De Vorsterman Bijbel

Dat .xxiij. Capittel.

41

⁺ENde des morghens nam Balack Balaam met hem, ende si ghinghen wech op die hoochte des outaers van Baal, dat hi van daer sien conde, tot aen dat eynde des volcs,

+ A

1

Ende Balaam sprack tot Balack, Maect mi hier seuen altaren, ende besorcht mi hier seuen calueren ende seuen rammen,

2

Balack deet soo hem Balaam gheseyt hadde, Ende si beyde Balack ende Balaam offerden op elcken outaer een calf ende eenen ram.

3

Ende Balaam sprack tot Balack, Staet een weynich by uwen brantoffer, ick sal wech gaen ofte mi bi auontueren die HEERE gemoette, ende mi roept, dat ick v bootschappen soude, wat hi mi ghebieden sal.

4

Ende als hi gheringhe wech gheghaen was, so is hem God te ghemoete gecomen, ende Balaam sprack tot den HEERE, Seuen altaren heb ick bereyt, ende op elcken altaer een calf ende eenen ram geoffert,

5

Die HEERE gaf Balaam dat woort inden mont, ende sprack, Gaet weder tot Balack, ende segghet also.

6

⁺Ende als hi weder tot hem quam, Siet, doen stont hi bi sinen brantoffer, met alle den vorsten der Moabiten.

+ B

7

Doen hief hi zijn woort op ende seyde, Balack der Moabiten coninck heeft mi wt Aran laten halen, vanden gheberchte dat teghen dat oosten leyt, ende seyde, Coemt ende vermaledijt mi Iacob, coemt lachtert Israel,

8

Hoe sal ick vermaledien, den welcken God niet en vermaledijt? Hoe sal ick lachteren, den welcken God niet en lachtert?

9

Want van die hooghe steenrootse sie ic hem wel, ende vanden hueuelen sal ick hem mercken, Siet dat volck sal alleen woonen, ende onder die heydenen niet gerekent worden,

10

Wie can gherekenen dat stof Iacobs, ende dat getal des ^* geslachtes) van Israel, Mijn ziele moet steruen die doot der oprechtiger, ende mijn eynden moeten worden ghelijck deser luyden eynde.

* th. vierden deels.

11

⁺Doen sprack Balack tot Balaam, Wat

+ C

[p. k1r]

ist, dat ghi mi doet? Om dat ghi mijn vianden vermalediden soudt, heb ic v ontboden ende siet, ghi ghebenedijtse,

12

Ende Balaam antwoorde, ende sprac, Mach ick yet anders spreken, dan dat die HEERE ^* geboden heeft?)

* th. mi inden mont geeft

13

Balack antwoorde, coemt doch met mi aen een ander plaetse, daer ghi dat een eynde van Israel siet, ende nochtans niet al en siet ende vermaledijtse aldaer.

14

Ende hi leyde hem op een ander plaetse, ⁺ op die hoochte vanden berch Phasga, ende timmerde seuen outaren, ende offerde op elcken altaer een kalf, ende eenen ram,

+ C

15

Ende Balaam sprac tot Balack, staet alsoo bi uwen brantoffer, tot dat ick sal derwaerts gaen soecken,

16

Ende die HEERE gemoete Balaam, ende ghaf hem dwoort in sinen mont, ende sprac, Gaet weder tot Balack, ende spreect also,

17

Ende als hi weder tot hem quam, siet, doen stont hi bi sinen brantoffer, metten vorsten der Moabiten, Ende Balack sprack tot hem, Wat heeft die HEERE gheseyt?

18

Ende Balaam hief zijn bisprake, ende sprack, Staet op Balac, ende hoort, vaet ter ooren mijn getuygenis, ghi die zijt Zephors sone

19

God en is niet als een man die lieghet, noch als eens menschen sone, die verandert wort soude hijt seggen, ende niet doen? soude hijt spreken, ende gheen stadt grijpen?

20

Siet, om te ghebenedien ben ick hier ghebracht, ick ghebenedie, ende en kan die ghebenedijnge niet gekeeren,

21

Daer en is gheen ^* afgod) in Iacob, noch men en siet gheen ^* gelijckenisse) in Israel, Die HEERE zijn God is bi hem en dat trompette geclanc der victorien des conincs is onder hen,

* th. moetheyt

* the. arbeyt

22

God heeftse wt Egipten geleyt, zijn stercheyt is als eens Eenhorens

23

Want daer en is gheen wijchelie in Iacob, noch gheen waersegghinge in Israel, Tot zijnder tijt salmen tot Iacob segghen, ende tot Israel, wat God doet,

24

Siet, dat volc sal opstaen als een ionge leuwinne, ende sal zijn borst wtsteken als een Leew, Ende ten sal niet neder ligghen, tot dattet den roof verslindt heeft, ende dbloet des verslaghens, drincken.

25

Doen sprack Balack tot Balaam, En vloetse niet, noch en gebenedijtse niet,

26

⁺Balaam antwoorde, seggende tot Balack, En heb ick v niet geseyt, dat, al wat die HEERE ghebieden sal, dat sal ick doen?

+ D

27

Balack sprack tot hem, coemt doch, ick sal v aen eenen anderen hoec leyden, oft Gode bi auentueren belieue, dat ghise aldaer vermaledijt,

28

Ende hi leyde hem op dat alder hoochste vanden berge ^* Phogor), die daer keert [kolom] tegen die woestine,

* theb. Peor

29

Ende Balaam sprac tot Balack, Maect mi hier seuen altaren, ende bereyt mi seuen calueren, ende seuen rammen,

30

Balack dede alsoo, soo Balaam hem seyde, Ende stelde op elcken altar die calueren ende rammen.

§ Hoe Balaam door den gheest Gods vanden toecomenden rijcke van Israel, propheteert, Daer sal een sterre wt Iacob opgaen, ende een roede van Israel. etc.