De Vorsterman Bijbel

§ Dat .xxv. Capittel.

1

⁺ENde die HERE sprac tot Moysen, segghende,

+ A

2

Segt den kinderen van Israel dat si mi ^* brengen die eerste vruchten) ende van een yegelic diet gewillichlic geeft, suldijt nemen,

* the. Hefoffer gheuen

3

Ende dit ^* ist dat) ghi van hen nemen sult, Gout, siluer, metael,

* theb. is den hefoffer dien

4

goubloeme verwe side, ende purpure, roset root, witte ghetweernde side, geyten haer,

5

roode rams vellen, hemel blaeu vellen, vueren hout,

6

olie om die lampen te doen bernen Specerie tot salue ende tot goeden ruec werc,

7

Onix steen ende edele steenen tot eenen lijfroc ende tot eenen borstlap

8

Ende si sullen mi een ^* heylige plaetse) maken, ende ic sal int midden van hen woonen,

* the. heylichdom.

9

Nader ghelikenis van eenen beworpe des tabernakels, dat ic v thoonen sal met al die ^* vaten) dier daer toe behooren, also suldi dat maken.

* th. ghereetschap.

10

Maect een arcke van vueren houten berderen twee cubitus ende een halue sal dye lencte zijn, ⁺ anderhalf die breyde, ende anderhalf die hoochte,

+ B

11

Ende ghi sultse met den aldersuyuersten goude vergulden binnen ende buyten, ende maect daer bouen al om ende omme een gulden croone,

12

ende giet vier gulden ringhen, die sult ghi stellen aen haer vier hoecken, also datter twee ringhen zijn op eene side, ende twee op dander side,

13

Ende maect hantboomen van vueren houte, Ende ghi sultse met gout ouerdecken,

14

ende steectse in die ringen aen die arcke, datmense daer mede dragen mach

15

Ende si sullen in die ringen bliuen, ende daer wt niet ghedaen worden,

16

Ende ghi sult in dye arcke dat ghetuyghenis legghen, dat ic v gheuen sal,

17

Ghi sult ooc eenen genaden stoel maken vanden aldersuyuersten goude, twee cubitus ende een halue sal die lencte zijn, ende anderhalf die breede,

18

ende ghi sult twee cherubim maken van gesmeden goude, op beyde ^* siden vanden plaetse des Godts antwoorde,)

* th. eynden des genaden stoels

19

Dat die een Cherubim si aen deen eynde, ende die ander aen dander side,

20

laetse bedecken beyde deynden van die plaetse der genaden, wt spreydende haer vloghelen, ende die ^* plaetse der antwoorden) ouerdecken, ende malcanderen aensien, gekeert met den aensichten in die plaetse der ghenaden, met welcke die arcke bedect sal worden,

* the. genaden stoel

21

in die welcke ghi sult stellen dat ghetuygenisse, dat ic v sal gheuen,

22

Van daer sal ic v ^* gebieden) ende met v spreken, te weten, vanden ghenaden stoel tusschen die twee Cherubim, ⁺ die opter arcken des getuygenis sullen wesen, ende ic sal den kinderen van Israel alle dingen voor v

* the. betuyghen.

+ C

[p. e5r]

ghebieden.

23

Ghi sult ooc een tafel maken van vueren houte, twee cubitus lanc, ende een cubitus breet, ende anderhalf cubitus hooge,

24

ende ghi sultse vergulden met den alder suyuersten goude. Ende ghi sult rontomme maken een gulden ^* lijste,

* the. croone ende een lijste al omme een hantbreet hooghe ende een gulden croone om die lijste

25

ende der lijsten een onder scoten gouden croone vier vingheren hooch, ende daer bouen noch een gulden croonken).

26

Ende ghi sult vier gulden ringen bereyt maken ende stellense aen die vier hoecken aen zijn vier voeten,

27

vast onder die ^* croone) sullen die ringen zijn, datmen daer hantboomen in doen mach, so datmen die tafel mach draghen,

* thebr. lijste

28

⁺ende ghi sult die hantboomen van vueren houte maken, ende verguldense met goude datmen die tafel daer mede draghe.

+ D

29

Ghi sult ooc bereyden ^* azijnuaten, flesscen wieroocuaten, ende croesenen, in die welcke die vochtighe offerhande gheoffert sullen worden, wt den alder puersten goude)

* the. scotelen lepelen, cannen van finen goude, om mede wt ende in te gieten.

30

Ende ghi sult voor mijn aensichte altoos leggen thoon brooden.

31

Ghi sult ooc eenen candelaer vanden alder suyuersten geslagen goude maken, zijn sperboom ende scachten, nappen ende lelyen, ende ronde clooten sullen wt hem spruyten.

32

Ses scachten sullen wt spruyten van zijn siden, drie wter eender side, ende drie uter andere,

33

drie nappen inder manieren van ^* noten) aen elcken scachte, ende ronde clooten ende lelien, ende ^* des gelijcs. in nappen gelijc een note inden anderen scachte, ende ronde clootkens tsamen ende lelien. Dit sal wesen twerc der ses scachten die voorgebracht sullen worden wt den sperboom)

* th. amandel noten.

* th. dat sullen zijn die ses scachten wt den candelaer

34

Maer inden seluen candelaer sullen wesen vier nappen inde maniere van eender note, ende in een yegelijc bisonder clooten ende lelien.

35

Die ronde clooten sullen wesen onder die scachten in drie plaetsen, die te samen ses worden spruytende wt eenen sperboom.

36

Ende dan sullen die clooten ende die scachten wt den seluen sperboom comen, ende al salt gesmeet wesen vanden alder puersten goude.

37

Ende ghi sult seuen ^* bernende lichten) maken, ende stellense op den candelaer datse deen tegen dander lichten.

* teh. lampen

38

Ende die keers snuters, ende die vaten daerment gesnut in blusscen sal, sullen al gemaect worden vanden alder puersten goude.

39

Alle tghewichte des candelaers met alle sinen ^* vaten) sal hebben een talent vanden alderfijnsten goude.

* the. gereetscap

40

Siet naerstelijc toe ende maket na dat beworp dat v opten berch ghethoont is.

§ Vanden tabernacule te maken, Ende van haeren ouerdecselen, Ende den ghenaden stoel op die Arcke des ghetuygenis te stellen.