De Vorsterman Bijbel

§ Dat .vi. Capit.

1

⁺ENde die HEERE sprack tot Moysen seggende,

+ A

2

⁺ Spreect totten kinderen van Israel, ende segt tot hen, Als een man oft een vrouwe een gelofte gedaen heeft, om gheheylicht te worden, ende willen hen seluen den HEERE heylighen,

+ Int hebre. heetmen Nezer dese wijdinge, heyliginge, of afsceydinge, te weten van stercken drancke, ende diese hout heet Nazir dat is Nazarenus, daer na heetet onse HERE Iesus Christus Nazarenus

3

die sullen hen onthouden van wijne ende wijn edic, ende van alle andere drancken, ende van alle dat droncken maken mach, oock wat wt wijnbesien gheperst wort, en sullen si niet drincken,

4

versce noch drooge wijnbesien en sullen si niet eten so lange als zijn afscheydinge wt gelofte duert, Ooc en sal hi niet eten, datmen vanden wijnstock maect, vander wijnkeernen aen tot aen die basten.

5

Also lange als zijn afsceydinge duert, en sal geen schaers op zijn hooft comen, tot dat die tijt wt is, ⁺ die hi den HEERE ghewijt is, Hi sal heylich zijn ^* te wile dat den cranse zijns hoofts wasset)

+ B

* theb. ende sal thar zijns hoofts laten wassen ende bloot staen.

6

Alle die tijt ouer dien hi den HEERE geheylicht is, en sal hi tot geenen dooden gaen,

7

Hi en sal hem ooc niet onreynich maken aen die doot zijns vaders, zijns moeders, zijn broeders, ofte zijns su-[kolom]sters, want die heylicheyt zijns Gods is op zijn hooft,

8

ende alle die tijt zijnder afsceydingen sal hi den HEERE heylich zijn.

9

Ende oft yemant voor hem onuersiens bottelic sterft, so sal dat hooft zijnder heylinghe onreyn worden, ende daerom sal hi zijn hooft besceren inden dage zijnder reyningen, ende wederom inden seuensten dage,

10

Ende ten .viij. dage sal hi ij. tortelduyuen offeren, oft .ij. ionge duyuen ^* totten inganc des verbonts) des getuychnis

* the. aendie duere des tabernakels.

11

Ende de priester sal deen tot eenen sondoffer bereyden, ende dander tot eenen brantoffer, ende sal voor hem bidden, om dat hi hem aen eenen dooden besondicht had, ende alsoo zijn hooft inden seluen dage heyligen,

12

ende hi sal den HERE in dien tijt zijnder afsceydingen worden gewijt, ende sal een iarich lam brengen tot een sondoffer, so nochtans dat de voorleden dagen sullen te niet bliuen, daerom dat zijn widinghe onreynich is gheworden.

13

⁺Dit is die wet des genen die afgesceyden geheylicht wort, Als die tijt zijnder afsceydingen wt is, so salmen hem brengen voor de duere des tabernakels des verbonts,

+ C

14

Ende hi sal offeren sinen offer den HEERE een iarich lam ombesmet tot eenen brantoffer, ende een iarich scaep sonder smet tot eenen sondoffer, ende eenen ram ombesmet tot een vreedsame offerhande,

15

ende eenen korf, met ongeheefde koecken, van bloemen van mele met olie ghemengt, ende ongeheefde vladen met olie gesalft, ende yegelijcs bisonder vochtighe offerhande.

16

Ende die priester salt voor den HEERE offeren, ende doen een offer voor die sonde, ende een om heel te verbranden,

17

Maer den ram sal hi doen tot een vreedsame offerhande den HEERE, ende sal mede offeren eenen korf ongheheefts broots, ende die vochtighe offerhanden diemen van gewoonten sculdich is,

18

Ende sal den Nazareum dat hooft zijnder wijdinghen scheren, ⁺ voor die duere des tabernakels des verbonts, ende sal dat har nemen, ende opt tvier worpen dat onder die vreedsame offerhande is,

+ D

19

Ende sal die gekoocte scouder nemen vanden ram ende eenen ongeheefden koeck wt den korf, ende een ongheheefde vlade, ende salt den Nazareum op zijn hant legghen, nae dien dat zijn hooft gheschoren is,

20

ende als hijt wederom van hem ontfanghen heeft, soo sal hijt opheffen int aensicht des HEEREN, ende die gheheylichde spijsen sullen den priestere toe behooren, Ghelijckerwijs als die borste die gheboden is af te scheyden, ende ooc die dgye, Daer nae mach die Nazareus wijn drinc-

[p. h7v]

ken,

21

Dat is die wet des Nazareus die sinen offer den HEERE gelouet inden tijt van zijnder wijdinghe, buyten dat zijn hant verweruen can, So hi gelouet heeft so sal hi doen nae die volmaectheyt van zijnder heylichmakinghe.

22

Ende die HEERE sprack tot Moysen segghende,

23

Segt Aaron ende sinen sonen ende spreect Alsoo suldi segghen tot den kinderen van Israel, als ghise gebenedijt.

24

☞ Die HEERE ghebenedie v ende behoede v,

25

Die HEERE vertoone v zijn ansicht, ende si v ghenadich.

26

Die HEERE keere zijn aensichte tot v, ende gheue v vrede,

27

ende si sullen minen naem op die kinderen van Israel ^* aenroepen,) ende ick salse ghebenedien.

* th. legghen.

§ Hoe die ouerste ende hoofden der kinderen van Israel na elcken gheslachte elc zijn ghiften brachten