De Vorsterman Bijbel

§ Dat .xviij. Capittel

1

⁺ENde als Ietro dye priester van Madian Moyses ^* neue) hoorde al dat god ghedaen hadde Moysi ende sinen volcke Israel dat de HERE Israel wt Egipten geleyt hadde,

+ A

* the sweer

2

Nam hy Sephoram Moyses huysurouwe, die hi weder om gesonden hadde

3

met sinen twee sonen, deen hiet Gerson, want hi sprac Ic ben een toecomelinc geworden in vreemde landen,

4

ende die ander Elieser, want hi sprac, Mijns vaders God is mijn hulpe geweest, ende heeft mi verlost van Pharaos zwaert.

5

Daer om Ietro Moyses ^* maech) ende zijn kinderen ende zijn huysurouwe zijn gecomen tot Moysen in der woestinen, daer hi ghelegert was aenden berch Gods,

* the. sweer

6

ende ontboot Moysi, seggende. Ic Ietro v ^* maech) ende v wijf, ende beyde v kinderen met haer zijn tot v gecomen.

* the. swager

7

Doen ghinc Moyses hem te gemoet buyten ende ^* aenbadt) ende custe hem. Ende si hebben malcanderen met vreedsamen woorden gegruet, ende als hi in der tenten gegaen was,

* th. nijchde

8

vertelde Moyses sinen zweer al dat die HEERE Pharao ende den Egyptenaren gedaen had, om Israels wille, ende alle die moete die hem opten wege gheschiet was, ende datse die HERE verlost hadde.

9

Ietro wert verblijt van alle dat goet dat die HEERE Israel ghedaen hadde, dat hyse verlost hadde vander Egyptenaren hant.

10

⁺Ende Ietro sprac, Gebenedijt si de HERE die v verlost heeft van die hant der Egiptenaren ende Pharaos hant, die weet zijn volck van Egypten hant te verlossen.

+ B

11

Nv weet ic dat die HERE grooter is dan alle Goden, om dat ^* hi houeerdelic tegen hen gedaen heeft)

* the. si vermetelick tegen hen gheweest zijn

12

Daer om offerde Ietro Moyses maech een geheel offer te branden ende offeren. Doen quam Aaron ende alle de ouders van Israel tot hem, om dat broot te eten voor die oogen des HEEREN.

13

Des anderen daechs smorgens sadt Moyses om dat volck te oordelen dwelck stont by Moysen van smorgens tot den auont.

14

⁺Als zijn zweer sach al dat hy den volcke dede, sprack hy. Wat is dit dat ghi den volcke doet? waer om sidt ghi alleen, ende alle dat volck verwacht van tsauonts totten morgen?

+ C

15

Moyses antwoorde hem, dat volck coemt tot mi ende vragen ^* die sentencie godes)

* the. Godt om raet

16

want als si eenigen twist hebben, comen si tot mi, dat icse rechte tusschen eenen yegeliken ende sinen naesten, ende thoone hem Gods geboden, ende Gods wet,

17

^* Hy) sprack tot hem, het en is niet goet dat ghi doet,

* the zijn swager. Deut. i.b

18

met sotten arbeyt wordy verteert ghi ende dat volck dat met v is, dat werc is te zwaer, ghi en moget alleen

[p. e2r]

niet verdragen,

19

Maer hoort mijn stemme, ende minen raet, ende God sal met v zijn, Sijt ghi den volcke inden dingen die God aengaen,

20

dat ghi verhaelt dat gesproken wort tot hem, ende toont den volcke ^* die ceremonien ende manieren om Godt met aenbeden te eeren) ende den wech daer si door wandelen moeten, ende dat werck dat si doen moeten.

* th. insettinghen ende wetten.

21

⁺Ende siet wt, onder dat volck na redelijcke mannen, ende die Godt vreesen, warachtich, ende die der giericheyt viant zijn, die sedt ouer hen, Sommige ouer duysent, sommige ouer hondert, ouer vijftich, ende ouer thien,

+ D

22

die dat volc oordeelen mogen alle tijt, Maer waer een groote sake is, dat si die tot v brengen, ende dat si alle lichte saken rechten, so salt v lichter worden, als ghi den last onder dye andere mede gedeelt hebt,

23

doedi dat, soo suldy volbrengen wat v Godt gebiet, ende alle dit volc sal dan met vreden in zijn wooninge comen,

24

Als Moyses dese dingen gehoort hadde, dede hi al dat hi geraden hadde,

25

ende Moyses vercoos redelike mannen wt alle Israel, ende hi maectese hooftluyden ouer dat volc van Israel, Sommige ouer duysent, sommige ouer hondert, sommighe ouer vijftich, ende sommige ouer thien,

26

ende si oordeelden dat volc in allen tijden, Maer wat harde saken waren dat brochten si tot Moysen, Ende die cleyne saken die vonnisten si alleen,

27

Aldus liet Moyses sinen ^* maech) ghaen, ende hi wederom keerende, is ghecomen in zijn lant.

[afbeelding]

* th. sweer

§ Hoe die kinderen van Israel aenden berch Sinai comen, [kolom] ende tvolck wort gheheylicht, Ende Moyses climt opten berch.