde goden, int lant daer si in comen sullen, om daer in te woonen, ende daer salt mi verlaten, ende dat verbont te niet doen, dat ick met hen ghemaect hebbe,

17

Ende minen toren sal vergrammen ouer haer in dien dach, ende ic salse verlaten, ende verberghen mijn aensichte van hen, ende si sullen worden verslint, ⁺ Ende dan sullen hen vinden alle quaden, ende quellinghen, so dat si segghen sullen, Voor waer want God met mi niet en is, daerom hebben mi alle dese quaden gheuonden,

+ E

18

want ick sal mijn aensichte verbergen in dien dach om alle tquaets wille, dat si gedaen hebben, dat si haer hebben tot ander goden gekeert.

19

So scrijft nv dit liedt voor v, ende leeret den kinderen van Israel, dat zijt onthouden, ende met den mont singhen, dat mi dat liedt een getuyghe si onder die kinderen van Israel,

20

⁺Want ic salse int lant brenghen, dat ic haeren vaderen gesworen heb, het aertrijc daer melc ende honich in bloeyt, Ende als si eten ende sadt, ende vet worden, so sullen si haer tot ander goden keeren, ende hen dienen, ende mi lasteren, ende laten mijn verbont varen,

+ F

21

Ende als hen dan veel ongelucx ende anxt beuangen sal, soo sal dit liedt voor hen antwoorden tot een getuyghenis, Want gheen verghetentheyt en sal dit liedt doen wten monde ws zaets want

[p. m7r]

ic weete haer gedachten ^* huyden, wat si doen sullen) eer dat icse int lant brenge, dat ic ghezworen hebbe.

* the. daer si nv mede omme gaen.

22

Also screef Moyses dit liedt ter seluer tijt, ende hi leerdet den kinderen van Israel.

23

Ende hi beual Iosue Nuns sone seggende. Weest versterct ende zijt vroem, want ghy sult die kinderen van Israel int lant leyden, dat ic hen gezworen heb, ende ic sal met v zijn.

24

Daer na doen Moyses die woorden van deser wet al wt gescreuen hadde in eenen boec,

25

⁺geboot hi den Leuiten die de arcke des getuygenis des HEEREN droegen, seggende.

+ G

26

Neemt dat boeck van deser wet, ende legghet aen die side vander Arcken des verbonts des HEREN ws Gods, dattet aldaer een getuyge si teghen v,

27

want ic kenne v ongehoorsaemheit ende hartneckicheit, want die wijle dat ic met v leue, sidi ongehoorsaem gheweest tegen den HEERE, Hoe veel meer na mijnder doot?

28

Vergadert nv voor mi alle die outste van uwen geslachten, ende uwe ^* officiers) dat ic dese woorden voor haer ooren spreke, ende dat ic hemel ende aerde tegen hen tot getuygen neme,

* th. ouerste.

29

Want ic weet dat ghijt na mijn doot qualick maken sult, ende vanden weghe treden, den welcken ic v gheboden hebbe, ende dan sal v quaet ongeluc ouer comen ten laetsten tijden, om dat ghi qualic gedaen hebt voor des HEEREN ooghen, dat ghi hem vertoornt hebt, door die wercken van uwen handen.

30

Aldus sprac Moyses die woorden van desen liedt geheel wt voor die ooren van alder gemeynten van Israel, daer zijt hoorden.

§ Hoe Moyses dat liedeken der tweder wet maecte, ende den volcke leerde, Ende hoe God Moysi beueelt te gaen opt geberchte Abarim opten berch Nebo, om dat lant Canaan te sien, ende aldaer te steruen.