De Vorsterman Bijbel

§ Dat .xv. Capittel.

1

⁺ENde die HERE sprack met Moysi, ende Aaron, seggende,

+ A

2

Spreect tot den kinderen van Israel, ende segt hen, Een man dye lijdt den vloet des zaets, die sal onreyn wesen,

3

ende dan salmen hem achten te legghen onder dese scandelike siecte, als die onsuiuer vochticheyt alle ooghenblicken aen zijn vleesch hanct ende aengewassen is,

4

Alle bedde daer hi op slaept, sal onreyn wesen, ende desghelijck alle plaetse daer hi op sidt.

5

Ende wie sine bedde raect, die sal zijn cleederen wasschen, ende baden hem met water ende onreyn zijn totten auont.

6

Ende wie sidt daer hi geseten heeft, die sal zijn cleederen wasschen, ende baden hem met watere, ende onreyn zijn totten auont,

7

Wye zijn vleesch raect die sal zijn cleederen wasschen, en baden hem met watere, ende onreyn zijn totten auont,

8

Als hy zijn speecsel worpt op den ghenen die reyn is, die sal zijn cleederen wasschen, ende baden hem met watere, ende onreyn zijn totten auont.

9

⁺Ende die sadel daer hi op sidt, sal onreyn worden,

+ B

10

Ende wie dat yet raect, dat onder hem gheweest is die die vloet des zaets lijdt, die sal onreyn zijn totten auont, Ende wie alsulcken dinc draecht, die sal zijn cleederen wasschen, ende hem met watere baden, ende onreyn

[p. g5r]

zijn totten auont.

11

Ende wien dat hi raect, ende te voren zijn handen niet en wascht, dye sal zijn cleederen wasschen, ende baden hem met watere, ende onreyn zijn totten auont.

12

Als hi een aerden vat raect, dat salmen breken, Maer dat houten vat salmen met watere wasschen.

13

Ist dat hi genesen wort, die ^* dusdanige passie) lijdt, so sal hi seuen dagen tellen nae dien dat hi reyn geworden is, ende zijn cleederen wasschen, ende zijn vleesch met leuende water baden, so sal hi suyuer zijn.

* th. den saetvloet.

14

Ende ten achtsten daghe sal hi twee tortelduuen, oft twee ionge duyuen nemen, ende voor des HEREN aensichte comen aen die duere des tabernakels des ghetuygenis, ende den priestere geuen.

15

Ende die priester sal deen maken tot een offerande voor die sonde, ende dander tot eenen brantoffer, ende hi sal in die tegenwoordicheit des HEEREN voor hem bidden, dat hi gesuyuert mach worden vanden vloet zijns zaets.

16

⁺Een man die met een vrouwe te doen heuet, die sal alle zijn vleesch met water baden ende onreyn zijn totten auont.

+ C

17

Ende alle cleet, ende alle pels vel, dat hi heeft, sal hi met water wasschen, ende die sullen onreyn zijn totten auont.

18

Die vrouwe daer hi mede te doen ghehadt heeft, sal haer met water baden, ende onreyn zijn totten auont.

19

^* Een vrouwe die int keeren der maent den loop des bloets lijdt) sal seuen daghen besiden gedaen worden.

* thebr. wanneer een vrouwe haers vleesches bloet vloet heeft.

20

So wie datse raect die sal onreyn zijn totten auont.

21

Ende de plaetse daer si in slaept, oft sidt, in die dagen als si besiden gedaen is, sal besmet worden.

22

Ende wie haer bedde raeckt, die sal zijn cleederen wasschen, ende baden hem met watere, ende onreyn zijn totten auont

23

Ende wie yet raect daer si op geseten heeft, sal zijn cleederen wasscen ende hem met water baden, ende onreyn zijn totten auont.

24

Ende als een man met haer te doen heeft, al die wijle dat si besiden ghedaen is, die sal seuen daghen onreyn zijn, ende alle dat bedde daer hi op slapen sal, sal besmet zijn.

25

⁺Als een vrouwe haeren bloet vloet lange tijt heeft, niet alleen ter gewoonliker tijt, mer ooc ouer den gewoonliken tijt, So sal si onreyn zijn, so lange als si die vloet heeft, gelijc si ter tijt haers maenstonts, so sal si ooc hier onreyn zijn.

+ D

26

Alle bedde daer si op slaept, oft yet daer si op sidt, sal besmet zijn,

27

Wie datse ooc raect, sal zijn cleederen wasscen, ende hi met watere ghewasschen, sal onsuyuer zijn totten auont. [kolom]

28

Ist dat den vloet ophout, ende dat bloet niet meer en vloeyet, so sal si seuen daghen tellen van haerder suyueringe,

29

ende ten achtsten dage sal si twee tortelduyuen, oft twee ionge duyuen den priester offeren, voor die duere des tabernakels des ghetuyghenis,

30

Ende die priester sal deen maken tot een sondoffer, ende dander tot eenen brantoffer, ende hi sal in die teghenwoordicheit des HEEREN, voor haer bidden, ende voor den vloet haerder onsuyuerheit.

31

Also suldi leeren die kinderen van Israel dat si dye onsuyuerheden wachten, ende dat si in haer onreyn vuylheden niet en steruen als si besmetten minen tabernakel, dat onder tmidden van hen is.

32

Dit is die wet ouer den gheenen die den vloet des zaets heeft, ende die met byslapen besmet wort,

33

Ende ouer die vrouwe die den bloet vloet heeft in haerder maentstont, ende die de heymelike bloet siecte lange lijdt, ende des menschen die daer by slaept.

§ Hoe dat die priesters niet altijt mochten totten Heylichdom comen: ende hoe dat heylichdom ghesuyuert wort, ende derseluer feeste.