De Vorsterman Bijbel

§ Dat .xxix. Capittel

1

⁺DIt zijn die woorden des verbonts dat ⁺die HEERE Moysi geboden had te maken metten kinderen van Israel inder Moabiten lant, bouen dat verbont, dat hi maecte met hen luyden te Horeb,

+ A

+ Exo. xix.a.

2

Ende Moyses riep alle Israel, ende hi sprac tot hen, Ghi hebbet ghesien al dat ghene dat dye HEERE gedaen heeft in Egypten lant voor uwe ooghen, Pharaoni met alle zijn knechten, ende met allen sinen lande,

3

die groote versoeckingen, die welcke dat uwe oogen ghesien hebben, dattet groote teekenen ende wonderen waren,

4

Ende die HERE en heeft v niet gegheuen tot opten dach van huyden een herte, dat daer verstandich ware, noch oogen die daer sien, ende ooren die daer hooren.

5

⁺Hi heeft v .xl. iaren door die woestine gheleyt, uwe cleedere en zijn aen v ooc niet ver-[kolom]oudert, ende uwen schoen en is niet out geworden aen uwen voet,

+ B

6

ghi en hebt gheen broot gegheten, ende gheenen wijn ghedroncken, noch starcken dranck, op dat ghy weet, dat ick die HEERE uwe Godt ben.

7

Ende doen ghi quaemt in dese plaetse, quamen die Coninc ^* Seon) tot Hesebon wt, ende die Coninc Og tot Basan, om teghen ons te strijden, ende wi hebbense geslaghen

* the. Sihon

8

ende hare lant in genomen, ende tot eenen erfdeele gegeuen den Rubeniten, ende Gadditen, ende den haluen gheslachte der Manassiren,

9

Daer omme hout nv die woorden van desen verbont, ende doet daer na, op dat ghi verstaen moghet al dat ghi doet.

10

Ghi staet huyden alle voor den HEERE uwen God, die ouerste van uwen gheslachten, uwe Ouders, uwe officiers, een yeghelijc van Israel,

11

⁺uwe kinderen, uwe wijuen, uwe vremdelinc die in uwen legher is, van uwen hout houwer aen, tot aenden water scheppere

+ C

12

dat ghi comen sout in dat verbont des HEEREN ws Godts, ende inden eedt dat welcke die HEERE uwe God huyden met v maect,

13

om dat hi v huyden hem aenueerden soude tot eenen volcke, ende dat hy uwe God zijn soude, soo hi v geseyt heeft, ende soo hi uwen vaderen Abraham, Isaac, ende Iacob ghesworen heeft.

14

Want ic en make dit verbont ende desen eedt niet alleen met v vaste,

15

maer met alle den genen dier teghenwoordich zijn, ende dier niet teghenwoordich en zijn,

16

Want ghi wetet hoe wi in Egypten ghewoont hebben, ende zijn ghetrocken midden door die heydenen, door denwelcken ghi troct,

17

ende saecht haer grouwelicheden ^* ende vuyllicheden, dat zijn) haer goden hout ende steen, siluer ende gont, die bi hen waren

* ten is nyet int heb.

18

Dat niet messchien eenich man, ofte een wijf, oft eenich gesin, oft eenich gheslachte onder v en si, wiens herte hem huyden afgekeert heeft, vanden HERE onsen God, dattet henen ghae, ende diene, den Goden van desen volcken, ende worde misschien een wortel onder v luyden, die daer galle ende bitterheyt drage,

19

ende al hoort hi die woorden, van desen vermaledijnghe, ende nochtans hem ghebenedije in zijn herte, ende segghe, Het en sal alsoo quaet niet zijn, Ic wil wandelen, also alst mijnder herten dunct, dat die ghene die daer gedroncken heeft, metten dorstighen verloren soude worden.

20

Ende dan en sal die HEERE dan desen niet genadich zijn, maer dan sal sinen toren ende zijn vreeschelijcke liefde roocken ouer

[p. m6r]

alsulcken man, ende alle dese vermaledijngen sullen op hem comen, die welcke in desen boec gescreuen zijn, ende die HEERE sal sinen naem wt doen van onder den hemel,

21

ende hi sal hem afscheyden tot quade, wt alle den geslachten van Israel, na dat inhouden van alle die vermaledijnghen des verbonts, ⁺ dat inden boeck van deser wet gescreuen is.

+ D

22

So sullen dan seggen die nacomelingen van uwen kinderen, die voort aen gheboren worden, ende die na v op comen sullen, ende die vremde, die wt vremde landen comen, als si die plagen van desen lande sien, ende die siecten, daer mede datse die HERE gheslaghen heeft,

23

dat hi alle haer lant met solfere ende met soute verbrant heeft, dat si niet bezaeyt en mach worden, noch en wast, noch dat gheen cruyt daer inne op en ghaet, gelijc als Sodoma ende Gomorra, Adama, ende Zeboim omgekeert zijn, die welcke die HEERE in sinen toren ende gramschappe omkeerde

24

So sal dan alle volck seggen, Waer om heeft die HEERE desen lande also gedaen? Wat grooter machtigher hatighen toren is dat?

25

So salmen dan segghen, Om dat si dat verbont des HEEREN, haerder vaderen Godt, verlaten hebben, dat welcke hy met hen maecte, doen hise wt Egypten leyde,

26

ende si zijn henen gegaen, ende si hebben gedient den anderen goden, ende si hebbense aen gebeden, alsulcke goden die si niet en kenden, ende dien si niet toegedeylt en zijn,

27

Daerom is des HEREN toren ontsteken op dit lant alsoo dat hi ouer haer heeft laten comen alle die vermaledijnghen die in dit boeck ghescreuen staen,

28

Ende die HEERE heeftse wt haeren lande ghestooten, met grooten toren, gramschappen ende onghenaden, ende hy heeftse in een ander lant geworpen, ghelijct nv blijct,

29

Die verborghenheyt des HEEREN ons Gods is ons ende onsen kinderen gheopent eewelijc, om dat wi sullen doen alle die woorden van deser wet.

§ Hoe dat woort Godts niet verre en is vanden ghenen diet soecken, maer seer na ende bi te wetene, inden mont ende int herte