De Vorsterman Bijbel

§ Dat .xiij. Cap.

1

⁺DAer na trock dat volc van Hazeroth, ende maecten haeren legher in die woestijne ^* Pharan,)

+ A

* th. Paran.

2

Ende die HERE sprack tot Moysen aldaer, segghende,

3

Seynt mannen wt, die dat lant Canaan bespieden, dwelck ick den kinderen van Israel geuen sal, eenen man van elcken gheslachte haerder vaderen, die alle hooftluyden onder hen zijn,

4

Moyses santse wt der woestijnen Pharan, na den woorde des HEREN, die alle gader ouersten waren onder die kinderen van Israel, ende hieten also.

5

Sammua Zachur sone vanden gheslachte Ruben.

6

Saphat Huri sone van Simeons gheslachte.

7

Caleb Iephune van Iuda geslachte.

8

Igeal Iosephs sone vanden geslachte Isachar.

9

Osee Nuns sone vanden gheslachte Ephraim.

10

Vanden geslachte BenIamin, Phalti Raphu sone.

11

Vanden gheslachte Sabulon Geddiel Sodi sone.

12

Vanden geslachte Ioseph van Manasse Gaddi Sufi sone.

13

Ammiel Gamalli sone vanden gheslachte Dan.

14

Sthur Milchael sone van Aser gheslachte.

15

Nahabi Vaphsi sone van Nephtalim gheslachte,

[p. i3r]

16

Guel Machi sone van Gad gheslachte,

17

Dat zijn die namen der mannen die Moyses wt sandt, om te bespieden dat lant, Ende Ozee Nuns sone naemde hi Iosue.

18

⁺Als hijse sant om te bespieden dat lant Canaan, sprack hi tot hen, Trect op ten Zuyden waert, ende gaet op dat geberchte,

+ B

19

ende bespiet dat lant, hoe dattet is, ende dat volck dat daer inne woont, oft sterck oft swack is, luttel van ghetal oft veel is,

20

ende wat lant dattet is, daer si in woonen, oft goet of quaet si, ende wat steden dat zijn, daer si inne woonen, oft si met mueren bewaert zijn oft niet,

21

ende wat lant dat si, oft vet oft magher si, Ende oft boomen daer inne zijn oft niet, Weest ghesterct ende neemt die vruchten des lants. Het was recht in die tijt der eerster wijnbesien ^* wanneermen die rijpe druyuen mocht eten.)

[afbeelding]

* ten is niet int heb.

22

⁺Si ginghen op, ende bespieden dat lant van der woestijnen ^* Sin) tot Rehob, daermen te ^* Hemath) gaet,

+ C

* Deu. i.d the. Zin.

* h. hamath

23

Si ginghen oock op tegen den Zuyden, ende quamen tot Hebron, daer was Achiman, Sefai, ende Thalmai Enac kinderen Hebron was seuen iaren ghetimmert voor ^* Thanim) in Egypten,

* the. Zoan.

24

Ende si quamen tot aen die beke der druyuen, ende sneden af aldaer een wijnrancke, met eender druyuen, ende twee mannen droeghense op eenen stock, daer toe ooc granaet appelen, ende vijghen,

25

Die plaetse heet, die beeck Escol, ⁺ om der druyuen wille, die die kinderen van Israel daer af sneden.

+ Escol, dat is een druyue.

26

Ende si keerden weder na veertich daghen, als si dat lant bespiet hadden,

27

Si ginghen, ⁺ ende quamen tot Moysen ende Aaron, ende tot alle die ghemeynte van Israel, in die woestijne Pharan te Kades, ende si seyden hen, ende der gantser ghemeynten hoet daer stont, Ende si lieten hen sien die vruchten des lants,

+ D

28

ende verteldent hen, ende spraken, Wi zijn int lant ghecomen, daer ghi ons sont, dat warachtelijck van melcke ende honich vloeyt, als ghi sien moecht bi haer vruchten,

29

sonder dat daer sterck volck inne woont, ende zeer vaste ende groote steden daer zijn, ende wi saghen [kolom] oock Enacs kinderen aldaer,

30

Die Amalechiten woonen int lant teghen dat Zuyden, Die Hethiten, ende Iebusiten, ende Amoriten, woonen op dat gheberchte, Die Cananiten woonen aen die zee, omtrent die Iordane.

31

Caleb stilde hierentusschen tvolck dat teghen Moysen opstaende was, ende sprack tot hen, Laet ons op trecken, ende dat lant in nemen, want wi sulllent wel verweldighen,

32

Maer die mannen die met hem op ghetrocken waren, spraken, Wi en zijn niet machtich op te trecken teghen dat volck, want si zijn ons te sterck,

33

Ende si maecten een quaet gheruchte, ende seyden veel quaets onder die kinderen van Israel, vanden lande dat si bespiet hadden, ende seyden, Dat lant daer wi door ghegaen zijn om te bespieden, verslint zijn inwoonders, Ende alle dat volck dat wi daer in saghen, zijn luyden van grooter lengden.

34

Wi saghen oock sommighe ^* monstren) aldaer Enaks kinderen vanden ^* ruesen) gheslachte, ^* wi daer bi gheleken scheenen sprinckhanen te sine.)

* h. tyrannen

* h. tyrannen.

* the. ende wi waren voor onse oogen als sprinchanen, ende also waren wi oock in haeren ooghen

§ Hoe dat volck weent, ende murmureert door mistroost, dien si hadden van dat lant, dat si hadden laten bespien, ende die bespieders steruen. Ende den strijt teghen Amalec.