De Vorsterman Bijbel

Dat .xxvij. Capit.

1

⁺ENde die HEERE sprack tot Moysen seggende,

+ A

2

Spreect totten kinderen van Israel, ende segt hen, Als iemant den HEERE een bisonder gelofte doet, ende den HERE zijn ziele gelouet, so sal hi nader werderinge den prijs geuen,

3

Ist een man van twintich iaren out tot in dat sestichste iaer, so sal hi vijftich sikels, na den sikel der heyliger plaetsen geuen,

4

een wijf dertich sikel,

5

Is hi

[p. h3v]

vijf iaer out tot twintich iaren, so sal die man genen twintich sikels, Maer een wijf, thien sikels,

6

Van eender maent oft vijf iaren, sal een knechtken geuen vijf sikels, een vrouwe, drie,

7

Is hy .lx. iaer oudt oft daer ouer, so sal die man gheuen vijfthien sikels, een wijf, thien sikels,

8

Is hy te arm, ende sulcke schattinge niet en soude connen betalen, so sal hi voor den priester staen, ende soo veel als hy werdeert ende siet dat hi geuen mach, alsoo veel sal hi gheuen.

9

Maer ist dat yemant eenich dier datmen den HEERE offeren mach, ⁺ ghelouet heeft dat is heylich,

+ B

10

men en sal dat niet wisselen, noch mangelen, een goet om een quaet, oft een quaet om een goet, Wisselet yemant een beeste om die andere, so sullen si alle beyde den HEERE geheylicht zijn,

11

Maer ist dat yemant ghelouet heeft, een dier dat onreyn is, datment den HEERE niet offeren en mach, so salment voor den priester stellen,

12

ende die priester salt scatten oft goet oft quaet is, ende het sal bi des priesters schatten bliuen,

13

Maer wilt hi dat ^* gheuen,) hi diet offert, die sal den vijfsten deel bouen die scattinghe gheuen.

* the. lossen.

14

⁺Als yemant zijn huys Gode gelouet ende gheheylicht heeft den HEERE, soo salt die priester besien oft goet oft quaet is, Ende na dattet die priester schattet, so salt blyuen,

+ C

15

Ende oft die ghene diet ghelouet heeft lossen wilt, soo sal hi den vijfsten deel ouer dattet gheschat is, daer op geuen, soo salt zijn worden.

16

Maer ist dat yemant een stuc ackers den HEERE heylicht van sinen erfgoede, soo sal hi geschat worden, nae die vruchten die hi draghet, Draecht hi. ^* xxx. mudde) gersten, soo sal hi vijftich sikels siluers ghelden,

* th. een homer

17

Heuet hi terstont gelouet sinen acker vanden gulden iare aen, so sal den acker na zijnder waerden gheschat worden,

18

Heeft hi hem gheheylicht na den gulden iare, soo sal die priester rekenen na die ouer iaren totten gulden iare, ende daer na minder schatten.

19

Maer wilt die ghene die den acker ^* gelouet) heeft, den acker lossen, soo sal hi den vijfsten deel siluers ouer dat hi geschat is, daer op gheuen, soo sal hi weder zijn worden

* th. geheylicht.

20

Maer en wilt hijs niet lossen, ende vercooptment eenen anderen, soo en sal hi hem niet meer lossen,

21

maer den seluen acker als hi inden gulden iare los wtghaet, sal den HERE geheylicht zijn, ^* ende den gheheylichden acker sal behooren totten recht der priesteren) [kolom]

* th. ghelijck eenen verbannen acker ende sal des priesters erfgoet zijn.

22

Als yemant eenen acker den HERE heylicht dien hi ghecocht heeft, ende zijn erfgoet niet en is,

23

soo sal hem die priester rekenen, wat hi ghelt totten gulden iare toe, ende hi die den HEERE den acker gelouet hadde die sal dien prijs gheuen.

24

Maer inden gulden iare, sal hi wederkeeren totten ghenen die hem vercocht heuet, ende dien hadde int deel van zijnder besittinghen.

25

Alle werderinghe sal gheschieden na den sikel des heylichs huys, Eenen sikel maect twintich ^* pennincxkens.)

* Exo. x.b. Eze. lxv.d. the. Gera.

26

Die eerste geboren onder dat vee, die den HEERE toch toebehooren, en sal niemant den HEERE heylighen noch ghelouen moghen, het si een osse oft schaep, want het behoort den HEERE,

27

Maer ist een onsuyuer dier, soo salment lossen na zijnder waerden, ende daer ouer geuen dat vijfste deel, Maer en wilt hijs niet lossen, soo salment vercoopen eenen anderen, na zijnder weerden,

28

Men en sal niet vercoopen, noch lossen dat den HEERE ^* gheheylicht) is van allen dat hem toebehoort, het si een mensche, vee, ofte acker, want alle ^* gheheylichde) is dat alderheylichste den HERE,

* th. verbannen.

* th. verbannen.

29

^* Ende al wat gheheylicht wort van eenigen mensche ende geoffert wort, en sal niet verlost worden) maer sal de doot steruen.

* th. men en sal ooc geenen verbannen mensce lossen.

30

⁺Alle thiende des lants, beyde vanden zade des lants, ende van vruchten der boomen behooren den HEERE, ende sullen den HEERE heylich zijn,

+ D

31

Maer wilt yemant zijn thiende lossen, die sal dat vijfste daer bouen meer geuen,

32

Ende alle dat thiende ghetelt wort, van runderen, ende schapen, ende wat dat onder des herders roede gaet, dat is een heilige tiende den HERE,

33

Men en salt niet wtkiesen, oft goet, oft quaet si, men en sals ooc niet wisselen, Maer wisselet yemant, so salt beyde, dat ghewisselt is, ende daer voor dat gewisselt wort, heilich zijn, ende niet gelost worden.

34

Dit zijn die geboden, die die HERE Moysi geboot tot den kinderen van Israel, opten berch Sinay.

§ Hier eyndet dat boec Leuiticus dat derde boeck Moisi.