De Vorsterman Bijbel

§ Dat .viij. Capittel.

1

⁺ENde die HEERE sprack tot Moysen, segghende,

+ A

2

spreect tot Aaron ende segt hem, ^* Als ghi die seuen bernende lichten gestelt hebt, so suldy den candelaer int zuyden oprechten, Daeromme ghebiedt hem dit, [kolom] datdie bernende lichten ghekeert zijn teghen die noortside te sien aen die tafel daer die thoonbrooden op ligghen, ende si sullen lichten teghen die side daer den candelaer toe ghekeert is)

* the. als ghi die lampen stellet, soo steltse, dat si alle seuen totten candelaerwaert lichten

3

Ende Aaron dedet also ende sette die lampen op teghen den candelaerwaert also die HEERE Moysi gheboden hadde,

4

Dat werck vanden candelaer was van gesmeden goude, beyde de siden met sinen middelsten staet, ende die dingen die daer wt quamen wt beyde die siden der schachten, naer tbeworp dat die HEERE Moysi ghetoont hadde, alsoo maecte hi den candelaer.

5

⁺Ende die HEERE sprack tot Moysen seghende,

+ B

6

Neemt die Leuiten, van dat midden der kinderen van Israel, ende ghi sultse reynigen,

7

in deser manieren, Ghi sultse besprenghen met watere der suyueringhen ende scheeren alle dat har haers vleeschs af, ende als si haer cleederen ghewasschen hebben, ende ^* ghesuyuert zijn)

* the. so zijn si suyuere Dan

8

sullen si nemen eenen osse wter kudden, ende zijn spijsoffere, met tarwen bloemen die met olie gemenghet zijn, Eenen anderen osse vander kudden suldy totten offer voor die sonde nemen.

9

Ende ghi sult die Leuiten voor den tabernakel des verbonts brengen, ende alle die gheheel ghemeynte van Israel verghaderen,

10

ende die Leuiten voor den HEERE, brengen, Ende die kinderen van Israel sullen haer handen op die Leuiten legghen,

11

ende Aaron sal die Leuiten offeren den HEERE, tot eender ghiften vanden kinderen van Israel, op dat si dienen moghen in den dinst des HEEREN.

12

⁺Ende die Leuiten sullen haer handen op der ossen hoofden leggen, waer af ghi den eenen suldt tot een sondoffere, ende den anderen tot eenen brantoffer, den HEERE bereyt maken, op dat ghi voor hen biddet,

+ C

13

Ende ghi sult den Leuiten voor Aarons ende zijnder sonen aenghesichte stellen, ende sultse den HEERE geoffert heylich maken,

14

ende ghi sultse also scheyden vanden kinderen van Israel, dat si mijn zijn,

15

Daer na sullen si in ghaen inden tabernakel des verbonts, dat si mi dienen, Alsoo suldise suyueren, ende wijden tot een offerhande den HEERE, Want si zijn mijn ghifte vanden kinderen van Israel,

16

ende ick hebse mi genomen, voor die eerste gheboren van alle den kinderen van Israel die eerste van der moeder geboren worden.

17

Want alle eerstegheboren onder die kinderen van Israel is mijne, beyde vanden menschen ende vanden vee, van dier tijt aen

[p. i1r]

dat ick alle eerstgeboren in Egypten landt versloech, ende heylichdese mi,

18

ende ic nam die Leuiten aen voor alle eerstegheboren onder die kinderen van Israel,

19

ende ic gafse tot eender ghiften Aaron ende sinen sonen vanden kinderen van Israel, dat si mi dienen souden, voor Israel, inden tabernakel des verbonts ende dat si voor die kinderen van Israel bidden, op datter niet en come eenige plage onder die kinderen van Israel, ^* oft si stout waren te gaen) tot die plaetse des heylichdoms.

* theb. oft si wilden gaen

20

⁺Ende Moyses ende Aaron met al die gemeynte der kinderen van Israel, deden met den Leuiten, also die HEERE Moysi geboden hadde,

+ D

21

Ende die Leuiten suyuerden hen, ende wiesschen haer cleederen, ende Aaron hiefse op voor den HEERE, ende badt voor hen

22

dat si souden worden gesuyuert, op dat si souden ingaen, om haeren dienst te doene, inden tabernakel des verbonts, voor Aaron ende zijn sonen, So die HEERE Moysi geboden hadde vanden Leuiten, alsoo deden si met hen.

23

Ende die HEERE sprac tot Moysen, seggende,

24

Dat is die wet der Leuiten, Vanden xxv. iaren ende daer ouer sullen si ingaen, ^* dat si dienen inden Tabernakel des verbonts,

* the. onder dat heyr totten dienst des tabernakels des getuyghenis, Maer vanden vijftechsten iare aen, sullen si wijcken vanden heyre des diensts, ende en sullen nyet meer dienen maer wachten den dienst haerder broederen, inden tabernakel des getuygenis,

25

ende als si vijftich iaren veruult hebben van haeren ouderdom, soo sullen si ophouden, van dienen,

26

ende sullen haerder broeders dienaers wesen inden tabernakel des verbonts dat si bewaren, dat hen beuolen wort) maer die wercken en sullen si niet doen, Dus suldy beschicken die Leuiten in haer waken.

§ Hoe die suyuere, ende onsuyuere moesten Paesschen houden, Ende die wolcke die den tabernakel bedecte, ende den heyrlegher leyde.