De Vorsterman Bijbel

§ Dat .vij. Capittel.

11

⁺DIt is die wet des dootoffers, datmen den HERE offert,

+ A

12

Ist dat den offer is een dancbaerheyt, so sullen si ongeheefde brooden offeren met olije gemengt, ende ongeheefde vladen met olije bestreken, ende gerooste koecken van bloemen vanden mele met olije gemengt.

13

Si sullen ooc sulcken offer doen, met eenen koec van geheefden broode met die offerande der dancbaerheyt, die geoffert wort voor die vreetsame,

14

vanden welken deen sal den HERE geoffert worden voor ^* deerste vruchte,) ende sal des Priesters wesen die dat bloet ^* storten) sal,

* the. den hefoffer.

* h. sprengen.

15

Ende dat vleesch salmen den seluen dach eten, ende daer en sal niet ouerblijuen tot opten morgen.

16

Ist dat ye-

[p. f8v]

mant wt beloften oft vrijen wille een offerande offert, dat sal ooc inden seluen daghe datter gheoffert is, ghegheten worden, ende ofter yet ouer blijft tot inden anderen daghe, so salment ooc eten,

17

Maer watter vanden geofferden vleesche ouerblijft tot inden derden daghe, dit sal met vyere verbrant worden,

18

ende oft yemant inden derden daghe eten sal vanden gheofferden vleesche der vreetsamige offeranden, so salse te vergheefs wesen, noch si en sal den genen diese gheoffert heeft, niet profitelijck zijn, (Maer dat meer is) Wat ziele dat haer besmet met sulcker spijsen, sal schuldich zijn der ouertredinghen.

19

⁺Ende dat vleesch dat yet onreyns raect, en sal niet gheten worden, maer met vyer verbrant worden, Wie suyuer is, die sal van desen vleesche eten,

+ B

20

So wat onreyn ziele eten sal vanden vleesche des vreetsamen offers, dat den HEERE gheoffert is, sal van haeren volcke vergaen,

21

Ende als een ziele yet onreyns raecket, het si een onreyn mensche, een beest, oft yet dat besmetten mach, ende van dusdanigen vleesche etet, die sal vergaen van haeren volcke.

22

Ende die HERE sprac tot Moysen, seggende,

23

Spreect totten kinderen van Israel, ende segt, Dat vet vanden ossen vanden schapen, oft gheyte en suldy niet eten,

24

tvet vander beest die gestoruen is, oft dat van een wilt verschuert is, dat suldy besighen in alle ^* gebruyck)

* theb. ghebruycke, maer en si sullet niet eten.

25

Ist dat yemant tvet etet, datmen behoort te offeren om den HERE te ontsteken, sal vergaen van sinen volcke,

26

Ghi en sult ooc gheen bloet van eenigen gedyerte tot spijse nemen, noch van vee, noch van vogelen,

27

⁺so wat ziele eenich bloet eten sal, die sal vergaen van haeren volcke.

+ C

28

Ende die HEERE sprack tot Moysen seggende,

29

Spreect totten kinderen van Israel, ende segt, Wie dat een offer der vreetsamiger sal offeren den HEERE die sal oock mede offeren sacrificie, dat is zijn vochtighe offeranden,

30

Hi sal in zijn hant nemen tvet der offeranden, ende het borst stuck, ende als hijt beyde gheoffert den HEERE gheheylicht heeft, sal hijse dan leueren den Priestere,

31

ende die sal tvet ontsteken om te doen rooken opten outaer, Ende die borst sal Aaron, ende zijn sonen hebben,

32

Ende die rechte schoudere vanden offerande der vreetsamighe sal wijcken totten Priester ^* in die eerste vruchten)

* the. tot een hefoffer.

33

Ende so wie dat van Aarons sonen dat bloet ende dat vet des dootoffers offert, die sal die rechte schouder tot sinen deel hebben,

34

Want dat borst stuck der verheffinge ende die schouder der afdeelinghe heb ick af ghenomen den kinderen van Israel, van haer vreetsamighe [kolom] offeranden, ende hebse den Priesteren Aaron, ende sinen sonen ghegheuen tot een eewich recht van al den ghemeynen volcke van Israel.

35

⁺Dit is Aarons ende zijnder sonen saluinghe in die ceremonien ende zeden des HEREN, inden dach alse Moyses offerde, dat si int Priesterschap dienen souden,

+ D

36

ende dat God geboden hadde, hem ghegeuen te worden vanden kinderen van Israel, tot eenen eewigen gheestelijcken rechte voor haer nacomende gheslachten,

37

Dit is die wet vanden offer, diemen heel verbranden soude, ende der offerande voor die sonde ende versuymenisse ende voor die wijdinghe, ende voor die vreetsamighe offeranden,

38

die welcke die HEERE gheoordineert heeft Moysi, opten berch Sinai, doen hi den kinderen van Israel gheboot, dat si offeren souden haer offeranden den HEERE in die woestijne Sinai.

[afbeelding]

§ Hoe Aaron die Priester ende zijn sonen ghewijt werden.