De Vorsterman Bijbel

§ Dat .xxiij. Capit.

1

⁺GHi en sult v gheen stemme der luegenen ontfanghen, dat ghi door eenen ongodliken onrecht ghetuyghenisse spreket.

+ A

2

Ghi en sult der menichten niet volghen, om quaet te doen, voor dat gherecht en suldi niet aenhanghen die sentencie des meesten hoops, soo dat ghi daer omme vander waerheyt wiket.

3

Ghi en sult den armen int recht niet ontfermen,

4

Als ghy ws viants osse, ofte ezele

[p. e4r]

gemoete, soo dat hy dwaelt, leueren weder tot hem,

5

Ist dat ghi des ghenen ezel siet, die v haet, onder den last ligghen, so en suldi dien niet voor bi gaen, maer ghi sult hem op helpen wt den last.

6

Ghi en sult dat recht der armer menschen niet buyghen in zijnder saken,

7

Dye lueghene sult ghi vlieden.

Den ontschuldigen, ende den gerechtighen en suldi niet dooden, want ick ben een viant des ongodliken.

8

Ghy en sult gheen ghiften nemen, want die ghiften verblinden die voorsienighe wijsen, ende verkeeren die ^* woorden des rechtueerdighen)

* the. rechte saken.

9

Den vremdelinck en suldi niet quellic wesen, want ghy kent der incomelingen herte, Want ghi ooc een vremdelinc gheweest zijt int lant van Egypten.

10

Ses iaer suldi v lant besayen, ende zijn vruchten vergaderen,

11

inden seuensten iare suldijt laten ligghen ende rusten, op dat die armen van uwen volc daer af eten, ende watter ouer blijft, laet dat die beesten des ackers af eten, Alsoo suldy oock doen met uwen wijngaerden, ende olijf gaerden.

12

⁺Ses dagen suldi arbeyden, maer des seuensten daechs suldi vieren, op dat uwe osse ende uwe ezele rusten, ende dat v ioncwijf, sone, ende incomelinck rusten.

+ B

13

Al dat ic v geseit hebbe, dat hout, Ende ^* bi die namen der vremder goden en suldy nyet sweren) noch wt uwen monde en sullen si niet ghehoort worden.

* the. der ander goden namen en sult ghy niet gedencken

14

Driemael suldi mi feest houden inden iare,

15

Dye feeste der ongeheefder brooden suldy mi houden, ghi sult seuen daghen ongeheeft broot eten (soo ick v gheboden hebbe) in den tijt der maent ^* der nieuwer vruchten) als dan ghinct ghi wt Egypten, Ghy en sult v nyet verthoonen ydel voor mijn aenschijn,

* th. Abib

16

Ende die feeste, ⁺ als ghi uwen arbeyt eerstwerf oostet, dien ghi opten velde gezaeyt hebt, Ende die feeste der verghaderinghen inden wtghanc des iaers, als ghi v vruchten verghadert sult hebben vanden velde.

+ Leui. xxiij.

17

Driemael inden iare sal al dat onder v manlic is hem voor den ^* HERE) verthoonen

* the. HEERE des heyrscaren

18

Ghi en sult dat bloet ^* ws) offers niet offeren ^* op) den heefdeech, Ende dat vet van mijnder feesten en sal nyet blijuen totten morghenstont.

* th. mijns

* th. neuen

19

Dat eerste vanden eersten vruchten uwer aerden suldi brengen in dat huys des HEEREN ws Gods, Ende ghi en sult dat boxken niet koken ^* met melc van zijnder moe-[kolom]dere)

* th. die wile dat aen zijns moeders melck is

20

⁺Siet, ick sal minen Enghel seynden die voor v gaen sal, dat hi v behoeden sal in den weghe, ende in die plaetse brenghen, die ic voor v bereyt hebbe,

+ C

21

Daer omme wacht ^* hem) ende hoort zijn stemme, ende en verstoret hem nyet, Want hi en sal uwe misdaet niet vergheuen, ende mijnen naem is in hen,

* the. v voor zijn aenghesicht

22

Ist dat ghy zijn stemme hoort, ende doet al dat ick v segghen sal, Soo sal ick uwer vianden viant zijn, die v quellen sal ick quellen.

23

Ende mijn Enghel sal voor v gaen, ende brengen v tot die Amoriten, Hethiten, Pheresiten, Cananiten, Heuiten, ende Iebusiten, die ick verdoen sal,

24

Ghi en sult haer goden niet aenbidden, noch hen dienen, ende na haere wercken en suldi niet doen, Maer ghi sult haer af goden af doen ende breken,

25

ende ghi sult den HEERE uwen God dienen, op dat ick v broot, ende uwen wateren ghebenedie, Ende sal alle siecten van dat midden van v keeren.

26

Binnen uwen lande en sal niemant ^* sonder vruchte,) noch onuruchtbaer zijn, ic sal tgetal uwer dagen veruullen,

* the. alleene Deut. vij.c

27

Ick sal mijn vreese voor v henen seynden, ende dooden alle dat volck daer ghi comen sult, Ende ick sal v, alle v vianden in v teghenwoordicheyt ^* den rugghe omkeeren,)

* theb. in die vlucht gheuen

28

Ick sal horsselen voor v seynden, die voor v veriagen sullen ⁺ die Heuiten, Cananiten, ende Hethiten ^* eer ghi int lant comen sult)

+ D

* ten is nyet int hebr.

29

Ick en salse in eenen iare nyet wt stooten voor v, Op dat dat lant niet en verwoeste, ende dat die wilde dieren niet vermenicht en worden teghens v,

30

Ick salse alleynskens van uwen aensichte wt stooten, tot dat ghi vermenichtfuldicht, ende dat landt besidt,

31

ende ick sal uwe palen stellen van dye roode zee, tot der Philistinen zee, ende van die woestenie tot aen dat water, Want ick sal die inwoonders des lants in v handen leueren, ende ick salse voor uwen aensichte wt worpen,

32

Ghy en sult met hen, noch met hueren goden gheen verbont maken,

33

maer en laetse in uwe lant niet woonen, Op dat si v niet sondich en maken teghen mi Ist dat ghi hueren goden dient, het sal v tot een ergherenisse verghaen.

§ Hoe Moyses wederom opten berch climt, Vanden boeke des verbonts, Vanden steenen tafelen.