De Vorsterman Bijbel

§ Dat .iij. Capittel.

1

⁺MOyses huede die schapen Ietro zijns sweers des priesters, van Madian, ende als hi gedreuen hadde die scapen binnen in die woestine, quam hi aenden berch Gods Oreb,

+ A

2

ende die ^* HEERE) openbaerde hem in eene vierighe vlamme, wt den bosch, ende hi sach dat doornen bosch met viere bernen, ende dattet niet verbernt en wert

* the. die engel des Heren.

3

Ende Moyses sprac, Ic wil daer henen, ende besien dit groote visioen waerom dat bosch niet en verbernt

4

⁺Als die HEERE sach dat Moyses ginc om te sien, riep hem God wt den midden des boschs, ende sprac, Moyses Moyses, Hi antwoorde, hier ben ic,

+ B

5

Ende die HEERE sprac En coemt hier niet naerder, trect v schoenen wt van uwen voeten, want die plaetse daer ghi op staet, is een heylich lant,

6

Ende sprack noch, Ick ben die God ws vaders, Abrahams God, Ysaacs God, ende Iacobs God, Ende Moyses decte zijn aensicht, want hi en dorste teghen God niet sien.

7

Ende die HERE sprac tot hem, Ick hebbe gesien die allende mijns volcs in Egypten ende ic heb huer geroep ghehoort ouer ^* die herdicheyt der genen die ouer haer werc gestelt zijn)

* theb. diese driuen

8

⁺ende wetende huer smerte ende leet, ben ic neder ghecomen dat ic hen verlossen soude wt den geweldigen handen der Egyptinaren, ende salse leyden wt desen lande, in een [kolom] goet ende breet lant, in een lant dat van melcke ende honich vloeyt, te weten, totter plaetsen der Cananiten, Hethiten, Amoriten Pheresiten, Heuiten ende Iebusiten,

+ C

9

Daeromme want dat gheroep der kinderen van Israel voor mi ghecomen is, ende ick ghesien hebbe huere verdruckinghe daer si mede verdruct worden vanden Egiptinaren,

10

So coemt, Ic sal v seynden tot Pharaonem, dat ghi mijn volck die kinderen van Israel wt Egypten leydet.

11

Ende Moyses sprac tot God, wie ben ick, dat ic tot Pharao gaen soude, ende leyden die kinderen van Israel wt Egypten?

12

Die HERE sprac, Ick sal met v zijn, ende dat sal uwe teeken zijn, dat ic v gesonden hebbe, als ghi mijn volc wt Egypten geleyt hebt, suldi Gode offerhande doen op desen berch.

13

⁺Moyses sprac tot Gode, Siet, Ghae ick totten kinderen van Israel, ende segge tot hen, Die God uwer vaderen heeft mi tot v gesonden, ende si mi seggen sullen, hoe is sinen naem? wat sal ic hen segghen?

+ D

14

God sprac tot Moysen, ^* Ick ben die ic ben) ende seyde, aldus suldi tot den kinderen van Israel segghen, ^* Die is,) die heeft mi tot v ghesonden.

* the. Ick sal zijn, die ick zijn sal

* th. Ick salt zijn.

15

Ende wederom sprac God tot Moysen, also suldi totten kinderen van Israel seggen, Die HEERE uwer vaderen God, Abrahams God, Ysaacs God, Iacobs Godt heuet mi tot v gesonden, ⁺ dat is mijnen naem eewelic, daer bi salmen mijns ghedencken ^* van gheslachte tot gheslachte,)

+ E

* th. van kinde tot kints kinde

16

Daerom gaet, ende vergadert die ouersten van Israel, ende segt tot hen, Die HEERE uwer vaderen God heeft mi geopenbaert, Abrahams God, Ysaacs God Iacobs Godt, ende heeft gheseyt, Al besoeckende heb ick v besocht ende gesien, wat v in Egypten gheschiet is,

17

ende ic hebbe gheseyt, Ic sal v wt die verdruckinghe van Egypten leyden, int lant der Cananiten, Amoriten Hethiten, Pheresiten, Heuiten ende Iebusiten, In dat lant dat van melc ende honich vloeyt.

18

Ende als si sullen v stemme hooren, dan suldi met den outsten van Israel voor den coninc van Egypten gaen, ende tot hem seggen, ⁺ Die HEERE der Hebreeuscer God heeft ons geroepen, So laet ons den wech van drie dachreysen gaen in die woestine, op dat wi offeren moghen Gode onsen HEERE,

+ F

19

Maer ic weet dat die coninc van Egypten v niet en sal laten trecken, dan door een starcke hant,

20

want ick sal mijn hant wtstrecken ende Egypten slaen met alderley wondere,

[p. d2v]

dat ic int middel van hen doen sal, daer na sal hi v laten trecken.

21

Ende ic sal desen volck genade geuen voor den Egyptinaren, dat wanneer ghilieden wt trect, dat ghi dan niet ydel wt en trect,

22

Maer een yegelic wijf sal van haerder gebuerinnen ende werdinnen eyscen, silueren ende gulden vaten, ende cleederen, ende die suldy op uwe sonen, ende op uwe dochteren leggen, ende ghi sult Egypten beroouen.

§ Hoe God Moysi teekenen van zijnder roepingen geeft ende tot Egypten reyst, ende zijn huysurouwe besnijt haeren sone, ende Aaron gemoet hem, ende spreect totten kinderen van Israel.