De Vorsterman Bijbel

§ Dat .iij. Capittel.

1

⁺ENde ist dat sinen offer is een offer der vreetsamer vanden runderen, het si een osse oft koye, so sal hi offeren voor den HEERE, ⁺ dat ghene dat sonder smette is,

+ A

+ Roma. xij. i.Pet. ij.

2

ende hi sal zijn hant op des selfs offers hooft legghen, ende die sal ter doot gheoffert worden inden inganck des Tabernakels des ghetuchnis, Ende die Priesteren Aarons sonen, sullen dat bloet ^* wtstorten,) al om ende om den outaer,

* the. sprenghen.

3

Ende si sullen vanden offer der vreetsamer den HEERE offeren (te weten) ⁺ al dat vet des inghewants, ⁺

+ B

+ exo. xxix.d

4

ende die twee nyeren, metten vette dat daer aen is, aenden lendenen, dat nette dat aen die leuer is, ende oock aen die nyeren,

5

Ende Aarons sonen sullent ontsteken opten outaer tot eenen brantoffer, op dat hout daer tvyer onder gheleyt is tot eenen offer des alder soetsten ruecs den HEERE.

6

⁺Is zijn offer van schapen ende der vreetsamer offerande, het si een manneken, oft een wijfken, so salt al sonder smette zijn,

+ C

7

Ist een lammeken, dat hi voor den HERE offert,

8

so sal hi zijn hant op des selfs zijns offers hooft legghen, ende het sal ghedoot worden int portael des Tabernakels des ghetuychnis, ende Aarons sonen sullen dat bloet al om den outaer ^* ghieten,)

* the. sprenghen.

9

ende also vanden offer der vreetsamer den HEERE offeren, te weten, dat vet, den heelen steert metten nyeren, ende dat vette dat dat inghewant bedect met [kolom] alle den vette des inghewants,

10

ende die twee nyeren metten vette dat aen die lendenen is, ende dat nette om die leuere aenden nyeren daer toe,

11

Ende die Priester salt ontsteken opten outaer tot een voetsel des vyers, ende totten offer des HEEREN.

12

⁺Maer ist dat een gheyte zijn offer is, ende geoffert heeft den HEERE,

+ D

13

so sal hi zijn hant op haer hooft legghen, ende offerense ter doot inden inghanck des Tabernakels des ghetuychnis, Ende Aarons sonen sullen dat bloet alomme den outaer ghieten,

14

ende si sullen daer af tot een voetsel des vyers des HEREN nemen, te weten, dat vette dat dat inghewant bedect, ende alle dat vette dat aen dat inghewant is,

15

die twee nyeren metten vette dat daer aen die lendenen is, ende dat nette dat aen die leuere is, ende oock die nyeren,

16

Ende die Priester salt ontsteken opten outaer tot tvyers voetsel, ende des aldersoetsten ruecs

17

Alle vet behoort den HERE tot eenen eewighen rechte ^* voor uwen gheslachten,) ende in alle uwe wooninghen, dat ghi noch gheen vet noch bloet en sult eten.

* the. bi uwe nacomelinghen.

§ Vanden sondoffere voor die ghemeynte, ende voor den vorst ende prince, ende vanden sondoffer voor die ziele die onwetent sondicht.