De Vorsterman Bijbel

§ Dat .xxiiij. Capittel.

1

ALs Balaam sach, dattet den HEERE genoechde, dat hi Israel ghebenedien soude, ⁺ so en ginc hi niet wech, gelijc hi voormaels dede, om te soecken die wijchelie, ende rechte zijn aenghesicht recht ter woestinen waerts,

+ A

2

ende hief zijn oogen op, ende sach Israel in haer pauwelioenen ende tenten, gelijc si lagen naer haere gheslaechten, ende die gheest Gods viel op hem,

3

ende hi hief op sine ghelijckenisse, ende sprac, Balaam Beors sone seyt, Dit seyt wiens ooghen ^* verstopt zijn,)

* th. geopent zijn,

4

Een hoorder van Gods redenen, die des almachtighen visioen sach, die daer neder viel, ende zijn ooghen werden gheopent.

5

O Iacob, hoe schoone zijn uwe tenten, ende uwe wooningen Israel,

6

si zijn ghelijc ^* breede groene dalen vol bosschen) gelijc die houen aent water, ⁺ gelijc die tenten die de HEERE vast ghemaect heeft, ghelijck die Cedren aent water,

* th. den beken die hen wtbreyden,

+ B

7

Daer sal water wt sinen Eemer vloeyen, ende zijn zaet sal een groot water worden, Sijn coninc sal ^* wech genomen worden om) Agab, ende zijn rijc sal ^* wech genomen worden)

* th. hooger worden dan

* th. hem verheffen

8

Godt heeftse wt Egipten geleyt, wiens stercheyt is gelijc eens eenhorens, Die heydenen ^* sullen zijn tegenpartie) verslinden, ende haere ghebeente breken, met sinen pilen ^* sullen sise) doorschieten,

* the. zijn tegenpartie sal hi

* h. sal hi die

9

hi is gaen liggen als een Leew, ende gelijc ^* eene Leeuwinne) die niemant en sal derren wecken, Gebenedijt sal hi zijn, die v gebenedijt, ende die v vermaledijt, sal gerekent worden in vermalediinge.

* the. ionghe leew

10

Balac gram wesende tegen Balaam, sloech zijn handen te samen, ende sprac tot hem Ic hebbe v geroepen, dat ghi mijn vianden vermaledien soudt, ende ghi hebtse driemaele gebenedijt,

11

Ende nv keert weder tot uwe stadt, ⁺ Ic dachte, dat ic v grootelic eeren soude, maer die HEERE heeft v van die eere die ic v toegeschict hadde, berooft,

+ C

12

Balaam antwoorde tot Balack, ende seyde, En hebbe ic ooc niet tot uwen boden geseyt, die ghi tot mi sandt, ende gesproken,

13

Al gaef mi Balack zijn huys vol siluers ende gouts, soo en conde ic niet voor bi gaen ouer dat woort des HEREN mijns Gods, quaet noch goet te spreken wt mijnder herten, maer dat alleene dat

[p. k1v]

die HEERE segghen sal, dat sal ic ooc spreken,

14

Maer nochtans als ick tot minen volcke trecke, soo sal ick v raden ^* wat v volck met desen) volcke doen sal, naer deser tijt inden laetsten.

* th. wat dit volck met uwen

15

Ende Balaam hief op zijn bisprake, ende sprack wederom, dit seyt Balaam die sone Beor, Die man dien die ooge ^* gestopt) zijn,

* h. geopent

16

Die hoorder van Gods redenen, ende die kennis heeft van die leeringhe des hoochsten, die die ghesichten des almachtighen sach, ende neder viel, ende diens oogen geopent werden,

17

Ic sal hem sien, maer nv niet, Ic sal hem aenschouwen, maer niet van bi, Een sterre sal op risen wt Iacob, ende een ^* roede) sal wt Israel opstaen, ☞ ⁺ ende sal verslaen die ouerste der Moabiten, ende verwinnen alle die kinderen Seth,

* the. cepter

+ Van Dauid spreect hi, daer christus altijt door beteekent wort.

18

Edom sal zijn erue zijn, ende die erffenisse Seyr sal ^* wijcken sinen vianden,) Maer Israel sal stercke wercken doen,

* the. zijnder vianden besittinge zijn

19

Die heerscappie hebben sal, die sal wt Iacob comen, ende sal te niet doen, dat ouerbleuen is vanden steden.

20

⁺Ende als hi sach, die Amalechiten, hief hi zijn woort op, ende sprac, ⁺ Amalech deerste onder de heydenen, maer ^* zijn laetste deelen sullen) geheel te niete gaen,

+ D

+ Amalec was deerste der heydenen, die de kinderen van Israel beuochte Exo. xvij maer door Saul vernielt i.Regum. xv

* th. ten laetsten suldy

21

Ende doen hi die Cyneen sach, hief hi zijn woort op, ende sprac, Vaste is uwe wooninge, maer al hebt ghi uwen nest in eenen steen geleyt,

22

ende zijt wtuercoren vanden geslachte Cayn, hoe lange suldy mogen bliuen, Want Assur sal v vanghen.

23

Ende hief noch eens zijn bisprake op, ende seyde, Och wie sal leuen als God dit doen sal?

24

Si sullen comen in groote schepen van ^* Italien) ende verwinnen die van Assyrien, ende die Hebreeusche verderuen, ende ten laetsten sullen si oock gheheel vergaen.

* th. Chitim

25

Ende Balaam stont op, ende trock wech, ende quam weder in zijn plaetse, Ende Balack die trock sinen wech wederomme van daer hi ghecomen was.

§ Hoe dat volc oncuyscheyt metten dochteren van Moab bedreef, ende Phinees coemt Zambri ende Colbi na int hoeren huys ende doorstacse beyde, door haer ghemechte, ende keerde also Godts toren.