De Vorsterman Bijbel

§ Dat .ij. Capittel.

1

⁺ALs een ziele den HEERE eenen spijsoffer doen wilt, soo sal van bloemen vanden mele zijn offerhande wesen, ende hi sal olije daer op ghieten, ende wieroock daer oplegghen,

+ A

2

ende dat also brenghen totten Priesters Aarons sonen, Dan sal een van dien Priesteren een hant vol nemen van den seluen bloemen vanden mele ende olije, met alle dat wieroock, ende hi salt stellen tot een ghedachtenisse, opten outaer, den HEERE totten aldersoetsten ruecke,

3

Datter ouer klijft vanden spijsoffer dat sal Aarons ende zijnder kinderen zijn, Dat sal dat heylich der heylighen zijn, vanden offeren des HEEREN.

4

⁺Maer als ghi eenen spijsoffer doen wilt, van dat ghebacken is inden ouen, van bloemen vanden mele salt zijn ongheheeft broot bestreken met olije, ende ongheheefde vladen met olije besmeert.

+ B

5

Maer is uwe spijsoffere yet van ghebacken inder pannen, so salt van ongheheefden bloemen mele met olije ghemenghet zijn,

6

ende sullet in stucken deylen, ende olije daer op ghieten. ^*)

* the. ende so ist een spijsoffer.

7

Maer is uwe spijsoffer yet opten rooster ghebacken, ⁺ so sullen in ghelijcker manieren die bloemen met olije ghemenghet worden,

+ C

8

Die suldy offerende den HEERE ouerleueren in die handen des Priesters,

9

als hijt gheoffert sal hebben, so sal hi wechnemen een ghedenckenisse vanden spijsoffere ende ontstekent opten outaer, den HEERE tot een den aldersoetsten ruecke,

10

wat datter ouerschiet dat sal toebehooren Aaron, ende sinen sonen, Theylich des heylighen is dit vanden offer des HEEREN.

[p. f6v]

11

Alle spijsoffer die ghi den HEERE offeren wilt, suldy sonder gheheefden deech maken, noch gheen gheheeft deech, noch gheen honich en sal daer onder zijn, dat den HEERE tot eenen offer ontsteken wort,

12

Alleen v eerste vruchten ende gauen suldy offeren, Maer op gheenen outaer en suldyse stellen tot eenen ruecke der soeticheyt.

13

Al wat ghi offert tot spijsoffer suldy met sout menghen, ende ghi en sult niet afnemen dat sout des verbonts ws Gods, ⁺ van spijsoffer, In alle offerande suldy sout offeren,

+ D

14

Maer offerde ghi die ghiften vanden eerste vruchten ws korens den HEERE van die aren die noch groen zijn, die suldy roosten aen tvyer, ende brekense in die maniere van mele, ende so suldy v eerste vruchten den HERE offeren,

15

stortende daer op olije, ende wieroock daer bouen op legghende, want het is des HEEREN offerande,

16

Van die welcke die Priester ontsteken sal inder ghedachtenisse der ghiften, een deel vanden ghebroken mele, ende der olijen ende tgheheele wieroock.

§ Vanden vredeoffer van ossen, van schapen, van lammeren ende van bocken.