De Vorsterman Bijbel

§ Dat .xxij. cap.

1

⁺SOo wie ghestolen heeft eenen osse, ofte schaep, ende slaetet, oft vercoopet, dye sal vijf ossen voor eenen osse weder geuen, ende vier schapen voor een schaep.

+ A

2

Wort een dief beuonden, dat hi in een huys breect, ende wort daer op gheslaghen, dat hy sterft, soo en sal die gene die hem sloech zijns bloets niet schuldich zijn,

3

maer is die sonne ouer hem op ghegaen ^* so is hi manslachtich, ende hi sal steruen,) Ende ist dat een dief niet en heeft om weder te gheuen voor zijn dieuerije, so salmen hem vercoopen om zijnder dieften wille,

* the. soo salmen tbloetrecht laten gaen

4

Maer vintmen leuendich bi hem, die beesten dye hi ghestolen heeft, het si osse, ofte ezele, ofte schaep, soo sal hijt dubbel weder gheuen.

5

Ist dat yemant eenen acker oft wijngaert arghert, dat hy zijn vee schade laet doen in eens anders ackere, dye sal vanden besten van sinen acker ende wijngaert in stede stellen.

6

⁺Ist datter een vier coemt ende vaet die haernen, so dat die schouen verbernen, oft ooc die vruchten des ackers, hi diet vier aenstac, sal die schade betalen.

+ B

7

Oft yemant sinen naesten ghelt, oft iuweelen te bewaren gheuet, ende het wort hem wt sinen huyse ghestolen, vintmen den dief, soo sal hijt dubbel weder geuen,

8

ende en vintmen den dief niet, so salmen den huysweert voor die goden brenghen, ende hi sal sweren dat hi zijn hant niet gheleyt en heeft aen zijns naesten goet.

9

Oft die een den anderen beschuldicht in eenigerhande bruec, tsi om osse, ezel, oft schaep, oft cleederen, oft yet datter verloren is, so sullen haer beyder saecken voor die Goden comen, ende den welcken die goden verdoemen sullen, ⁺ dye salt tweedubbel sinen naesten weder gheuen.

+ Ioan. x.g.

10

⁺Wanneer dat yemant sinen naesten eenen ezel, oft een osse, oft een schaep, oft wat beeste dat si, te bewaren doet, ende het onsterft hem, oft bederft, oft het wort hem ontdreuen vanden vianden, dattet niemant en siet,

+ C

11

so salment tusschen hen beyden op eenen eedt biden HERE laten comen, dat hi zijn hant niet gestelt en heuet aen zijns naesten haue, ende die heere des goets sal den eedt ontfaen, ende dander en sal niet bedwongen worden om weder te gheuen,

12

Maer heuet een dief gestolen, soo sal hijt sinen heere betalen,

13

maer verschorent die beesten so sal hi dat ghetuyghenis brengen van datter verschoort is, ende niet betalen,

14

Oft yemant van sinen naesten yet leent, ende het wort verargert, oft het sterft dat zijn heere daer niet bi en is, so sal hi bedwongen worden om te beta-[kolom]len,

15

maer is zijn heere daer bi, soo en sal hijt niet betalen, als hijt om loon zijns wercs gehuert hadde.

16

Ist dat yemant een maecht betrect die noch niet belooft en is, ende beslaepse, so sal hyse begauen ende te wiue nemen,

17

maer en wiltse haer vader hem niet geuen, so sal hi ghelt gheuen, soo veel als die maechden van ghiften weghen pleghen te nemen.

18

Ghi en sult gheen tooueraers laten leuen,

19

Wie dat een beeste beslaept, die sal den doot steruen,

20

Wie den goden offert, sonder alleene den HEERE, dien salmen verdoen,

21

Ghi en sult die vremdelinghen niet bedroeuen, noch verdrucken, want ghi lieden hebt ooc incomelinghen in Egypten lant geweest.

22

⁺Ghi en sult gheen weduwen noch weesen letten,

+ D

23

Ist dat ghise quest, so sullen si tot mi roepen, ende ic sal haeren roep verhooren,

24

ende minen toorne sal vergrammen, ende ic sal v metten zweerde dooden, ende uwe wiuen sullen weduwen worden, ende v kinderen sullen weesen worden.

25

Als ghi minen volcke dat arm by v is ghelt leent, soo en suldi v tegen hen nyet hebben als een schatter, noch ghy en sultse niet verdrucken met woekerie,

26

Als ghy een cleet van uwen naesten te pande neemt, suldijt hem weder gheuen eer dye sonne onder ghaet,

27

Want zijn cleet is alleene daer zijn vel mede bedect wort, ende daer hi in slaept, Ist dat hi tot mi roept, soo sal ic hem verhooren, want ick ben ghenadich.

28

Van dye goden en suldy gheenen achterclap doen ende die ouerste onder v volck en suldi niet vermaledien.

29

Ghi en sult niet vertrecken te offeren uwe ^* thienden ende eerste vruchten) Ghy sult my geuen uwen eersten sone,

* the. hert ende weecke vruchten

30

soo suldi ooc doen van uwen ossen ende schapen, Seuen daghen laetse by haerder moeder blijuen, ende ten achtsten dage suldise mi gheuen,

31

Ghy sult ooc heylige lieden voor mi zijn, Gheen vleesche dat te voren van wilden beesten ghesmaect is, en suldi eten, maer ghi sullet voor die honden worpen.

§ Vander rechtueerdicheyt des oordeels, Van des naesten ezel opten rechten wech te brengen.