De Vorsterman Bijbel

§ Dat .xxxv. Capittel.

1

⁺ENde die HEERE sprac ooc dese dingen tot Moysen op der Moabiten velt aen die Iordane tegen Iericho ende sprac, ⁺

+ A

+ Iosue. xxi.

2

Gebiet den kinderen van Israel, dat si, den Leuiten

3

steden gheuen, van haeren erfgoeden, om in te woonen, ende die voorsteden, die suldy ooc den Leuiten gheuen, dat si in die steden woonen, ende in die voorsteden haer vee ende haue, ende alderley dieren houden.

4

Dat begrijp der voorsteden, dat si den Leuiten gheuen sullen, sal duysent ^* scherden) buyten der stadt mueren alom hebben,

* theb. ellen,

5

Aldus suldise meten, van buyten voor die stadt aenden hoeck teghent oosten, twee duysent cubitus, ende aenden anderen hoec tegent zuyden, twee duysent cubitus, Ende aenden anderen hoec tegent westen, twee duysent cubitus, Ende aenden hoec tegent noorden, tweeduysent cubitus, dat die stadt in die middelt si, ende haer voorsteden sullen buyten wesen.

6

Ende onder den steden die ghi den Leuiten gheuen sult, suldy ses vrysteden gheuen, ⁺ afghescheyden totter vluchtighen hulpe, dat daer in vliede die bloet gestort heeft, ⁺ Bouen dese, suldy noch twee en veertich steden

+ B

+ Iosue. x.a

[p. k7r]

gheuen,

7

dat al die steden, die den Leuiten ghegheuen zijn .xlviij. zijn sullen met haeren voorsteden,

8

Ende dese steden diemen den Leuiten gheuen sal, vanden kinderen van Israels erfdeele salmen dmeeste nemen vanden ghenen, die meest besitten, ende dminste van dien die minste besitten, ⁺ Een yeghelijck na zijn erfdeel, dat hem toeghedeelt wort, sal den Leuiten steden gheuen.

+ Deu. xix:a

9

Ende die HERE sprack tot Moysen, segghende,

10

⁺Spreect metten kinderen van Israel, ende segt hen, Als ghi ouer die Iordane coemt int lant Canaan,

+ C

11

suldy steden verkiesen, om vrijsteden te sine, dat daer in vluchte die sonder sinen wille ^* bloet ghestort heeft,)

* the. eenen dootslach doet.

12

ende als daer in die vooruluchtighe gheuloden is, so en sal die neue des verslaghens, hem niet moghen dootslaen, tot dat hi voor die gemeynte te rechte gestaen heeft,

13

^* Ende van die steden die afghescheyden sullen worden tot beschermenisse der vluchtighen.)

* th. Ende die steden die ghi geuen sult, sullen ses vrijsteden zijn.

14

Drie suldy gheuen op dese syde van die Iordane, ende drie int lant Canaan. Dat zijn die ses vrijsteden

15

beyde den kinderen van Israel, ende den vremdelinghen, ende den toecomelinghen onder v, dat hi daer vluchte, die sonder sinen wille ^* bloet ghestort heeft.)

* th. een ziele gheslaghen heeft.

16

☞ So wie yemanden met een yseren wapen slaet, dat hi sterft die geslaghen is, die is een dootslager, ende sal die doot steruen,

17

Worpt hi hem met eenen steen ^* so dat die gheworpen is sterft, so sal hi inder seluer manieren ghepijnicht worden)

* h. daer mede yemant mach ghedoot worden, dat hi daer aff sterft, so is hi een dootslagher ende sal de doot steruen.

18

Wort yemant met een hout gheslaghen, ^* dat hi sterft, dat sal in des dootslaghers bloet ghewroken worden,

* daer mede yemant mach doot gheslagen worden, dat hi sterft, so is hi een dootslager, ende sal die doot steruen Die wraker des bloets sal hem dooden, so hi geslagen heeft salmen hem weder doen

19

Die neue des verslaghens sal den dootslagher dootslaen ter stont, als hien gheuanghen heeft, sal hi hem dootslaen.)

20

Stoot yemant eenen mensche wt hate, oft worpt wt liste yet op hem, dat hi steruet,

21

oft slaet hem wt viantschap met zijnder hant, dat hi sterft, so sal hi die doot schuldich zijn, die hem gheslaghen heeft, Want hi is een dooslagher, ^* die naeste des gheens die verslaghen is, terstont als hi hem gheuanghen heeft sal hi hem dooden.)

* th. die wrakere des bloets sal hem ter doot brenghen.

22

Ende als hi hem bi misual sonder viantschap stoot, oft worpt hi eenighe wapen op hem sonder list,

23

oft eenighen steen (daer af dat hi steruen mach, ende en heues niet ghesien) op hem worpet dat hi sterft, ende hi en is zijn viant niet, noch hi en wilde hem oock niet quaets,

24

so sal die ghemeynte rechten, tusschen hem, ende die gheslaghen heeft, ende tusschen den wreker des bloets in desen rechte,

25

ende die ghemeynte sal den dootslagher verlossen van die hant des bloetwrekers, [kolom] ende sal hem weder laten comen tot die vrijstadt, daer hi in gheuloden was, ende hi sal aldaer bliuen, tot dat die ouerste priester sterft die metter heyligher olyen ghesalft is.

26

⁺Maer ist dat die dootslagher buyten die steden, die den ballinghen toe gheschict zijn, gheuonden sal worden,

+ D

27

ende die bloetwreker vint hem buyten die palen van zijnder vrijer stadt, ende slaet hem doot, die en sal niet schuldich zijn des bloets,

28

want hi soude in zijn vrijstadt blijuen, tot dat die Bisschop doot ware, ende als die doot is, so sal die dootslagher wederomme in zijn lant comen,

29

Dat sal v een wet des rechts zijn bi uwe nacomelinghen in alle uwe wooninghen.

30

Den dootslagher salmen ^* pijnighen) onder ghetuyghen, tot eens ghetuyghenisse en sal niemant verwesen worden,

* the. dooden.

31

Ende ghi en sult gheen versoeninghe nemen ouer die ziele des dootslaghers, want hi si die doot sculdich, maer hi sal terstont die doot steruen

32

Die ballinghen ende vluchtighe en sullen in gheender manieren voor die doot des Bisschops wederomme moghen comen in haer steden,

33

op dat ghi niet en besmet dat aertrijcke uwer wooningen, die besmet wort met den bloet der onnooselen menschen, ende dat landt en kan niet vanden bloede versoent worden, dat daer inne ghestort is, sonder alleen door dat bloet des ghenen die dat ghestort heeft,

34

^* Ende also sal ghesuyuert worden uwe erffenisse, als ick met v woone.) Want ick ben die HEERE, die onder die kinderen van Israel woont.

* th. En onreynicht dat lant niet daer ghi in woont, ende daer ic ooc in woone.

§ Van die wet aengaende den houwelijcken staet, hoe die dochteren Salphaad trouwen mochten onder wat gheslachte van Israel dat haer luyden beliefde.