De Vorsterman Bijbel

§ Dat .xvi. Capittel.

1

⁺ENde dye HEERE sprack tot Moysen (nae die doot van Aarons twee sonen, ende doen si vreemt vier offerden, zijn si ghedoot)

+ A

2

ende gheboodt hem segghende. Segt uwen broedere Aaron dat hy nyet tot allen tijden in die binnenste heylighe plaetse en gae achter dat zeyl dat voor die plaetse der antwoorden der genaden Gods is, daer die arcke mede bedeckt is, op dat hi niet en sterue, want ick sal in die wolcke openbaren op die plaetse der genaden,

3

ten si dat hi dit doe Hi sal een calf voor die sonde offeren, ende eenen ram tot eenen brantoffere,

4

ende den heyligen lijnen rock sal hi aendoen, ende een lijnen broecke aen zijn vleesch hebben, ende met eenen lijnen gordel gorden, ende den lijnen miter op hebben, Want dat zijn die heilige cleederen ende als hi zijn vleesch met water gewasscen heeft, sal hise aendoen,

5

Ende sal vander ghemeynten der kinderen van Israel twee bocken nemen voor die sonde, ende eenen ram tot eenen brantoffer.

6

⁺Ende als hi dat calf gheoffert heeft, ende ghebeden voor hem seluen, ende voor zijn huysghesin,

+ B

7

so sal hi die twee bocken doen staen in die teghenwoordicheyt des HEEREN in die duere des tabernakels des getuyghenissen,

8

ende sal dat lot worpen op dye twee bocken, eens bocx lot den HEERE, ende dander den ^* bock, diemen wt seynden sal)

* the. vrijboc

[p. g5v]

9

Ende hi sal den bock op den welcken des HEREN lot valt, offeren tot eenen offer voor die sonden,

10

maer wiens lot valt opten ^* boc diemen wtseynden ende laten sal) dien sal hy leuende voor den HEERE stellen, dat hy daer ouer gebeden soude storten, ende seynden hem in die woestine.

* th. vrybock

11

Ende als dese dinghen wel volbracht zijn, so sal hi dat calf offeren ende bidden voor hem seluen ende voor zijn huysghesin, ende doodent tot eenen offer,

12

ende sal nemen twierroockuat dat geuult is met den gloeyende colen des outaers, ⁺ ende sal sceppen metter hant ruecwerc ghemengt tot eenen welrueckende brant om te ontsteken, so sal hi voorby dat voorhanghende zeyl in dye heilige plaetse gaen,

+ C

13

op dat als die specerien des ruecwercs opt vier gheleyt zijn, haeren rooc ende neuel bedecke dye plaetse der ^* antwoorden) die opt ghetuygenisse is, ende hy niet en sterue,

* th. genaden.

14

Ende sal nemen vanden bloede des cals, ⁺ ende salt seuenmael sprenghen tegen die plaetse der ^* antwoorden) der ghenaden oostwaert.

+ He. ix.d. ende x.a.

* th. genaden.

15

Ende als hi den bock sal gedoot hebben voor die sonde des volcs, so sal hy dat bloet daer af dragen binnen achter dat voorhanghende zeyl, ghelijck alsser gheboden is vanden bloede des calfs, op dat hijt spreye teghen die plaetse der ^* antwoorden)

* th. genaden.

16

ende dat hi die heylighe plaetse versoene, van die onsuyuerheden der kinderen van Israel, ende van haeren ouertredinghen ende alle haer sonden.

⁺ Inder seluer manieren sal hi ooc doen den tabernacule des ghetuyghenis, dat welcke vast gheset is int middel der onreynicheden haerder wooningen. ⁺

+ D

+ Lu. i.a.

17

Gheen mensche en sal inden tabernacule des getuygenis zijn, als ^* die bisscop) gaet in die heilige plaetse om te bidden voor hem seluen, voor zijn huysgesin, ende voor die gheheele gemeynte der kinderen van Israel.

* theb. hi

18

Ende als hi wt gaet totten outaer die voor den HEERE staet, sal hi ^* voor hem seluen bidden) ende sal vanden bloede des calfs, ende vanden bloede des rams nemen, ende op des outaers hoornen al om doen,

* the. dien versoenen.

19

Ende sal met sinen vinghere vanden bloede daer op sprenghen seuenmael, ende hem heiligen ende wijen vander onreynicheyt der kinderen van Israel.

20

⁺Ende als hi ghereynicht heeft die heilighe plaetse, ⁺ ende den tabernacule ende den outaer, dan sal hi offeren den leuenden bock.

+ E

+ Die biechte van dat oude testament.

21

Dan sal Aaron beyde zijn handen op des bocks hooft tegader legghen, ende belijden op hem alle die misdaet der kinderen van Israhel, [kolom] ende alle haer ouertredingen in haere sonden ende salse den bock opt hooft ^* wenschen) ende hem door eenen man die daer toe bereit is wtseynden.

* the. leggen.

22

Ende als die bock alle haer sonden in die wildernisse gedragen heeft, ende gelaten is in die woestine,

23

so sal Aaron wederom in den tabernakel des getuygenis gaen, ende die lijnen cleederen wttrecken die hi aentroc als hi in die heilige plaetse ghinc, ende salse af daer laten,

24

ende sal zijn vleesch met water baden in een heilighe stede, ende zijn eygen cleederen aen doen. Ende na dat hi wtghegaen is ende heeft gheoffert sinen ende des volcs brantoffer, sal hi bidden voor hem seluen ende voor dat volc,

25

ende dat vet dat gheoffert is voor die sonde opten outaer ontsteken.

26

Maer die gene die den wtgesonden bock wtgeleyt heeft, sal zijn cleederen wasscen, ende zijn vleesch met watere baden, ende daer na inden leegher comen.

27

Dat calf, ende den bock die voor die sonden gheoffert waren, der welcker bloet in dye heylighe plaetse om te versoenen gebracht wort, salmen buyten den leghere brengen, ende met viere verbernen, beyde haer huyt, vleesch ende mest.

28

Ende diese verbernen sal, die sal zijn cleederen wasschen, ende zijn vleesche met water baden, ende also daer na inden legher comen.

29

⁺Oock sal v dat een eewich recht zijn, Inden thienden daghe der seuender maent, ⁺ suldy uwe sielen verootmoedighen, ende gheen werck doen, hi si ooc een ingheboren oft vreemdelinck, dye van buyten is gecomen onder v,

+ F

+ Die maniere van dye feestdagen te vieren.

30

Want in desen dage gesciet uwe versoeninghe, ⁺ dat ghi gereynicht wordet voor den HEERE, van alle v sonden,

+ Na. xxiij.e.

31

daeromme salt v eenen vryen Sabboth der rusten zijn, ende ghy sult uwe sielen verootmoedighen. Een eewighe rechte sal dat zijn.

32

⁺Alsulcke versoeninghe sal een priester doen, diemen ghesalft heeft, ende dies handen ghewijt zijn, tot eenen priester in zijns vaders stadt, ende hi sal die lijnen cleederen aendoen, ende die heylighe cleederen,

+ G

33

ende sal alsoo versoenen die heilighe plaetse, ende den tabernakel des ghetuygenis, ende den outaer, ende den priester, ende alle dat volc der gemeynten

34

Dat sal v een eewich recht zijn, dat ghi voor die kinderen van Israhel biddet, ende voor alle haeren sonden, Inden iare eens. Ende Moses dede soo hem die HEERE gheboden hadde.

§ Hoe datmen geen dieren slaen en mochte: men en moe-

[p. g6r]

stese offeren, ende niet den duuelen te offeren, ende datmen gheen bloet, noch dat van selfs ghestoruen was, eten en mochte.