De Vorsterman Bijbel

§ Dat .xviij. Capittel.

1

⁺ENde die HEERE sprack tot Aaron, Ghi ende uwe sonen, ende ws vaders huys met v, sult die misdaet der geyligher plaetsen draghen, ende ghi ende uwe sonen met v, sult die misdaet ws priesterdoms draghen,

+ A

2

Maer uwe broederen vanden gheslachte Leui, ^* ende den cepter) ws vaders suldy tot v nemen, dat si bereyt zijn, om v te dienen, Maer ghi ende uwe sonen met v, sult dienen in den tabernakel des ghetuyghenis,

* ten is nyet int hebre.

3

ende die Leuiten sullen waken na uwe gheboden ende tot alle die wercken des tabernakels des ghetuyghenis, so nochtans dat si aen die ghereeschap des heylichdoms ende tot den outaer niet en comen, dat niet beyde si ende ghi en sterft,

4

Maer si sullen bi v zijn, dat si den dienst waken, aen den tabernakule des ghetuyghenissen in allen den dienste, Ende een vremdelinck en sal tot v niet comen.

5

Daeromme waect in den dienst der heiligher plaetsen, ende den dienst des outaers dat voort niet meer eenighe gramschappe en come ouer die kinderen van Israel,

6

want ick hebbe die Leuiten uwe broederen, v ghegheuen, van dat middele der kinderen van Israel, ende gheleuert den HEERE tot eender ghifte, dat si den dienst bedienen souden in sinen Tabernakule aender tenten des getuyghenissen,

7

Ghi ende uwe sonen met v, sult uwe priesterdom wachten, ende alle dat ghene dat tot den dienste des outaers behoordt, ende binnen dat cleedt is, ^* sal bedient worden bi den Priesteren,) Als een vremdelinck daer toe ghaet, dye sal dye doot steruen.

* th uwe priesterdom geue ic v tot een gaue,

8

Ende die HEERE seyde tot Aaron, Siet

[p. i6r]

ick heb v ghegheuen die bewaringhe mijnder eerster vruchten, ⁺ van al dat die kinderen van Israel heylighen, heb ick gheleuert v, ende uwen sonen tot een eewich recht voor den dienst des Priesterschaps,

+ B

9

Dat suldy nemen vanden ghenen dat gheheylicht wort, ende den HERE gheoffert, Alle offerhanden ende spijsoffer, so wat voor sonden ende misdaet mi ghegheuen wort, ende dat coemt int heylich der heylighen, dat sal v zijn ende uwen sonen,

10

In die alder heylichste plaetse suldijt eten, Alleen dat manlijck is, sal daer af eten, want het is den HERE gheheylicht,

11

Maer oock heb ick v ende uwen sonen ende uwen dochteren tot eenen eewighen rechte ghegheuen die ^* eerste vruchten) die die kinderen van Israel ghelouet ende gheoffert hebben, Wie dat suyuer is in uwen huyse, sal daer af eten,

* th. hefofferen der ghauen.

12

Alle vet der olijen, ende alle tvet des mosts ende korens haer eerstelinghen, die si den HERE offeren sullen, heb ick v ghegheuen,

13

Die eerste vruchten, van alle dat in haeren lande is, dat si den HERE brenghen, sal v zijn, Wie suyuer is in uwen huyse, sal daer af eten.

14

⁺Alle dat den HEERE wt ghelofte gheuen die kinderen van Israel, dat sal v zijn,

+ C

15

Alle dat zijn moeder ontdoet onder alle vleesch dat si den HERE offeren, het si mensche, oft vee, sal v met recht toebehooren, nochtans also dat ghi die eerste menschen vrucht sult laten lossen, ende die eerste vrucht van een onreyn vee, oock laten lossen,

16

Si sullent lossen alst een maent oudt is, ende ghi sullet te lossen gheuen om ghelt, om vijf sikels naer den sikel des Tabernakels, die sikel heeft .xx. ^* hellinghen,)

* the. Gera.

17

Maer een eerste vrucht van eenen osse, oft lamme, oft gheyte, en suldy niet te lossen gheuen, want si zijn den HERE gheheylicht, haer bloet suldy sprenghen opten outaer, ende haer vet suldy ontsteken tot een offer des soeten gheruecs den HERE,

18

haer vleesch sal v zijn, ghelijck die gheofferde borst, ende die rechte scoudere v is,

19

Alle eerste vruchten der heyligher plaetsen die die kinderen van Israel heylighen den HERE, heb ick v ghegheuen ende uwen sonen ende uwen dochteren met v tot eenen eewighen rechte, Dat sal v een souts verbont zijn, ⁺eewich voor den HEERE, v ende uwen kinderen met v.

+ Int hebre. heet een sout verbont, dat ghelijc dat sout dat vleesch behout onuerganckelijck, so sal dat verbont ooc onuerganclijc zijn so staet .ij.Para. xiij. God heeft Dauid dat rijck ghegheuen, ende den sinen met een sout verbont.

20

Ende die HEERE sprack tot Aaron, Ghi en sult in haeren lande niet besitten, oock gheen deel onder hen hebben, want ick ben v deel, ende v erfgoet onder die kinderen van Israel,

21

Den kinderen Leui hebbe ick alle thienden ghegheuen van Israel, tot een [kolom] erfgoet, voor haer diensten, die si mi doen inden Tabernakel des verbonts,

22

dat van hier voort, die kinderen van Israel, niet en ghenaken den Tabernakel des ghetuyghenis, ende gheen sonde (daerom si souden moeten steruen) meer en doen, ⁺

+ Deu. xiij.a

23

Maer die Leuiten sullen mi dienen inden Tabernakel, ⁺ ende si sullen des volcs sonden draghen, Dit sal een eewich recht zijn bi uwe nacomelinghen ^* in uwen gheslachten,

+ D

* th. ende si en sullen onder de kinderen van Israel gheen erfgoet besitten, want dat thiende der kinderen van Israel dat si den Heere heffen hebben th. den Leuiten tot een erfgoet gegheuen. Daerom heb ick tot hen geseyt dat si onder de kinderen van Israel gheen erfgoet en sullen besitten.

24

Anders en sullen si niet besitten te vreden zijnde metter offerhande vanden thienden, die welcke ick afghedeylt heb tot haere nootsakelicheden ende ghebruycke.)

25

Ende die HEERE sprack tot Moysen, segghende,

26

Ghebiedt den Leuiten, ende spreect tot hen, Als ghi die thiende neemt vanden kinderen van Israel, die ick v van hen ghegheuen heb ^*) offert die eerste vruchten daer af den HEERE, dat is, thiende deel der thienden,

* the. tot een erfgoet

27

dat v gherekent worde tot een offerande der eerster vruchten, ^* so wel vanden dorsuloer, als) vander wijnperssen,

* h. al waert vander leuere oft

28

ende van alle daer ghi thiende af ontfangt, suldy die eerstelinghen den HEERE offeren, gheeft die Aaron den Priester,

29

^* Alle wat ghi offeren sult wten thienden, ende dat ghi wtscheyden sult den HEERE tot ghiften, die sullen dat beste ende wtuercorenste zijn,)

* the. van al dat v ghegeuen wort suldy den Heere alderley hefoffer geuen van alle vette, dat daer af gheheyliget wort

30

Ende ghi sult tot hen segghen, Ist dat ghi dat schoonste ende beste offert wt uwen thienden, dat sal v gheacht worden, oft ghi die eerste dinghen van uwen dorschuloeren, oft wijnperssen ghegheuen haddet,

31

Ende sullet eten in alle uwe ende uwer kinderen steden, want het is uwen loon voor uwen dienst inden Tabernakel des ghetuychnis,

32

so en suldy daer aen gheen sonde op v brenghen, als ghi dat vette daer af voor v hout, op dat ghi niet en ontsuyuert die offerhanden der kinderen van Israel, ende ghi niet en sterft.

§ Hoe die roode koe voor die sonde ghebrant wert.