De Vorsterman Bijbel

§ Dat .vij. Capit.

1

⁺ENde het is ghebuert in dien daghe als Moyses volmaect hadde den tabernakel, so heeft hijt opgeheuen ende gesalft ende geheylicht met allen zijn vaten, den altaer desgelijcs, ende alle zijn ^* vaten,)

+ A

* the. gereeschap ghesalft ende geheylicht.

2

Ende de princen van Israel ende hoofden der huysgesinnen, die ouer elck bisonder gheslachte waren gestelt ouerste der ghenen die ghetelt waren,

3

offerden haer gauen voor den HEERE, ses ouerdecte wagens met twaelf ossen, Eenen wagen offerden twee vorsten ende een yegelijc eenen osse ende brachtense tot offer in, voor den Tabernakel.

4

Ende die HEERE sprack tot Moysen,

5

Nemet van hen, op dattet diene totten dienste des ^* tabernakels) ende geuet den Leuiten, eenen yegheliken na sinen dienste,

* the. tabernakels des getuyghenis

6

Doen nam Moyses die waghenen, ende runderen, ende gafse den Leuiten

7

twee wagenen ende runderen gaf hi Gerzons kinderen na haeren dienst,

8

Ende vier wagenen ende acht ossen gaf hi den kinderen Merari, na haeren dienste, onder Ithamars hant Aarons des priesters sone,

9

Maer Kahats kinderen en gaf hi gheen waghens noch ossen, om dat si in die heylige plaetse dienden ende haere lasten op haer scouderen dragen moesten.

10

Ende die hooftluyden offerden totter inwijdinghe des altaers, inden dage dat den altaer ghesalftwert, ende si offerden haer ghauen voor den altare,

11

Ende de HEERE sprac tot Moysen, Laet elcken hooftman in sinen besonderen daghe sinen offer brengen totter inwidinghe des altaers.

12

⁺Inden eersten daghe offerde Naason die sone Aminadab vanden gheslachte Iuda zijn gaue,

+ B

13

ende was dese, een silueren scho-[kolom]tel, hondert ende dertich sikel weghende, een silueren schale, tseuentich sikel weghende, na den ghewichte der heyligher plaetsen, beyde vol van bloemen vanden mele met olie gemenghet tot eenen spijsoffer,

14

daer toe een gulden ^* mortierken) thien sikelen gouts weghende vol ruecwercs om te ontsteken,

* theb. lepel

15

Eenen osse vanden runderen, eenen ram een iarich lam tot eenen brantoffer,

16

Eenen bock voor eenen offer voor de sonde,

17

Ende tot eenen offer der vreedsamigher, twee runderen, vijf rammen, vijf bocken, vijf iarige lammeren, Dat was Naasons Aminadabs soons offerhande.

18

Inden tweeden dage offerde Nathanael de sone van Zuar, die hooftman vanden geslachte Isachar,

19

Een silueren scotel, .c. ende dertich sikel wegende, Een silueren scale, tseuentich sikel weghende, na den gewichte der heyligher plaetsen, beyde vol bloemen vanden mele met olie ghemenghet tot eenen spijsoffer,

20

Daer toe een gulden ^* mortierken) thien sikel gouts wegende, vol ruecwercs om te ontsteken,

* theb. lepel.

21

Eenen osse vander cudde der runderen, eenen ram, een iarich lam, tot eenen brantoffer,

22

Eenen bock tot een offer voor die sonde,

23

Ende tot eenen offer der vreedsamiger twee runderen, vijf rammen, vijf bocken, ende vijf iarighe lammeren, ⁺ Dat was Nathanaels gifte Zuars sone.

+ C

24

Inden derden daghe offerde die hooftman der kinderen Sabulon Heliab Helons sone,

25

zijn ghifte was een silueren scotele hondert ende dertich sikels weghende, Daer toe een silueren scale tseuentich sikel weghende na dat ghewichte der heyligher plaetsen, beyde vol van bloemen vanden mele met olie ghemenghet tot eenen spijsoffer,

26

Daer toe een gulden ^* mortierken) thien sikel gouts wegende, vol ruecwercs om te ontsteken

* theb. lepel.

27

Eenen osse vanden runderen der cudden, eenen ram, een iarich lam tot eenen brantoffer

28

Eenen boc tot een sondoffer,

29

Ende tot een vreedsamige offer, twee runderen, vijf rammen, vijf bocken, ende vijf iarige lammeren, Dat was Eliabs Helons sone offerhande.

30

Inden vierden dage die hooftman der kinderen Ruben, Elizur Sedeur sone offerde

31

zijn gifte, een silueren scotel .c. ende .xxx. sikels wegende, Een silueren scale .lxx. sikels wegende, na den gewichte van die heylige plaetse, beyde vol bloemen vanden mele met olie gemenct tot eenen spijsoffer,

32

Daer toe een gulden ^* mortierken) thien sikel gouts wegende vol ruecwercs om te ontsteken,

* theb. lepel.

33

Een osse vander cudde der

[p. h8r]

runderen, eenen ram, een iarich lam, tot eenen brantoffer,

34

Eenen bock tot een sondoffer,

35

Ende tot eenen vreedsamigen offer .ij. runderen .v. rammen, vijf bocken, ende vijf iarige lammeren, Dat was Elizur Sedeurs sone offerhande.

36

Inden vijfsten dage die hooftman der kinderen Simeon ^* Salamiel) Zuri Saddai sone

* the. Selumiel

37

offerde zijn ghifte, Een silueren schotel, hondert ende .xxx. sikels wegende, een silueren schale .lxx. sikels wegende, naer tghewichte der heyligher plaetsen, beyde vol bloemen vanden mele met olie gemengt, tot een spijsoffer

38

Daer toe een gulden ^* mortierken) tien sikel gouts waert, vol rucwercs, om aentesteken

* the. lepel

39

Eenen osse wten kudden der runderen, eenen ram, een iarich lam tot eenen brantoffer,

40

Eenen bock tot eenen sondoffer,

41

Ende totten vreedsamen offer, twee runderen, vijf rammen, vijf bocken, ende vijf iarige lammeren, Dat is ^* Salamiels) Zuri Saddai sone offerande.

* theb. Selumiel

42

Inden sesten dage, die hooftman der kinderen Gad, Eliasaph Duels sone

43

offerde zijn gifte, ⁺ Een silueren schotel hondert ende .xxx. sikels wegende, Een silueren scale. lxx. sikels weghende, naer tghewichte der heyligher plaetse, beyde vol bloemen vanden mele met olie gemenghet tot een spijsoffer,

+ D

44

Daer toe een ghulden ^* mortierken) thien sikel gouts wegende vol ruecwercs om te aensteken,

* the. lepele.

45

Eenen osse vander kudde der runderen, eenen ram een iarich lam tot eenen brantoffer,

46

Eenen bock tot eenen offer voor de sonde,

47

ende totten vreedsaemoffer twee runderen, vijf rammen, .v. bocken, vijf iarige lammeren, Dat was Eliasaphs Duels sone offerhande.

48

Inden seuensten dage die hooftman der kinderen Ephraim, Elisama Amihud sone

49

offerde zijn ghifte, Een silueren schotel, hondert ende .xxx. sikels wegende, Een silueren schale lxx. sikels wegende, ⁺ naer dat ghewichte der heyliger plaetsen, beyde vol bloemen vanden mele met olie gemengt totten spijsoffer,

+ E

50

Daer toe een gulden ^* mortierken) thien sikel gouts wegende vol rueckwercs om te aensteken,

* theb. lepele

51

Eenen osse wt der runderen kudde, eenen ram een iarich lam tot eenen brantoffer,

52

Eenen bock tot een sondoffer,

53

Ende totten vreedsamigenoffer .ij. runderen .v. rammen .v. bocken .v. iarige lammeren, Dat was Elisama Amihud sone offerhande.

54

Inden achtsten dage de hooftman der kinderen Manasse Gamaliel ^* Phadazur) sone

* the. Pedazur

55

offerde zijn ghifte, Een silueren schotel .c. ende .xxx. sikels weghende, Een silueren scale tseuentich sikel wegende naer den ghewichte der heyliger plaetsen, beyde vol [kolom] bloemen vanden mele met olie gemengt totten spijsoffer,

56

Daer toe een gulden ^* mortierken,) thien sikel gouts weghende vol ruecwercs, om te aensteken,

* theb. lepele

57

Eenen osse wt die cudde der runderen, eenen ram, een iarich lam, tot eenen brantoffer,

58

Eenen bock totten sondoffer,

59

Ende totten vreedsamighen offer, twee runderen, vijf rammen, vijf bocken, vijf iarighe lammeren, Dat was Gamaliels ^* Phadazur) sone offerhande.

* h. pedazur

60

Inden negensten dage de hooftman der kinderen Beniamin Abidan ^* Gedeons) sone

* theb. Gideons

61

offerde zijn gifte, Een silueren scotel .c. ende .xxx. sikel wegende, Een silueren scale .lxx. sikel wegende, naer tghewichte der heyligher plaetsen beyde vol bloemen vanden mele met olie gemengt tot een spijsoffer,

62

Een gulden ^* mortierken,) thien sikel ghouts weghende vol ruecwercs om te aensteken,

* the. lepele.

63

Eenen osse van der runderen kudde, Eenen ram, Een iarich lam totten brandtoffer,

64

Eenen bock totten sondoffer,

65

Ende totten vreedsamighen offer, twee runderen, vijf rammen, vijf bocken, vijf iarighe lammeren, Dat was Abidans ^* Gedions) sone offerhande.

* the. Gideons

66

Inden thiensten dage, die hooftman der kinderen Dan, ⁺ Ahiezer Ammi Saddai sone

+ F

67

offerde zijn gifte, Een silueren schotel .c. ende .xxx. sikel wegende, Een silueren schale .lxx. sikel weghende, naer tghewichte der heyligher plaetsen, beyde vol bloemen vanden mele, met olie gemengt tot eenen spijsoffer,

68

Een gulden ^* mortierken), thien sikel gouts wegende vol ruecwercs, om te aensteken,

* theb. lepele

69

Eenen osse vander runderen kudde, Eenen ram, een iarich lam totten brantoffer,

70

Eenen boc tot een sondoffer,

71

Ende totten offer der vreedsamigher .ij. runderen .v. rammen .v. bocken .v. iarige lammeren, Dat was Ahiezer Ammi Saddai sone offerhande.

72

Inden elfsten dage, die hooftman der kinderen Aser ^* Phegiel) Ochran sone

* the. Pagiel

73

offerde zijn gifte, Een silueren schotel .c. ende .xxx sikel wegende, Een silueren schale tseuentich weghende, naer tghewichte der heyligher plaetsen, beyde vol van bloemen vanden mele, met olie gemenget, tot eenen spijsoffer,

74

Een gulden ^* mortierken) thien sikelen gouts weghende vol ruecwercs om aentesteken.

* theb. lepele

75

Eenen osse vander runderen cudde, Eenen ram, een iarich lam tot eenen brantoffer

76

Eenen boc tot eenen sondoffer,

77

ende totten vreedsamen offer, twee runderen, vijf rammen, vijf bocken, vijf iarige lammeren, Dat was ^* Phegiel) Ochrans sone offerhande.

* th. Pagiel

78

Inden twaelfsten daghe, Die hooftman

[p. h8v]

der kinderen Nephtali Ahira Enan sone,

79

offerde zijn ghifte, een silueren scotel, hondert ende dertich Sikel weghende, Een silueren schale tseuentich Sikel weghende naer tgewichte des heylichdoms, beyde vol bloemen vanden mele met olye ghemenghet, tot eenen spijsoffere,

80

Een gulden ^* mortierken) thien Sikel gouts wegende vol ruecwers om aen te steken,

* the. lepele.

81

Eenen osse vanden runderen, Eenen Ram, Een iarich Lam tot eenen brantoffer,

82

Eenen bock tot eenen offer voor die sonde,

83

Ende tot eenen vreedsaemoffer, twee runderen, vijf rammen, vijf bocken, vijf iarighe lammeren, Dat was Ahira Enans sone offerhande.

84

⁺Dese dinghen zijn in die wijdinghe des outaers inden dach doen hi ^* gheheylicht) is gheoffert vanden hooftluyden van Israel, Twaelf silueren schotelen, twaelf silueren schalen, twaelf ghulden ^* mortierkens),

+ G

* the. gesalft

* the. lepelen

85

Also dat een scotel hondert ende dertich Sikels siluers, een schale tseuentich Sikels hadde, dat die somme van alle den silueren vaten droech, twee duysent vier hondert Sikels naer den ghewichte der heyligher plaetsen

86

Ende die twaelf gulden ^* mortierkens) vol ruecwercs, so hadde elc ^* mortierken) thien Sikel, naer den ghewichte der heyligher plaetsen, dat die somme gouts vanden ^* mortierkens) droech hondert ende twintich sikels.

* the. lepelen

* the. lepele

* the. lepelen

87

Die somme der runderen totten brantoffer was, twaelf ossen, twaelf Rammen, twaelf iarighe lammeren, met haeren spijsoffer, Ende twaelf bocken, tot offerhande voor die sonde,

88

Ende die somme der runderen tot den offer der vreedsamen, was vier ende twintich ossen, tsestich rammen, ende tsestich bocken, tsestich iarighe lammeren, Dat is gheoffert in die wijnghe des outaers, als hi gesalft wert.

89

Ende als Moyses inden tabernakel des verbonts ghinck, om raet te vraghen, van Gods antwoorde, so hoorde hi die stemme tot hem spreken, vanden ghenaden stoel, die op die Arcke des getuyghenis was tusschen die twee Cherubim, van daer werdt met hem ghesproken.

§ Hoe den candelaer ghestelt wert ende was, Ende hoe die Lauiten selue gheoffert werden vanden kinderen van Israel, ende haer ouderdom.