De Vorsterman Bijbel

[p. h4r]

§ Hier beghint Numerus dat boeck des ghetaels, dat vierde boeck Moysi.

§ Hoet gheboden wert datmen die strijtbaer mannen tellen soude.

§ Dat eerste Capittel.

1

⁺ENde die HEERE sprac tot Moysen in die woestyne Sinay inden Tabernakel des verbonts opten eersten dach vander tweeder maent, inden tweeden iare, na dat si wt Egypten ghegaen waren, segghende,

+ A

2

Neemt die somme vander geheelder vergaderinghe der kinderen van Israel, na haeren gheslachten, ende haerder vaderen huysen, biden ghetale der namen, Al wat manlijck is van hoofde tot hoofde,

3

van twintich iaren ende daer ouer, alle die bequaem zijn om int heyr van Israel te trecken, ende sultse tellen van haeren heyren, ghi ende Aaron,

4

ende met v sullen wesen ^* die Vorsten der gheslachten, ende huysen in haeren maesschapen, ende naeste gheboorten,

* The. van elcken geslachte een vorst ouer zijns vaders huse. Dit zijn die namen der mannen die met v staen sullen

5

van welcken dit die namen zijn.)

Van Rubens gheslachte si Eliezur Sedeurs sone,

6

Van Simeon si Salumiel, Zuri Sadai sone,

7

Van Iuda si Nahason, Aminadabs sone,

8

Van Isachar si Nathanael, Zuar sone,

9

Van Sabulon si Eliab Helon sone,

10

Van Ioseph kinderen van Ephraim, Elisama, Ammihud sone, Van Manasse Gamael Phadan Sur sone,

11

Van BenIamin Abidan Gideons sone,

12

Van Dan Ahieser Ammi Sadai sone,

13

Van Aser Phagiel Echrans sone,

14

Van Gad Eliasaph Duels sone,

15

Van Naphthali Ahira Enau sone.

16

⁺Dese zijn die alder edelste Ouersten der ghemeynten, die hooftlieden door haer gheslachten ende maesschappen, ende Vorsten in Israel waren,

+ B

17

die welcke Moyses ende Aaron namen, met die gheheele ghemeynte ende menichte des ghemeyns volcs,

18

ende vergaderdense inden eersten daghe der tweeder maent, ende rekendese na haerder geboorten, na haeren gheslachten, ende haerder vaderen huysen, met haeren namen, van twintich iaren, ende daer ouer van hooft tot hooft

19

so die HEERE Moysi gheboden hadde, ende si zijn ghetelt in die woestyne Sinay.

20

Die kinderen van Ruben, Israels eerste sone, door haer maesscap ende geslachte na haerder vaders huysen ^* ende die namen) van haer hoofden yeghelijck bysonder, al watter manlijck was, van twintich iaren ende daer ouer, totten strijde bequaem,

* th. ende tghetal der namen.

21

werden ghetelt vanden gheslachte Ruben, ses [kolom] ende veertich duysent, ende vijf hondert.

22

⁺Van Simeons kinderen na haeren gheslachten ende huysghesinnen, na haerder vaders huysen, ende dat ghetal der namen van hooft tot hooft, al wat manlijck was, van twintich iaren ende daer ouer, ende dat totten strijde te trecken bequaem was,

+ C

23

werden ghetelt van Simeons gheslachte neghenen vijftich duysent, ende driehondert.

24

Gads kinderen door haer gheslachte ende huysghesinnen, na haerder vaders huysen, in dat ghetal der namen van twintich iaren ende daer ouer, wat int heyr te trecken bequaem was,

25

werden getelt in Gads gheslachten vijfenueertich duysent seshondert ende vijftich

26

Die kinderen van Iuda haer gheslachte ende huysghesinnen, na haers vaders huysen, ende dat ghetal der namen van twintich iaren ende daer ouer, al wat in dat heyr te trecken bequaem was,

27

werden ghetelt vanden gheslachte Iuda vierentseuentich duysent, ende ses hondert.

28

⁺Die kinderen van Isachar, haer gheslachten ende huysgesinnen na haerder vaders huysen, ende na dat ghetal der namen van twintich iaren ende daer ouer, wat in dat heyr te trecken bequaem was,

+ D

29

werden ghetelt vanden gheslachte van Isachar vier ende vijftich duysent, ende vierhondert.

30

Die kinderen van Sabulon haer gheslachte ende huysghesinne na haers vaders huysen, in dat ghetal der namen van twintich iaren ende daer ouer, wat in dat heyr te trecken bequaem was,

31

wert ghetelt van Sabulons gheslachte seuenenvijftich duysent ende vierhondert.

32

Iosephs kinderen van Ephraim, haer geslachte ende huysgesinne, na haers vaders huys in dat ghetal der namen van twintich iaren ende daer ouer, wat int heyr te trecken bequaem was,

33

werden ghetelt van Ephraims gheslachte veertich duysent, ende vijf hondert.

34

Die kinderen van Manasse, haer gheslachte ende huysgesinne na haers vaders huys, in dat ghetal der namen van twintich iaren ende daer ouer, dat int heyr te trecken bequaem was,

35

werden ghetelt totten geslachte Manasse, tweendertich duysent, ende twee hondert.

36

⁺Die kinderen van BenIamin haer gheslachte ende huysgesinne, na haers vaders huys in dat ghetal der namen van twintich iaren ende daer ouer, wat int heyr te trecken

+ E

[p. h4v]

bequaem was,

37

werden ghetelt totten gheslachte BenIamin vijfendertich duysent, ende vierhondert.

38

Die kinderen van Dan haer gheslachte ende huysghesinne, ⁺ na haers vaders huys in dat ghetal der namen van twintich iaren ende daer ouer, watter bequaem was om int heyr te trecken,

+ Iupiter Saturnus des conincs sone, ende sinen vader veriagende door veel quade daden doorluchtich, wert hi vanden heydenen een god genaemt.

39

werden ghetelt totten gheslachte Dan, tweentsestich duysent, ende seuen hondert.

40

Die kinderen Aser haer gheslachte ende huysghesinne haers vaders huys, in dat ghetal der mannen van twintich iaren ende daer ouer, wat int heyr te trecken bequaem was,

41

werden ghetelt totten gheslachte Aser ^* veertich duysent, ende duysent .v. hondert).

* The. een ende veertich duisent ende vijfhondert

42

Die kinderen van Nephthali haer gheslachte ende huysghesinne, na haers vaders huys, ⁺ in dat ghetal der namen van twintich iaren ende daer ouer, dat int heyr trecken mochte,

+ F

43

werden ghetelt totten gheslachte Nephthali, drienvijftich duysent, ende .cccc.

44

Dit zijn si die Moyses ende Aaron metten twaelf Vorsten van Israel telden, elck was ouer een zijns vaders huys.

45

Ende die somme der kinderen van Israel na haerder vaderen huysen, van twintich iaren, ende daer ouer, wat int heyr trecken mochte onder Israel,

46

die was ses mael hondert duysent, ende drie duysent, vijf hondert, ende vijftich.

47

Maer die Leuiten na haerder vaders gheslachten, en werden daer onder niet getelt.

48

⁺Ende die HEERE sprack met Moysi segghende,

+ G

49

Dat gheslachte Leui en suldy niet tellen, noch haer somme nemen onder die kinderen van Israel,

50

Maer ghi sultse ordineren totten Tabernakel des ghetuychnis ende tot alle der ghereetschappen, ende tot alle dat daer toebehoort, Ende si sullen den Tabernakel draghen, ende alle die ghereetschap, ende sullen inden dienste staen, ende haeren leghere daer om maken,

51

Ende alsmen reysen sal, so sullen die Leuiten den Tabernakel afnemen, Maer alsmen theyre legeren sal, sullen si den Tabernakel opslaen, So wie dat vanden vremden daer toe gaet, die sal steruen,

52

Die kinderen van Israel sullen haeren legher maken, een yeghelijck in sinen legher, ende by die baniere van zijnder scharen.

53

Maer die Leuiten sullen haeren legher maken om den Tabernakel des ghetuychnis, op dat gheen gramschap en come ouer die ghemeynte der kinderen van Israel, daeromme sullen die Leuiten houden die wake, aen den Tabernakel des ghe-[kolom]tuychnis,

54

Ende die kinderen van Israel dedent altemale, also die HEERE Moysi geboden hadde.

§ Hoe dat Israel hueren legher stelden al omme den Tabernakele des ghetuychnis, ende van die Ouersten van hueren gheslachten.