De Vorsterman Bijbel

§ Dat .xij. ca.

1

⁺ENde die HEERE sprack tot Moysen, segghende,

+ A

2

Spreect met den kinderen van Israel, ende segt, ⁺ Ist dat een wijf vanden zade dat si ontfanghen heeft, een knechtken baert, soo sal si seuen dagen onreyn zijn, ^* na den dagen der afsceydinghe der vrouwen crancheyt)

+ Luce. ij.e.

* th. so lange als si haere crancheyt lijdet.

3

ende inden achtsten dage salmen dat kindeken ^* besniden)

* th. zijn slofken besniden

4

Ende si sal thuys bliuen driendertich daghen in dat bloet haerder reyninghen, niet heylichs en sal si aentasten, ende totten heilige plaetsen en sal si niet comen, tot

[p. g3r]

dat die daghen haerder reyninghen wt zijn,

5

Maer baert si een meysken, soo sal si twee weken onreyn zijn, so lange als si haer cranckheyt lijdet, ende si sal sessentsestich daghen thuys blijuen inden bloede haerder reyningen

6

⁺Ende als die daghen haerder reyningen wt zijn voor den sone oft voor die dochtere, so sal si een iarich lam brengen tot een brantoffer, ende een ionghe duyue oft een tortelduyue voor haer sonde, aen dye duere vanden tabernakel des getuychnis, ende salse den priestere ouergeuen,

+ C

7

die sal hi offeren voor den HEERE, ende bidden voor haer, ende soo sal si ghesuyuert worden vanden bloede haerder onsuyuerheyt, dat is die wet voor die ghene die een knechtken oft een meysken baert.

8

Ende ist dattet haer hant nyet en vint, ⁺ ende si gheen lam en can geofferen, so sal si nemen twee tortelduyuen, oft twee ionghe duyuen, die een tot eenen brantoffer, die ander voor die sonde, ende die priestere sal voor haer bidden, ende soo sal si ghereynicht worden.

+ Luce. ij.d.

§ Hoe datmen die lazarie of leproesheyt bekennen mocht, ende mercken wt andere schorftheyt oft rappicheyt.