De Vorsterman Bijbel

§ Dat .xix. Capittel.

1

⁺ENde die HEERE sprack tot Moysen ende Aaron, seggende,

+ A

2

Dit is die zede der offerande die die HERE geordineert heeft Ghebiedt den kinderen van Israel, dat si tot v brenghen een roode koe sonder smette, die gheen ghebrec en heeft, ende die noch gheen iock en heeft ghedragen,

3

ende geeftse den Priestere Eleazar, die salse wtleyden voor den legher, ende aldaer sal hijse dootslaen om te offeren,

4

Ende Eleazar die priester sal van haeren bloede met sinen vinger nemen, ende sprengent seuen mael teghen den Tabernakel des getuychnis,

5

ende die koe voor hem laten verbernen, beyde

[p. i6v]

haer vel ende vleesch, oock haer bloet met haeren meste,

6

Ende die Priester sal Cederen hout ende Ysop ende roset roode wolle nemen, ende op die bernende vlamme worpen die die koe verslint,

7

ende hi sal zijn cleederen wasschen, ende zijn lijf met water baden, ende daer na inden legher gaen, ende onreyn zijn totten auont.

8

Maer oock diese verbrant heeft die sal oock zijn cleederen met water wasschen, ende zijn lijf int water baden, ⁺ ende onreyn zijn totten auont,

+ B

9

Ende een suyuer man sal die asschen vander koe oprapen, ende schuddense buyten den legher in een suyuer plaetse, dat si aldaer verwaert worde, voor die ghemeynte der kinderen van Israel, tot een bespreng water, want die koe is voor die sonde verbrant,

10

Ende die ghene die die asschen vander koe opgheraept heeft, sal zijn cleederen wasschen ende onreyn zijn totten auont, Dat sal een eewich recht zijn den kinderen van Israel ende den vremdelinghen die onder v woonen.

11

So wie eenen dooden mensche raect, die sal seuen daghen onreyn zijn,

12

⁺die sal hem met desen water besprenghen, ten derden daghe, ende ten seuensten daghe, so sal hi ghesuyuert zijn, Ende en reynicht hi hem niet ten derden daghe, ten seuensten daghe, so en sal hi niet ghesuyuert moghen worden,

+ C

13

Als yemant eenighen dooden mensch raect ende hem niet ^* en suyuert,) die ontreynicht den Tabernakel des HEEREN, ende alsulcken ziele sal vergaen wt Israel, om dat ouer haer dat Sprengwater niet gheworpen en is, daeromme sal si onreyn zijn, ^* ende zijn onsuyuerheyt sal op hem blijuen.)

* th. suyueren en wilt.

* h. so lange als hi hem niet en latet suyueren.

14

Dit is die wet, als een mensche in die tente sterft, al wie dat in die tente gaen, ende alle wat daer is, sal seuen daghen onreyn zijn,

15

Ende alle vat dat gheen decsel, noch bant en heeft, is onreyn,

16

oock wie dat inden velde eenen verslaghen metten swaerde raect, oft eenen dooden oft eens menschen been, oft graf, die is seuen daghen onreyn.

17

⁺So sullen si dan nemen voor den onreynen, asschen van desen verbranden sondoffer, ende doen daer leuende watere op in een vat, ⁺

+ D

+ Leuende water hieten si dat loopende water, om dat hem roert, ghelijc ryuier water, oft vloetwater.

18

ende een suyuer man sal Ysope nemen, ende int water doppen, ende die tente besprenghen, ende alle dien huysraet, ende alle die menschen die daer inne zijn, die in dusdanighe maniere besmet zijn, Also oock den ghenen, die des dooden oft verslaghens been, oft dooden, oft graf gheraect heeft,

19

ende die suyuere sal den onsuyueren in deser manieren, ten derden daghe ende ten seuenden dage besprenghen [kolom] ende ten seuenden daghe ghesuyuert wesende, sal hi zijn cleederen wasschen, ende hem int water baden, ende totten auont onreyn wesen.

20

So wie onreyn zijn sal, ende in deser manieren ^* niet ghesuyuert en wort,) diens ziele sal vergaen wten midden der ghemeynten, Want hi heeft die heylighe plaetse des HEREN onreynicht, ende en is metten bespreng water niet besprengt ^*)

* th. hem niet suyueren en wilt.

* h. daerom is hi onsuyuer.

21

Ende dit sal ^* een) eewich recht zijn, Ende dese die metten bespreng water, ghesprengt heeft, sal zijn cleederen oock wasschen. ⁺ Ende yeghelijck wie dat bespreng water raect, sal onsuyuer zijn totten auont,

* th. hen een

+ Leu. xvij.c

22

Ende al dat die onsuyuer raect, sal onsuyuer worden, Ende so wat ziele dat yet van desen raecken sal, sal onreyn zijn totten auont.

§ Hoe Maria starf, ende tvolck murmurerende water wten steen creech doen Moyses metter roede tweemael sloech.