De Vorsterman Bijbel

§ Dat .xiij. capittel.

1

⁺ENde die HERE sprack tot Moysen, ende Aaron, seggende,

+ A

2

Als eenen mensche aen die huyt zijns vleeschs yet opgaet van verscheyden verwen, oft een puyste, oft schorft, oft yet claer wit wordet, als oft lazarie worden wilde, aen dye huyt zijns vleeschs, salmen hem totten priester Aaron brenghen, oft tot yemant van sinen sonen eenen vanden priesteren,

3

die welcke als hi ghesien sal hebben die haren wit geworden, ende dat die gedaente aen die plaetse dieper is dan dandere huyt zijns vleeschs, so ist die plage der lazarien, daerom sal hi na zijn oordeel verscheyden worden.

4

⁺Maer is yewaerts yet wits aen dye huyt zijns vleesch, ende dat schijnsel des vleeschs niet dieper dan die ander huyt des vleeschs, ende die haren niet in wit verandert worden en zijn, so sal die priester den seluen besluyten seuen dagen,

+ B

5

ende ten seuensten dage besien, ist dat teeken staet in sinen oogen, soot eerstwerf stont, ende en heuet niet voorder ghegeten aen die huyt, soo sal hem die priester noch seuen daghen besluyten,

6

Ende als hi noch eens ten seuensten dage hem besiet, ende beuint, dattet teeken verduystert is, ende niet voorder geten en heuet aen die huyt, soo sal hi hem suyuer oordeelen, want tis grillicheyt, ende die mensche sal zijn cleederen wasschen, ende suyuer wesen,

7

Maer als die grillicheyt voorder gewassen is in die huyt, na dien dat hi vanden priester [kolom] besien, ende reyn gesproken is, ^* so sal hy noch eens totten priester geleyt worden,

* th. ende wort nv ten anderen mael vanden priestere besien, als dan die priestere siet dat die grillicheyt voorder gegeten heuet in dye huyt, so sal hi hem onrein oordeelen. want tis sekere lazarie.

8

ende sal verwesen worden onsuyuer te worden.)

9

Als dat teken der lazarie inden mensche is, dan salmen hem totten priester brengen,

10

Als hy siet, ende beuint, dat daer witheyt opghecomen is aen die huyt, ende die haren wit gheworden zijn, ende datter root vleesch in dye sweringhe is,

11

soo ist sekerlijck een oude lazarie in die huit zijns vleeschs, daer omme sal hem die priestere onreyn oordeelen, ende niet wech sluyten, want hi is recht onreyn.

12

Als die lazarie bloeyt in die huyt, ende bedecket alle die huyt, van aen dat hooft totten voeten, alle dat gene dat die priestere voor ooghen sien mach,

13

Als nv die priester siet, ende beuint, dat die lazarie alle dat vleesch bedect heeft, soo sal hi desen reyn oordeelen om dat alle zijn huyt wit geworden is, daeromme sal die mensche reyn zijn.

14

Maer als nv in dat vel leuende vleesche openbaer schijnt,

15

soo sal hi besmet zijn, door dat oordeel des priesters, ende sal gerekent worden onder die onsuyuere, Want dat leuende vleesch is bespreyt metter lazarien, soo ist onsuyuer,

16

Maer verandert dat leuende vleesche weder, ende wort widt, soo sal hi totten priester comen,

17

Ende als die priester besiet, ende beuint, dat dat teeken wit gheworden is, soo sal hi hem suyuer oordeelen, want hi is suyuer.

18

⁺Als in yemants vleesche aen dye huyt eenen sweer coemt, ende weder heelt,

+ C

19

ende daer na in die selue plaetse yet wits oft roots op comet, ende wort claer wit, so sal hi vanden priester besien worden,

20

Als dan die priester siet, dat die plaetse der lazarien nederder is dan die ander huyt, ende dat die haren wit geworden zijn, dan so sal hi hem onreyn oordeelen, want daer is sekerlijck een teeken der lazarien vanden swere ghecomen,

21

Siet die priestere dan, ende beuint hi, dat die haren nyet wit en zijn, ende dattet nyet nerderder en is, dan die ander huyt, ende is duyster geworden, soo sal hi hem seuen daghen besluyten,

22

etet voorder in die huyt, soo sal hy dan hem onreyn oordeelen, want het is sekerlijck een litteeken der lazarien,

23

Maer blijft die clare witheyt alsoo staende, ende en etet niet voorder, soo ist die scrabbe vanden swere, ende die priester sal hem reyn oordeelen.

24

⁺Als yemants vleesch aen die huit met vier gebrant wordet, ende ist dat dat teeken vanden brande, root oft wit is,

+ D

25

ende als die priester hem besiet, ende beuint, dat dat har wit ghewor-

[p. g3v]

den is, aen des brants teeken, ende die plaetse dieper dan die andere huyt, soo ist sekerlijck lazarie, vanden litteekene des brants, geworden, Daer omme sal hem die priester onreyn oordeelen, want het is een teeken der lazarien.

26

Maer siet die priester ende beuint, dat dat haer aen dat brant teeken nyet wit geworden en is, ende niet neerder en is, dan dye ander huyt, ende is ooc verduystert, so sal hi hem seuen dagen besluyten,

27

Ende ten seuensten dage sal hi hem besien, heuet voorder geten aen tvel, so sal hy hem onreyn oordeelen, want het is lazarie,

28

Maer ist blijuen staende aent teeken des verbrants, ende niet voorder gegeten aen die huyt, ist daer toe ooc verduystert, soo ist een sweringhe des brants teeken, ende dye priester sal hem reyn oordeelen, want tis een scramme des brants teekens,

29

⁺Wanneer een man oft wijf opt hooft of aenden baert scorft wort ende die priester dat teeken besiet,

+ E

30

ende beuint, dat die plaetse dieper is dan dander huyt ende is thaer aldaer gout verwich ende dunne, soo sal hi hem onreyn oordeelen, want tis een lazarighe grillicheyt des hoofts ende des baerts,

31

Maer siet die priestere, dat die grillicheyt niet dieper en schijnt dan die huyt, ende dattet haer niet vael en is, soo sal hy den seluen seuen dagen op sluyten,

32

ende op den seuenden dach sal hijt besien, Ende beuint hi, dat dye grillicheyt niet voorder gheten en heeft, ende datter geen gulden haer aen en is, ende die plaetse des grillicheyts niet dieper en is, dan die ander huyt,

33

soo sal hi ghescooren worden, maer niet in die grillicheyt, ende die priestere sal hem noch seuen dagen wech sluyten,

34

Ende als hi ten seuensten dage hem besiet, ende beuint, dat dye grillicheyt niet voorder in die huyt ghegheten en heeft, ende en schijnt niet dieper dan die huyt, soo sal hem die priester reyn segghen, Ende hi sal zijn cleederen wasschen, ende so reyn wesen,

35

Maer eet die grillicheyt voorder in dye huyt, na dien dat hi reyn geseyt is,

36

ende dye priestere besiet, ende beuint, dat die grillicheyt also voorder gegeten heeft in die huyt, so en sal hy niet meer na vragen, oft die haren goutuerwich zijn, want hy openbaerlijck is onreyn,

37

Maer schijnt die grillicheyt stil gestaen te hebben, ende isser swart haer daer opgegaen, soo sal hi weten, dat die mensche gesont gheworden is, ende hi sal stantaftelijck segghen hem reyn te wesen.

38

Als een man oft wijf aen dye huyt haers vleeschs yet claer wits heeft,

39

⁺ende die priester siet, dat die clare witheyt verduystert is, so [kolom] isser een witte grillicheyt ghecomen inder huyt, ende is reyn.

+ F

40

Een man van wien die haren des hoofts wt vallen, die is calu, ende is reyn,

41

Vallen si hem wten voorhoofde, soo is hi calu, ende reyn,

42

Maer coemt daer hy bloot ofte calu is, een widt oft rootachtich teeken, so is hem gecomen lazarie, aen die blootheyt, oft aent calu hooft, daer om sal hem die priester besien, ende als hi beuint, dat wit oft rootachtich teeken opgelopen aen zijn bloot oft caluwe hooft,

43

ende siet die priester dat so sal hi sonder twifel hem veroordeelen lazarich te wesen, om teeken dat in die caluwe plaetse op gheghaen is.

44

Wie dan besmet is metter lazarien, ende is af gescheyden na dat bywesen des priester,

45

sal ontnayde clederen hebben, ende thooft bloot, ^* den mont met een cleet ouerdect), ende sal wtroepen, dat hi onsuyuer ende besmet is,

* the. die lippen gehult

46

Alle den tijt dat hi malaets ende onsuyuer is, sal hy buyten den legher alleen woonen.

47

Een lijnen ofte wullen cleet, dwelck lazarie heeft

48

inden wtslach oft inslach, oft in die drayen, oft een vel oft yet dat van vellen ghemaect is,

49

Ist datter een witte oft roode smette in is, ^* so salt gheacht worden met lazarie ontsteken te wesen, ende het sal den priestere ghetoont worden

* th. aenden wtslach oft inslach ofte aen eenich velwerc.

50

⁺Ende als hi dat cleet gesien heeft, sal hijt seuen dagen opsluyten,

+ G

51

Ende als hijt ten seuensten dage wederom siet, merct hi dat die lazarie ^* ghewassen is) so ist een geduerige lazarie, ende hi sal oordelen dat dat cleet besmet is, ende al daert ingewonden is,

* th. voorder ghegheten heeft, aent cleet, aenden wtslach, of inslach aen tvel, of datmen van vellen maect

52

ende daeromme salt verbrant worden met die vlamme des viers.

53

Ist dat die priester sien sal, dat die lazarie niet voorder gewassen en is ^*

* thebr. aent cleet, oft aen wtslach, of inslach, oft aen alderley velwerc

54

so sal hi ghebieden, datment wassche daer die lazarie in is, ende salt insluyten noch ander seuen daghen,

55

Ende als die priestere sien sal, ^* die oude ghedaente niet voorder gecomen) al ist dat die lazarie nyet ghewassen en is, so sal hijt vonnisse gheuen onreyn te wesen, ende men salt met vier verbranden, om dattet ^* int outste des cleets al omme ende omme door dye lazarie ghespreyt is,)

* the. na dat teeken ghewassen is, dat teeken niet verandert en is.

* the. dieper ingeten heuet ende heuet schorft gemaect.

56

Maer is dye plaetse duysterder dan die lazarie, nae dat cleedt ghewasschen is, soo sal hijt afschooren, ende scheydent vanden vasten laken,

57

Ende ist dat daerenbouen in dye plaetsen dye te vooren onbesmet waren, haer openbaert, die vlieghende wilde lazarie salment met vier verbranden,

58

Ist dat si op hout, so sal hi die tweede reyse wasschen met water ^* die stucken) dye suyuer zijn, ende si sullen reyn wezen,

* th. tcleet of inslach, oft wtslach, of velwerc

59

Dat is die wet ouer die teekenen der la-

[p. g4r]

zarien van dye cleederen, oft si wullen zijn, oft lijnen aenden wtslach oft aenden inslach oft aen alderley werc van vellen, hoemense sal oordelen reyn, oft besmet te wesen

§ Hoe die leprose gesuyuert moeste worden, ende hoemen mercken mochte dat eenich huys leproes ware.